சூட்தண்

சமையல் செய்வது என்பது ஒரு கலை வலைப்பதிவர் உமையாள் காயத்ரி அவர்கள் சமையலைப்பற்றி இந்த சமூகத்திற்கு ஒரு சேவை செய்து வருகிறார்கள் என்றே சொல்வேன், வாழ்க ! வளர்க ! அவரின் தொண்டு. தி கிரேட் தேவகோட்டை சமையலுக்கு புகழ் பெற்றது என்பது உலகறிந்த உண்மை, தேவகோட்டையானாகிய யாம் எமக்கு தெரிந்த சமையல் கலையை உலகிற்கு அறிமுகப்படுத்தினால் 

(உமையாள் காயத்ரி அவர்கள் இதைப் படிக்கும்போது... நமக்கு போட்டியாக ஒரு ஆள் களத்தில் குதித்து விட்டேதோ ? என்று பயபட வேண்டாம் எமது பாதை வேறு) 

அதுவும் ஒரு சேவையே மக்களுக்கும் இது தேவையே எனக்கருதி ''சூட்தண்'' என்ற தண்ணீரைப்பற்றி அன்றாடம் உபயோகமான இந்த தகவலை தங்களுக்கு கற்றுக் கொடுப்பதில் யாம் பெருமை கொள்கிறோம்.

செய்முறை.

முதலில் ஒரு லிட்டர் பிடிக்க கூடிய ஒரு வாணலியை எடுத்துக் கொள்ளுங்கள் குறிப்பு அந்த நேரத்தில் வீட்டில் வானொலி பாடிக் கொண்டிருந்தால் ? ஸ்விட்ச் ஃஆப் செய்து விடவும் காரணம் இசையில் மயங்குவோரும் உண்டு ஆதலால் செய்முறையில் கவனக்குறைவு ஏற்படலாம் பிறகு, கண்மாயில் எடுத்து வந்த தண்ணீரானாலும் சரி, கிணற்றில் இறைத்து வந்த தண்ணீரானாலும் சரி, முனிசிபாலிட்டி தண்ணீரானாலும் சரி, அல்லது அம்மா கடைக்கு போகும்போது வாங்கி வந்த மினரல் வாட்டரானாலும் சரி அதை வாணலியில் ஊற்றி அடுப்பை பற்ற வைத்து அடுப்பில் வைக்கவும் மிதமான சூட்டில் இருந்தாலும் பிரச்சனை இல்லை சிறிது நேரத்தில் வாணலியில் ஊற்றிய தண்ணீர் ''தளபுள தளபுள'' என்ற சப்தத்துடன் கொதிக்கும் பிறகு பேய் SORRY ஆவி வரும் (வலைப்பதிவர் ஆவி அல்ல) அப்பொழுது புடிதுண்டில் பிடித்து கவனமாக இறக்கி வைக்கவும், சிறிது நேரத்தில் கொதி அடங்கியவுடன் மிதமான சூட்டில் இருக்கும் பொழுது வீட்டில் வயதானவர்கள் பெரும்பாலும் மாத்திரை சாப்பிடுவார்கள் அப்பொழுது அவர்கள் மாத்திரையை விழுங்குவதற்கு இந்த தண்ணீரை உபயோகப்படுத்தலாம், சின்னக் குழந்தைகளுக்கு சளி பிடித்திருந்தால் ? அவர்களுக்கும் குடிக்க கொடுக்கலாம், அதைப்போல குளிர் காலங்களில் சாதாரணமாகவே எல்லோரும் குடிப்பதற்கு இதையே பயன் படுத்தலாம், இன்னும் சொல்லப் போனால் மருத்துவர்கள் (மருத்துவர் ராமதாஸ் அல்ல) இப்பொழுதெல்லாம் சுட வைத்த தண்ணீரையே குடிக்கச் சொல்கிறார்கள், மேலும் இதையே பெரிய பாத்திரங்களில் செய்தால் வயதானவர்கள் குளிக்கும்போது மற்ற தண்ணீரோடு கலந்து கொண்டால் குளிப்பதற்கு ஏதுவாக இருக்கும். இது உலக அளவில் எல்லா மனிதர்களுக்கும் பயன் படவேண்டும் என்ற எமது உயர்ந்த சிந்தனையால் எனக்கு தெரிந்த மொழிகளில் இதை பலருக்கும் உபயோகமாக வெளியிட்டுள்ளேன் அவர்களும் பயன்பட்டு இதற்கு பெயர் சூட்டி மகிழ்ந்து அந்தப் பெயர்களை எனக்கு e-Mail அனுப்பி வைத்தார்கள்

ஹிந்தியில் (गरम पानी) கரம்பாணி

  தெலுகுவில் (వేడి నీల్లు) வேடி நீலூ

மலையாளத்தில் (ചൂടു വെള്ളം) சூடு வெள்ளம்

கன்னடத்தில் (ಬಿಸಿ ನೀರು) பிசி நீரு

இலங்கையில் (උණු වතුර) உணு வத்துர

பிலிப்பைன்ஸில் (Mainit na Tubig) மைனிட் நா டுபிக்

இண்டோனிஷியனில் (Hot Air) ஹோட் ஆய்ர்

  தாய்லாந்தில் (น้ำร้อน) நம்ரோண்

 ஜப்பானில் (湯) ய்யூஹ்

  சைனீஸில் (热水) ஏஸ் வெய்

  ஃப்ரெஞ்ஸில் (Eau Chaude) உஸ் ஸுதாஹ்

ரஷ்யாவில் (Горячая вода) கரே ஸெவ்வாதா

 அல்மாய் ஹார்(المياه حاره)அரபியில்

ஆங்கிலத்தில் (Hot Water) ஹாட் வாட்டர்

இவ்வளவு ஏன்... தி கிரேட் தேவகோட்டையில் நம் இனிய தாய்மொழியாம் தமிழில் கூட பழங்கால சொல் வழக்கில் சுடுதண்ணீர் என்பார்கல்.... என்னங்க... திடீர்னு கல் எடுக்கிறீங்க... என்ன... என்னை குறி வக்கிறீங்க... அய்யய்யோ... எஸ்கேப்.

குறிப்பு – எனக்கு தட்டச்சு தெரியாத சிங்கள மொழியில் மட்டும் உணு வத்துர என்ற வார்த்தையை கொடுத்து உதவிய நண்பர் திரு. யாழ்பாவாணன் அவர்களுக்கு நன்றி.