சந்தி சிரிச்சுடும் சாந்தி

கடந்த தவளை பதிவின் தொடர்புள்ள குறும்படத்திற்க்காக நான் சொன்ன நகைச்சுவை கதை.

ஹலோ அம்மா நல்லா இருக்கீங்களா ?

நல்லா இருக்கேன்ப்பா... தமிழ் நீ நல்லாயிருக்கியா ?

இருக்கேன்மா அப்பா நல்லா இருக்காங்களா ?

ஆங் அவருக்கென்ன... கெளுறு மாதிரி மீசையை முறுக்கி கிட்டு நல்லாத்தான் இருக்காரு...

சரிம்மா, பணம் அனுப்பிட்டேன் இன்னும் ரெண்டு நாள்ல வந்துடும் அந்த இடத்தை கிரையம் பண்ணிடுங்க, உங்க ரெண்டுபேரு பேருலயும் பத்திரம் எழுதிடுங்கம்மா...

சரிப்பா அதையெல்லாம் நான் பாத்துக்கிறேன், நீ உடம்பை நல்லபடியா பார்த்துக்க, நேரத்துக்கு சாப்பிடு துபாய்ல இப்ப குளிராமே... ராத்திரி நேரத்துல வெளியில போகாதப்பா, சளிப்பிடிச்சுக்கிரும்.

சரிம்மா நான் நாளைக்கு போன் செய்யிறேன்.

சரிப்பா.

(அந்த நேரம் தள்ளாட்டத்துடன் உள்ளே நுழைகிறார் வில்லங்கம் விருமாண்டி)

என்ன சாந்தி யாருக்கிட்டேருந்து போனு... ?

யேன் மயங்கிட்டேருந்துதான்....

நல்லாயிருக்கானாமா என்னவாம் ?

பணம் இன்னும் ரெண்டு நாள்ல வந்துடுமாம், இடத்தை என் பேருல பத்திரம் போடச்சொன்னான்.

உன் பேருலயா ?

ஏன்... வாயைப் பொளக்குறீங்க ? மூடுங்க பாம்பு நுழைஞ்சிடப்போகுது.

இந்த எகத்தாளத்துக்கு மட்டும் குறைச்சல் இல்லே, உன் பேருல பத்திரம் போடச் சொன்னானா அதெப்படி எம்மயன் எம் பேருலயிலே போடச் சொல்லியிருப்பான்.

உங்களுக்கு வாக்கப்பட்டு என்னத்த கண்டேன், நான் பெத்தபுள்ள தலையெடுத்து இப்பத்தான் முதன் முதலா அம்மா பேருல இடம் வாங்குறான் அது பொறுக்கலையா உங்களுக்கு ?

யேண்டி, சந்தி சிரிச்சவளே.... வாக்கப்பட்டு என்னத்தையும் காணாமலயா எம்புள்ளை தமிழ் வாணனை பெத்தே ?

இந்த மாதிரி கோக்கு மாக்கு பேசாம போயி அந்த இடத்துக்காரவுங்கள்ட்ட சொல்லிட்டு வாங்க வர்ற புதன்கிழமை நல்லநாளா இருக்கு அன்னைக்கே பத்திரம் போடலாம்னு.

இருடீ முதல்ல யாரு பேருல பத்திரம்னு முடிவு பண்ணிக்கிறலாம், எம் மயன் சம்பாரிச்சதுல எனக்கு உரிமை இல்லையா ?

யேன் நான்தானே பத்து மாசம் சுமந்து பெத்தேன் எம் பேருல பத்திரம் போட்டா, என்ன ?

பத்து மாசம் சுமந்தியா ?

பின்னே நீங்களா சுமந்தீங்க ?

பத்து மாசம்தானடி நீ சுமந்தே அதுக்கு முன்னாலே நாந்தானடி சுமந்தேன்.

நீங்க சுமந்தியளா என்ன ... புத்தி கூறு மழுங்கிப்போச்சா ?

இல்லடி புத்திக்கூர்மையோட சொல்றேன்.

இது, கூர்மை இல்லே கொடுமை.

பத்து மாசம் சுமந்ததுக்கே.. இப்படி அலட்டிக்கிறியே யேம்மயன் பிறக்கும்போது... எனக்கு 24 வயசு அப்படினா... 23 வருஷமா சுமந்த எனக்கு என்னடி மரியாதை ?

அய்யோ. அய்யோ இப்படி உலகத்துல இல்லாததெல்லாம் பேசிக்கிட்டு திரியிறதனாலதான் ஊருல உள்ளவன் பூராம் பேருக்கு முன்னாலே வில்லங்கம்னு சொல்றாங்கே...

சொல்றவன் சொல்லட்டும் நான் நியாயத்தத்தைதான்டி பேசுவேன்.

புருஷன் சுமந்ததா... யாராவது இதுவரை சொல்லியிருக்காங்களா ?

இதுவரை இல்லாட்டினா இனிமேல் சரித்திரம் சொல்லட்டும்டி.

சரித்திரம் சொல்லாது தரித்திரம் புடிச்சதுனுதான் சொல்லுவாங்கே...

அடியே... சாந்தி கேட்டுக்கோ இனிமே பத்து மாசம், பதினொரு மாசம்னு சொன்னே சந்தி சிரிச்சுப்போகும் ஞாபகம் வச்சுக்க ?

இப்ப  மட்டும் என்ன... வாழுதாம் சரி இல்லைனா, நம்ம ரெண்டு பேரு பேருலயும் பத்திரம் போடவானு எம்புள்ளைக்கிட்டே கேட்டு வைக்கிறேன் நீங்க போயி அவுங்கள்ட்ட சொல்லிட்டு வாங்க மொதத்தடவையா எடம் வாங்கிறப்போ நீங்களே, வில்லங்கம் பண்ணாம.....

நீ என்ன கேக்குறது போனைக் கொடுடீ நான் கேட்கிறேன்.

வேண்டாம் புள்ள நைட் டூட்டி பார்க்கிறவன் களைச்சுப்போயி இப்பத்தான் வந்து தூங்கியிருப்பான் சாயங்காலம் பக்குவமா, நானே கேட்டுக்கிறேன் ஒங்களுக்குப் பேசத்தெரியாது.

அப்படி வாடி வழிக்கு  நான் போயிட்டு வாறேன் மத்தியானத்துக்கு கம்மாமீனு அயிரைக்குழம்பு வெய்யி.

ஹும், இது ஒண்ணுதான் குறைச்சல் நல்லாத்திண்ணுட்டு நம்மளைத்தானா எகிறுது இனிமேல் உப்பைக் குறைச்சாத்தான் சரியா வரும்.

என்னடி மொனங்கிறே..... ?

ஒண்ணுமில்லே, நீங்க போயிட்டு வாங்க அயிரை மீனு வாங்குறேன்.

ம்ம் அது.

(வில்லங்கம் விருமாண்டி வீட்டை விட்டு விரைந்தார் விற்பவன் வீட்டுக்கு)  

இனிய நெஞ்சங்களே.... இந்தப்பதிவு நான் எழுதக்காரணம் ஒரு முறை நம் இனிய இந்தியாவுக்கு நான் வந்திருந்த பொழுது எனது மகனின் கைப்பேசிக்கு அழைப்பு வந்தது பெயர் பார்த்தேன்...

Appa

இப்படி வந்தது உடன் மகனிடம் கொடுத்தேன் அவன் பேசும் பொழுது தெரிந்து கொண்டேன் எனது அண்ணனிடம் என்று... பரவாயில்லையே வளர்ப்பவரை அப்பா என்று சொல்கிறானே.... சரி பெரியம்மா நம்பரை எப்படி வைத்திருக்கிறான் ? அவனுக்கு தெரியாமல் பரிசோதனை செய்தேன்...

Amma

இப்படி இருந்தது பரவாயில்லையே வளர்ப்பவர்களை அம்மா - அப்பா நினைப்பது சரிதானே தவறில்லையே நாம்தான் காலம் முழுவதும் பிரிந்து விட்டோமே... சரி தி கிரேட் நம்ம நம்பரை எப்படி வைத்திருக்கிறான் ? எனது U.A.E நம்பரிலிருந்து கால் செய்து பார்த்தேன் கீழே கீழே பாருங்களேன்... இப்படி வந்தது...

Killergee Abu Dhabi

அடப்பாவி 23 வருஷமாக சுமந்தவனுக்கு (என் மகன் பிறக்கும் பொழுது எனக்கு 24 வயது கணக்கு சரிதானே, ஹி..ஹி..ஹி) இதுதான் மரியாதையா ? இதைப்பார்த்து நான் சிரிப்பதா. அழுவதா... (அவ்வ்வ்வ்வ்)  

பதிவுக்காக சாராயக்கடை நிகழ்வுகளை நீக்கி விட்டேன் அவை குறும்படத்திற்க்கு சிறப்பாக இருக்கும் என்பது எமது கணிப்பு. நண்பர்களே மலையாள நண்பர் சஸ்பென்ஸ் கதை கேட்டதால் மூன்று தினங்களில் மீண்டும் சொன்னேன் அதற்க்கும் இதே மாதிரி தான் பிறகு முடிவெடுத்தேன் இனி சொல்லக்கூடாது இரண்டு  கதைகளையும் குறும்படம் எடுக்கும் திட்டம் உள்ளது விருப்பம் உள்ளவர்கள் தொடர்பு கொள்ளலாம்.

காணொளி

இந்த வகையான தமிழ்வாணன்கள் துபாயில் இப்படித்தான் கயிற்றின்மீது வாழ்ந்து சம்பாரித்து ஊருக்கு அனுப்புகிறார்கள் இது ஊரில் வாழும் பல டாஸ்மார்க் தந்தையர்களுக்கு தெரிவதில்லை நேற்று முன்தினம் யதார்த்தமாக எனது செல்போனில் நான் எடுத்த காட்சி..