ரஞ்சிதா மேடம்

    நட்பூக்களே எனக்கு தொலைக்காட்சியை பார்த்தாலே வேதனையாக இருக்கிறது மேலும் மின்சார செலவு செய்து காணும் நம்மை ஊடகக்காரர்கள் சற்றும் மரியாதையின்றி அவமானப்படுத்தி விடுகின்றார்கள். சமீபத்தில் வீட்டில் ஒருநாள் தொலைக்காட்சியில் சுவாமிஜி நித்தியானந்தா அவர்கள் அருளாசியோடு பதில் வழங்குவதாக அழகிய பெண்மணி ஒருவர் மகிழ்ச்சியாக சொன்னார் மேலும் நல்லதொரு ஆன்மீக விடயங்கள் நண்பர்கள் திரு. ’’பசி’’ பரமசிவம், திரு. பகவான்ஜி, திரு. வலிப்போக்கன் போன்றவர்களைப் போல நமக்கும் பிடித்ததுதானே... என்று பார்த்து கேட்டுக் கொண்டு இருந்தேன். 

அதில் தொலைபேசி எண்ணும் கொடுத்து இருக்க பலரும் அழைத்து தங்களது ஐயங்களை கேட்டு மகிழ்கின்றார்கள். மகிழ்ச்சி மனதுக்கு நல்லதுதானே ஆகவே மகிழ்ச்சியை காண்பது அரிதாகி விட்ட நமது வாழ்வில் இவர்களாவது இலவசமாக மகிழ்ச்சி தருகின்றார்களே என்பதை அறிந்தபோது மனதுக்கு மகிழ்ச்சியாக இருக்க நாமும் அழைத்து நமது ஐயங்களை கேட்போமே... என்று மகிழ்ச்சியாக அந்த எண்ணில் பலமுறை முயன்றும் அதிர்ஷ்டவசமாக இணைப்பு கிடைத்து விட்டது நானும் மகிழ்ச்சியுடன் அவர்களுடன் நலகுசலம் கேட்டு அவர்களும் என்னிடம் கேட்டு மகிழ்ச்சி அடைந்தபோது அவர்கள்தான் கேட்டார்கள் ஐயா தங்களது ஐயங்களை கேட்கலாம் என்று. உடனே நானும் எனது ஐயத்தை தீர்ப்பார்கள் என்று மகிழ்ந்து மகிழ்ச்சியாக கேட்டதுதான் தாமதம்...

‘’டமார்’’

என்ற இடியுடன், கூடிய மழை என்று ரமணன் ஐயா சொல்வாரே... அதைப் போன்ற சப்தத்துடன் எதிர்முனையில் தொலைபேசியை அடிக்க மகிழ்ச்சியாக இருந்த எனது மனது நொடியில் மகிழ்ச்சியை இழந்து விட்டது இவர்கள் என்னதான் நினைத்துக் கொண்டு ஊடகங்களை நடத்துகின்றார்கள் ? பத்திரிக்கை சுதந்திரத்தை வளர்த்து விட்டது தவறா ? இவர்கள் மக்கள் மகிழ்ச்சியாக இருப்பது பிடிக்க வில்லையா ? மகிழ்ச்சியிலேயே பெரிய மகிழ்ச்சி பிறரை மகிழ்ச்சியாக வைத்துக் கொள்வதுதான் என்பது இவர்களுக்கு தெரியாதா ? நான் தவறாக ஒன்றும் கேட்கவில்லையே... கோபமாகவும் கேட்கவில்லையே... மகிழ்ச்சியாகத்தானே கேட்டேன் பிறகு எதற்கு அவர்கள் கோபப்பட வேண்டும் ? அத்துடன் மனம் மகிழ்ச்சியை இழந்தது பிறகு தொலைக்காட்சியை அணைத்து விட்டு பதிவு ஏதாவது எழுதுவோம் என்று யோசித்துக் கொண்டே உட்கார்ந்திருந்தேன்.

அடடே மறந்து விட்டேன் நான் என்ன கேள்வி கேட்டேன் தெரியுமா ? சின்னோண்டு கேள்விதான் இதோ இதுதாங்க...

ரஞ்சிதா மேடம் இப்போ எங்கே இருக்காங்க ?

இதுக்கா கோபப்படுறது ? ச்சே என்ன மனிதர்கள் இவர்கள் நீங்களே சொல்லுங்க... ?

சிவாதாமஸ்அலி-

நாயை அடிப்பானேன்... பீயைச் சுமப்பானேன் ?