நாளைய மன்னர்கள்

நட்புகளே... பார்த்தீர்களா ? இளைஞர்களுக்கு ‘’நாளைய மன்னர்கள்’’ என்றொரு பெயரும் உண்டு ஆனால் இந்த இழி செயலைச் செய்யும் அனைவருமே இளைஞர்களே.. இவர்களை சட்டப்படி தண்டிக்க நமது சட்டத்தில் இடமுண்டு ஆனால் நாளடைவில் இதற்கு சட்டத்தில் இடமில்லையோ என்று நினைக்கும் நிலையில் நாம் வாழ்ந்து கொண்டு இருக்கின்றோம் இது பொது மக்களுக்கு இடையூறு செய்யும் செயல் மட்டுமல்ல ! உணவுக்கு மரியாதை தராமல் அதை பாழாக்கும் செயலும்கூட இதை நாட்டை ஆளுபவர்கள் உடனடி நடவடிக்கை எடுக்க வேண்டும் ஆனால் அவர்கள் இனிவரும் காலங்களில் இதை தடுக்கும் நோக்கத்தோடு செயல்பட மாட்டார்கள் காரணம் இப்படிப்பட்ட அறியாமைவாதிகளால்தான் அரசியல்வாதிகளின் வாழ்வாதாரம் உயர்ந்து கொண்டே செல்கிறது காரணம் இன்று ஆள்பவர்கள்கூட நேற்று இதே பதாகைகளால் அலங்கரிக்கப்பட்டவர்களே... மேலும் இவர்களின் வாரிசுகளும் இந்நிலைக்கு வர வரிசையில் நிற்கின்றார்கள் ஆகவே இதை தடுப்பது அவசியமில்லாத வேலை மேலும் இதை தடுத்தால் பதாகைகளில் நிற்பவர்கள் ஆளுங்கட்சிக்கு எதிராக ஒரு குரல் கொடுத்தால் போதும் வாக்குகள் தடம் மாறும் என்பதை அறிந்த அறிவாளிகள் பொதுமக்களுக்கு இடையூராக இருக்கின்றது என்று நாம் யாராவது எதிர்க்குரல் கொடுக்கப் போவதும் இல்லை கொடுத்தால் ? குரல்வளை நெறிக்கப்படும் என்று அறிந்த அறிவாளிகள் நாம் ஆகவே வேண்டாமே வெட்டிவேலை என்னவொன்று சாலையில் செல்லும் யாராவது பாவப்பட்டவர்கள் வழுக்கி விழுந்து கை, கால் முறிந்தால் இருக்கவே இருக்கின்றது அரசு மருத்துவமனை நண்பர் திரு. வலிப்போக்கன் போன்ற நல்லமனம் படைத்த வழிப்போக்கர்கள் யாராவது தூக்கி கொண்டுபோய் போட்டு விடுவார்கள் பிறகு அவர் எழுந்து நடப்பது விதியின் வழி.

விஞ்ஞானம் இவ்வளவு தூரம் வளர்ந்து நிற்கின்றது எப்படி ? சிந்தனையால்தானே... ஆனால் இவர்களில் யாருக்கும் இது தவறென்ற சிந்தை மட்டும் தோன்றவேயில்லை அதுதான் காலத்தின் கோலம் இதெல்லாம் உலக அழிவை நோக்கியே செல்கிறது ஏற்கனவே விஞ்ஞானம் அதை குறி வைத்தே செல்கிறது என்பது வேறு விடயம் நம் முன்னோர்கள் கலிகாலம் என்று சொல்லிச் சென்றார்களே... இதைத்தானோ ? அதேபோல தெய்வத்துக்கு செலுத்தும் காணிக்கைகளின் செயல் முறைகள் கதி கலங்க வைக்கின்றது ஆம் சமீபத்தில் நாட்டை ஆளும் மந்திரிமார்களின் காணிக்கைகள் இருக்கும் தெய்வ நம்பிக்கையை மேலும், மேலும் குறைத்து விட்டது என்பது உண்மையே... யாரை யாரோடு இணை வைப்பது என்ற கோட்பாடே தமிழனுக்கு இல்லாமல் போய் விட்டதே அதனால்தானே குஷ்புவுக்கு கோயில் கட்டினான், நமீதாவுக்கு கூட நீதிபதி என்ற பதவி கிடைத்தது முனைவர் (Doctor) பட்டம் யாருக்கு கொடுப்பது என்ற முறையே இல்லாமல் போய் விட்டது இரண்டு திரைப்படங்களில் நீதியை நிலை நாட்டுபவனாக நடித்தால் முனைவர் பட்டம் உண்மையில் நடைமுறை வாழ்வில் செய்து காண்பிக்கும் ஐ.ஏ.எஸ். அதிகாரி சகாயம் போன்றவர்களுக்கு கொடுத்தாலும் அது நியாயம் நல்லவேளை நீதி தேவதையை கண்ணைக்கட்டி வைத்தார்கள் இல்லையெனில் என்னாகும்.

பதாகைகளுக்கு பாலாபிஷேகம் செய்யும் கூட்டத்தில் உள்ள அறிவாளிகள் துபாய், அபுதாபியிலும் உண்டு ஆனால் இந்த மாதிரியான கோமாளிகளுக்கு அங்கு வேலையில்லை சாலை ஓரங்களில் செடிகளுக்கு நீர் பாய்ச்சும் தண்ணீர்க்குழாய் எதேச்சையாக உடைந்து விட்டது எனறு வைத்துக் கொள்வோம் தண்ணீர் பெருக்கெடுத்து சாலைக்கு வந்து அதற்கான வழிகளில் ஓடி மறுநிமிடமே ஒளிந்து விடும் ஆனால் போக்குவரத்து துறை சாலையை அசிங்கப்படுத்திய குற்றத்துக்காக நகரசபை மீது வழக்கு தொடுத்து அதற்கான அபராதத்தை நீதி மன்றங்களின் வாயிலாக ஒரு வாரகால அவகாசங்களில் பெற்று விடும் இத்தனைக்கும் மூன்று துறைகளுமே அரசுதான் அதேநேரம் தனியாரின் கட்டடங்களிலிருந்து தண்ணீர் வெறியேறினால் அவர்களின் நிலை ? இதுதான் அந்நாடு இந்த இடத்தில் நான் ஆழ்ந்து சிந்திப்பது என்னவென்றால் ? அரேபியர்களைவிட இந்தியர்கள் குறிப்பாக தமிழர்கள் அறிவாளிகள்தானே ஆனால் நடைமுறையில் ஏன் ? இந்த முரண்பாடு.

நம்மூருக்காரன் அங்கு பதாகைகளுக்கு பாலாபிஷேகம் செய்வானா ? ஆனால் ஆசையிருக்கு முடியாதே... ஒருமுறை அபுதாபியில் எலக்ட்ரா சாலையில் எல்லோராடோ என்ற திரையரங்கம் உள்ளது

(அருகில்தான் நமது முன்னணி வலைப்பதிவர் ‘’மனசு’’ திரு. சே.குமார் அவர்கள் தங்கியிருக்கின்றார் அதனால்தான் அடிக்கடி திரைப்படங்கள் கண்டு விமர்சனம் எழுதுகிறார் அவரின் விரிவான விமர்சனம் படிப்பதின் மூலம் எமக்கு திரைப்படத்துக்கு செல்லும் செலவு மிச்சமாகியது)

அங்கு சில நேரங்களில் தமிழ்ப்படங்களும் ஓடும் அங்கு திரையரங்கம் கட்டடங்களில்தான் இருக்கும் நம்மூருபோல ஏக்கர் கணக்கில் இடமிருக்காது அதே கட்டடத்தின் பி. பிரிவின் முதல் தளத்தில் எனது நண்பரின் நிறுவன அலுவலகம் உள்ளது நானும் அடிக்கடி அவரை சந்திக்க போவேன் ஒருமுறை எனது சீரூந்தை திரையரங்கத்தின் முகப்பில் நிறுத்துவதற்கு இடம் கிடைக்க பொதுவாக இந்தப்பகுதியில் நிறுத்துமிடம் கிடைப்பதே அரிது நிறுத்திவிட்டு இறங்கினேன் பார்த்தால் ஒரே தமிழர்கள் கூட்டம் புதிய தமிழ்த் திரைப்படம் வெளியீடு இதுவே காரணம் அனைவரது இதயங்களிலும் கசாநாயகனின் புகைப்படம் பொருந்திய அட்டைகள் தொங்கியது சரியென நான் வழக்கம் போல போகவும் தடுத்து நிறுத்தியது ஒருகுரல்

கில்லர்ஜி சௌக்கியமா ?

நல்லாயிருக்கேன் நீ எப்படியிருக்கே ?

என்ன தலைவன் படத்துக்கா ?

எனக்கு எப்படியிருக்கும் ? உடலில் ஓடிக்கொண்டு இருக்கும் ரத்தஓட்டம் திடீரென தீப்பிடித்து ஓடியது தலைவனா ? பொதுவாக நான் தமிழனையே தலைவன் என்று சொல்ல மாட்டேன் இவன் எந்தக்காட்டான் ?

ஏண்டா நான் தினமும் வந்து போகுமிடம் இது என்னைப்பார்த்து எனக்கும் தலைவன் என்று சொல்லிட்டியடா...

கேட்டேன் நாலு கேள்வி தன் வாழ்நாளில் மரணகாலம்வரை அவன் மறக்க மாட்டான் மன்னிக்கவும் அந்த வார்த்தைகளை இங்கு தட்டச்சு செய்ய முடியாது பிறகு கோபமாக சென்ற நான் மீண்டும் சீருந்தையும், ரசிகர் கூட்டத்தையும் பார்த்தேன் வேண்டாம் பல தெரிந்த கிறுக்குப்பயல்கள் நிற்கின்றார்கள் ஒருவேளை எனது சீருந்தை அடையாளம் தெரிந்தவர்கள் நானும் திரைப்படத்துக்கு வந்து இருக்கிறேன் என்று நினைத்து விட்டால் இதைவிட அவமானம் வேறென்ன இருக்க முடியும் ? சட்டென சீருந்தை எடுத்து கட்டடத்தை விட்டு சுமார் 4580 கஜதூர அளவில் நிறுத்தி விட்டு மீண்டும் நண்பரைக் காணச் சென்றேன்.

குறிப்பு - நானும் திரைப்படம் பார்த்தவனே.. பார்க்கின்றவனே... பார்ப்பவனே... அது திரைப்படமாக இருக்கும் – கில்லர்ஜி