கனவு மெய்ப்பட்டது

  அபுதாபியிலிருக்கும் எமது நண்பர் மதுரையில் வீடு கட்டினார் நானும் கொஞ்சம் அங்கு தங்கி வேலைகளை முடிக்க வேண்டும் என்று சொல்லி இருந்தார் அதன் காரணமாக நானும் சில காலம் மதுரையில் தங்கி இருந்தேன் இதன் காரணமாகவே பதிவுகளுக்கு உடனுக்குடன் வர இயலாத சூழல் தீபாவளிக்கு முதல் வாரம் ஐந்து தினங்கள் குடும்பத்துடன் விடுமுறையில் வந்து வீடு கிரஹபிரவேசம் முடிந்து பிறகு தீபாவளியையும் புதிய வீட்டில் என்னோடு கொண்டாடி விட்டு மறுநாள் மதுரையிலிருந்து அபுதாபி பறந்து விட்டனர்.

முன்னேற்பாடான அனைத்து வேலைகளும் நான்தான் செய்ய வேண்டியது இருந்தது இதில் இரண்டு குடும்பங்களை இணைத்து வைத்த திருப்தியும் எனக்கு. ஒரு விழாவை நடத்தி முடிப்பதில் எனக்கு அபுதாபியில் ஏற்கனவே நிறைய அனுபவங்கள் உள்ளது அதன் காரணமாகவே எனது வீட்டு திருமணங்களை சிறப்பாகவே நடத்தி முடித்தேன் இறைவனுக்கு தன்யவாத்.. ஹிந்தி எதிர்ப்பாளர்கள் மன்னிக்கவும் விஷேசத்திற்கு உறவுகளை அழைக்கவில்லை அதற்குப் பதிலாக எனது ஆலோசனைப்படி மதுரை அழகர்கோவில் போகும் வழியில் உள்ள இமானுவேல் ட்ரஸ்ட்டில் இருக்கும் மனவளர்ச்சியற்ற சுமார் நூறு நபர்களுக்கு மதிய உணவளிக்க ஏற்பாடு செய்து வைத்தேன்.

நான் கொடுக்காவிட்டாலும் நண்பரை கொடுக்க வைத்த புண்ணியம் எனக்கு. இதில் அவருக்கும் உடன்பாடு இருந்ததே சிறப்பு. அங்கு சென்று அவர்களை காணும்போது மனதுக்கு திருப்தியாக இருப்பினும் மனதில் ஓரத்தில் ஈரம் கசிகிறது உண்மையே இறைவன் எம்மை இந்நிலையில் வைக்காதிருந்தமைக்கு நன்னி. மலையாள எதிர்ப்பாளர்கள் மன்னிக்கவும் பிற குடும்ப உறவுகளை இணைக்கும் பக்குவத்தை எனக்கு கொடுத்த இறைவன் எனது குடும்பத்தை சரி செய்யும் வல்லமையை எனக்கு கொடுக்க மனமில்லாமல் நசுக்கி விட்டான்.

பல வகையான வேலைகளை செய்ததில் சற்றே கண் அயர்ந்த தருணத்தில் எனது நண்பர் பட்டாசு வாங்குவதற்காக என்னை உறங்க வைத்து விட்டு காரை எடுத்துக் கொண்டு பறந்து விட்டார் சிவகாசிக்கு. நான் வாழ்வில் சிவகாசி சென்றதில்லை என்னை அழைக்காமல் சென்று விட்டதில் வருத்தமெனினும் என்னை ஓய்வெடுக்க வைத்த நண்பருக்கு தன்னிவாதம். தெலுங்கு எதிர்ப்பாளர்கள் மன்னிக்கவும் கிரஹப்பிரவேஷத்துக்கு குடும்பத்தில் எல்லோருக்கும் உடைகள் எடுக்கச் சொல்லி இருந்தார் நான்தான் தங்கைகளை அழைத்துக் கொண்டு மதுரையில் உள்ள தேனி ஆனந்தம் போனோம்.

வாயிலில் செக்யூரிட்டி எனது மகிழுந்துக்கு இடமில்லை அதோ அந்த குப்பை மேட்டில் நிறுத்தி வாருங்கள் என்றார். பரவாயில்லை என்று மகிழுந்தை எதிர்புறம் திருப்பினேன் ஏன் ஸார் ? என்றார் குப்பை மேட்டில்தான் நிறுத்த வேண்டுமென்றால் எனக்கு வியாபாரமே வேண்டாம் எத்தனையோ கடைகள் இருக்கிறது ஸார் ஒரு நிமிஷம் வாக்கிடாக்கியில் யாரிடமோ பேசிவிட்டு ஸார் உள்ளே போங்க என்றார். கார் கண்ணாடியோடு மீசையை சற்றே ஏற்றிவிட்டு உள்ளே சென்றேன் நிறுத்தக்கூடாத இடத்தில் நிறுத்திக் கொள்ளச்சொல்லி பார்த்துக் கொள்கிறோம் ஸார் என்றனர் காரணம் அடுத்த பத்தடியில் மின்தூக்கி (லிப்ட்) ஜவுளிக்கடலில் மூழ்கி உடைகளை தேர்ந்தெடுத்தோம் இதில் எனக்கும் நண்பருக்கும், ஒரேபோல் மூன்று வேட்டி-சட்டைகள் எனக்கும் உடைகள் எடுத்தமைக்கு ஒல்லது. கன்னட எதிர்ப்பாளர்கள் மன்னிக்கவும். சுமார் ஐம்பதாயிரத்துக்கும் மேல் பில் தீபாவளிக் கூட்டத்திலிருந்து நீந்தி வெளியேறினோம்.

கிரஹப்பிரவேஷம் எந்தவிதமான இடையூறும் வராமல் நிகழ்ந்ததில் மகிழ்ச்சி குழறுபடிகள் நடந்திருந்தால் அதற்கு நானும் காரணமாக இருந்திருப்பேன் ஏனெனில் இரு துருவங்களை இணைப்பது பெரிய காரியம் இரண்டு வீட்டு பெரியவர்களும் எனது சொல்லுக்கு மதிப்பளித்தமைக்கு இஸ்தூத்தி. சிங்கள எதிர்ப்பாளர்கள் மன்னிக்கவும். பிற குடும்ப உறவுகள், நட்புறவுகள் என்னை புரிந்து கொண்ட அளவு எனது ரத்த உறவுகள் புரிந்து கொள்வதில்லையே என்ற மனவருத்தம் உண்டு என்ன செய்வது ? காரணமின்றி காரியமில்லை.

இந்த நிகழ்வுக்கு சிறப்பாக உணவு தயார் செய்து கொடுத்ததோடு மதுரை புதூர் மனநலம் குன்றியவர்களின் இல்லத்தை எமக்கு அடையாளம் காட்டிய கேட்டரிங் சர்வீஸ் நடத்தும் இனியவர் நண்பர் விஜயன் அவர்களுக்கு எமது ஸுக்ரான். அரபு எதிர்ப்பாளர்கள் மன்னிக்கவும். நான் கொடுத்திருந்த ஆர்டரோடு அவரது செலவில் நூறு நபர்களுக்கும் முட்டைகள் கொடுத்த பெருமனம் படைத்தவர்.

கிரஹபிரவேஷம் நிகழ்ந்து முடிந்ததும் நானும், நண்பரும், குடும்பத்தினரோடு மதிய உணவு வழங்கிய இமானுவேல் ட்ரஸ்டுக்கு சென்று உணவு வழங்கினோம் அதன் நிறுவனர் அன்பர் திரு. பாபு அவர்களையும் சந்தித்தோம் அவருக்கு எமது தாங்க்ஸ். ஆங்கில எதிர்ப்பாளர்கள் மன்னிக்கவும்.  இனி நானும் மதுரை சென்றால் இங்கு சென்று வருவேன் பிரார்த்தனையில் அவர்கள் அல்லேலூலியா என்றனர் எதைச் சொன்னால் எமக்கென்ன ? அன்னம் தானமாகியது இதுவே எமது திண்ணமான எண்ணம்.

இந்த நிகழ்வுகளின் தொடக்கத்திற்கு பிள்ளையார் சுழி போட்டு எல்லா வகையிலும் உதவிகள் செய்து தொலைக்காட்சி பெட்டி வாங்குவதற்கு மாலுக்கு அழைத்து சென்று, பணம் மாற்றுவதற்கு புரோக்கர்களை காண்பித்து நல்ல உறவுகளை, இணைப்புகளை ஏற்படுத்திக் கொடுத்த மதுரையைச் சேர்ந்த பத்து ஆண்டுகளுக்குப் பிறகு வதனநூலின் வழியில் வந்த எமது அபுதாபி நண்பர் திரு. ஷாகுல் ஹமீது அவர்களுக்கு எமது சலாமத். தகாலன் எதிர்ப்பாளர்கள் மன்னிக்கவும். அவர்தம் குடும்பத்தினருக்கு படைத்தவன் அருள் புரிவானாக ஆமென்.

தீபாவளியன்று சின்னவனுக்கு பிறந்தநாளும் வந்தது எமது நண்பரது கனவு இனியும் மெய்ப்படல் வேண்டும் மென்மேலும் வளர்ந்து இல்லங்கள் பல கட்டி பெருவாழ்வு வாழ வாழ்த்தும் அன்பு உறவுகளுக்கும் எமது நெஞ்சார்ந்த நன்றி. தமிழ் பற்றாளர்கள் ஆதரவளிக்கவும். நண்பரது குடும்பம் வாழ்க வளமுடன் நாளும் நலமுடன் – கில்லர்ஜி தேவகோட்டை

காணொளிகள்