ஜாதிகள் உள்ளதடி டாப்பா 2

முந்தைய பகுதியை படிக்க  என்னை  சொடுக்குக..

எனது அலுவலகத்தில் நடந்த அனுபவம் ஒன்று.
 
அல்ஜாஆஃபி ஜாதியைச் சேர்ந்த துணை மேலாளர் என்னிடமிருந்து ஓய்வூதியம் அனுப்ப பெறப்பட்ட முப்பது கோப்புகளை மற்ற ஊழியர்களிடம் வேலைக்கு பிரித்து கொடுக்கின்றாள் அல்காத்ரி எட்டு, அல்ஹமாதி ஐந்து, அல்ருமேத்தி இரண்டு, மற்றவள் பதினைந்து, என்றவாறு சரி மற்றவள் யார் ?

 
அவள் பாலஸ்தீனியோ, அல்லது எஜிப்தியோ என்று தீர்மானித்துக் கொள்ளுங்கள் இதற்கு காரணமென்ன ? இந்த நாட்டுக்காரிக்கு ஒரு அமைப்பு பிழைக்க வந்த அடுத்த நாட்டுக்காரர்களுக்கு வேறு அமைப்பு சரி ஒரே நாட்டைச் சேர்ந்தவர்கள்தானே அல்காத்ரி, அல்ஹமாதி, அல்ருமேத்தி அவர்களுக்கு எதற்காக வேலை கொடுப்பதில் வித்தியாசம் அவர்களில் அல்ருமேத்தி உயர்ந்த ஜாதிக்காரி அல்லவா.
 
இங்கு படிப்பறிவின் காரணமாக வேலைகள் கொடுக்கப்பட்டாலும் ஜாதி ரீதியாக சம்பளங்கள் தீர்மானிக்கப்படுகின்றன் ஆம் அல்ருமேத்தி ஜாதிக்காரி உயர்ந்தவள், கோபக்காரி, அவளுக்கு வேலை கூடுதல் கொடுத்தால் கோப்புகளை வேலை கொடுத்த அல்ஜாஆஃபி முகத்தில் தூக்கி வீசி விட்டா(ள்)ல் ? கோப்புகள் கிழிந்து விடுமே... ஆகவேதான் அவளுக்கு இரண்டு கோப்புகள் இதுவே கூடுதல் அல்லவோ...
 
இதில் மற்றொரு வேடிக்கை தெரியுமா ?
எட்டு கோப்புகள் பெற்ற அல்காத்ரி சீக்கிரம் வேலையை முடித்து கோப்புகளை என்னிடம் சேர்த்து விடுவாள். ஆனால் இரண்டு கோப்புகள் பெற்ற அல்ருமேத்தி எப்பொழுது வேலையை முடிப்பாள் என்பது அபுதாபியை ஆளும் அகிலாண்டேஷ்வரிக்கே வெளிச்சம்.
 
நான் பலமுறை வேண்டுமென்றே கேட்பேன் அல்காத்ரி ஜாதிக்காரியிடம்.
அவளுக்கு மட்டும் கொஞ்சம் உனக்கு அதிகம் ஏன் ?
 
அவள் அல்ருமேத்தி உயர்ந்தவள் வில்லங்கமானவள்.
(ஊவா கபீர் அல்ருமேத்தி முஷ்கில்)
 
இத்தனைக்கும் அவளைவிட இவளுக்கு சம்பளமும் குறைவுதான் அதேநேரம் அனைவருமே அழகில் ஒருவருக்கொருவர் தாழ்ந்தவர்கள் அல்ல ! ரதிகளே எல்லாம் சரி பாலஸ்தீனி, எஜிப்தி, சூடானி இவர்களுக்கே இத்தனை கோப்புகள் என்றால் பிழைக்கப்போன இந்தியன் கில்லர்ஜிக்கு எத்தனை கோப்புகள் என்பதுதானே உங்களது கேள்வி ?
 
மொத்த கோப்புகள் 1 ½  லட்சமும் என்னிடம்தானே உள்ளது கணினியில் கேட்காமலே எந்தக்கோப்பு எவ(ளி)னிடம் என்பதை எனது மூளையின் மூலையில் இருக்கும் கணினி நொடியில் சொல்லி விடும் இப்படித்தானே இவங்களோடு பதினேழு வருசமாக குப்பை கொகூட்டினேன்.
 
திருமணங்களும் அங்கு ஜாதியை வைத்தே தீர்மானிக்கப்படுகின்றன அதேநேரம் பிறநாட்டு பெண்களை அரேபியர்கள் திருமணம் செய்து கொள்கின்றார்களே... எப்படி ? அது வேறுவகை அந்த வகையை மற்றொரு பதிவில் பிறகு காண்போம்.
 
அதாவது காதலுக்கு கண் இல்லை என்று நமது முன்னோர்கள் சொல்லி வைத்த வசனத்தை நம்பிய நம்மவர்கள் கண்டதும் காதல் என்று காதல் கொண்டு, பிறகு இவர்கள், அவர்களை கொன்று விடுவது நடந்து கொண்டுதானே இருக்கின்றது இருப்பினும் இவனை மதமோ, ஜாதியோ, கலாச்சாரங்களோ, ஏற்றத்தாழ்வுகளோ கட்டுப்படுத்துவதில்லை ஆகவே இவைகள் தொடர்கின்றன இல்லையா ?
 
இதேபோல்தான் அங்கும் என்னவொன்று இங்கு காதலால் மோதலாகி உயிர் அழிவுகள் உண்டு, அங்கு காதல்கள் குறைவு திருமணங்கள் கூடுதல் உயிர் அழிவுகள் இல்லை.
 
பெரும்பாலும் மேற்கண்ட ஜாதியைப் பற்றிய இந்த விடயம் பல வருடம் அரபு நாட்டில் வேலை செய்தவர்களுக்கு தெரிவதில்லை. தெரிந்த ஒரு பிரிவினரும் இதை ஏற்பதற்கு சம்மதிப்பதில்லை வேறு சில காரணத்திற்காக மேலும் இந்த ஜாதிப்பிரிவை அது ஜாதியில்லை குடும்பபெயர் என்றும் ஆங்கிலத்தில் Family Name என்றும் சில விபரமானவர்கள் விவரிப்பார்கள் அந்தக் காரணங்கள் வேண்டாமே...
 
அப்படி சம்மதிக்காதவர்களிடம் ஒருயொரு கேள்வி
உமது விருப்பம் அல்நஹ்யான் ஜாதியிலிருந்து... அல்ஜாஆஃபிக்கோ, அல்லது அல்காத்ரி ஜாதியிலிருந்து... அல்ஹமாதிக்கோ, அல்லது அல்முல்லா ஜாதியிலிருந்து... அல்நஹ்யானுக்கோ, இங்கிருந்து அங்கிட்டோ, அங்கிருந்து எங்கிட்டோ திருமணம் செய்து கொள்ளச் சொல்லுங்கள் பார்க்கலாம் ?
 
குறிப்பு - நட்பூக்களே... இவையெல்லாம் எனக்கு தெரிந்த விடயமெனினும் பதிவு எழுத தோன்றிய காரணத்தால் நான் இந்தியாவுக்கு நிரந்தரமாக வரும் கடைசி தருணத்தில் ஆதாரப்பூர்வமாக பல ஆண்களிடமும், பெண்களிடமும் கலந்து பேசி விபரமறிந்து வந்தேன் – கில்லர்ஜி

 

Chivas Regal சிவசம்போ-
நாமெல்லாம் நூல் விட முடியாதோ....
 
சிவாதாமஸ்அலி-
ஏன் விட்டுத்தான் பாரேன்...