அரசியல் உத்தமர்கள்

கோயிலுக்கு சென்று அர்ச்சனை செய்து உடைத்த தேங்காயை கொண்டு சட்னி வைக்கும் மக்கள், அதே தேங்காயை சிதறுகாய் உடைத்தால் எடுத்து வருவது தவறு என்ற கட்டமைப்பை அமைத்தது சுகாதார நலன் கருதியா ?

அப்படியானால், தரையில் போட்டு சாப்பிடும் மண்சோற்றில் சுகாதாரத்தை மறந்தது ஏன் ?

* * * * * * * 01 * * * *

 

இறைவன் நமக்கு நல்லதையே செய்வார் என்ற நம்பிக்கையில் இறைவனிடம் கையேந்தி வணங்குவது சரிதானே ?

அப்படியானால், இறைவனிடமே போய் அவர்களது குடும்பத்தை நாசமாக்கி விடு என்று கோரிக்கை வைப்பது எந்த வகையில் நியாயம் ?

* * * * * * * 02 * * * *

 

ஏழையின் சிரிப்பில் இறைவனைக் காண்போம் என்று நமது முன்னோர்கள் சொல்லி வைத்தது நியாயம்தானா ?

அப்படியானால், கோயிலுக்கு செல்லும் மனிதர்கள் அனைவரும் வாசலில் தர்மம் கேட்பவருக்கு உதவாமல் பணம் அவசியமற்ற தெய்வத்துக்கு உண்டியலில் காணிக்கை செலுத்துவது சரியா ?

* * * * * * * 03 * * * *

 

கடவுள்களில் பணக்கார தெய்வம், ஏழை தெய்வம் என்ற நிலைப்பாடு உள்ளது என்று முன்னோர்கள் நமக்கு சொன்னார்களா ?

அப்படியானால், திருப்பதி உண்டியலில் கட்டுக்கட்டாக பணம் போடுவதும், அரசமரத்தடி தெய்வத்துக்கு ஐம்பது பைசா போடுவதும் ஏன் ?

* * * * * * * 04 * * * *

 

கல்லிலான கடவுளுக்கு பாலாபிஷேகம் எதற்கு என்று கேட்ட நாத்திகர்கள் கடவுள் நம்மை தண்டிக்க மாட்டார் என்ற நம்பிக்கையா ?

அப்படியானால், திரைப்படக் கூத்தாடன்களின் பதாகைகளுக்கு பாலாபிஷேகம் எதற்கு என்று கேட்காதது ரசிகர்கள் அடிப்பார்கள் என்ற பயத்திலா ?

* * * * * * * 05 * * * *

 

கண்ணகி உண்மையான கற்புக்கரசி என்று நமக்கு போதித்ததை நாம் ஏற்று நடந்தது நமது முன்னோர்களுக்காகத்தானே ?

அப்படியானால், கூத்தாடி குஷ்பு திருமணத்துக்கு முன்பு எப்படியும் வாழலாம் என்று சொன்னதை கண்டிக்காமல் விட்டு வைத்திருப்பது ஏன் ?

* * * * * * * 06 * * * *

 

பண்டைய காலத்து பெண்கள் முதியோர்களை மதித்து நடந்து, கணவனே கண் கண்ட தெய்வம் என்று வாழ்ந்தது உண்மைதானா ?

அப்படியானால், இன்றைய நவீனகால பெண்கள் தவறு செய்யும் கணவனை கண்டந்துண்டமாக வெட்டுவது ஏன் ?

* * * * * * * 07 * * * *

 

தமிழர்கள் நன்றியுள்ளவர்கள் என்று நம்மைநாமே பறைசாற்றிக் கொள்வது முறையானதுதானா ?

அப்படியானால், தனது செல்வங்களை எல்லாம் நாட்டு மக்களுக்காக இறைத்து சுதந்திரத்துக்காக தன்னை சிறையில் கிடத்தி வாழ்ந்து இறந்து போன வ.உ.சிதம்பரனாரின் பெயரன் இறந்தபோது ஊர் மக்கள் பத்து நபர்கள் மட்டுமே கலந்து கொண்டதுதான் நன்றியுணர்வா ?

* * * * * * * 08 * * * *

 

காமராஜர் நல்லவர், உண்மையானவர், நேர்மையானவர் என்றும், இன்றைய கட்சிகள் அனைத்தும் காமராஜர் ஆட்சி தருவேன் என்று சொல்வதை கண்டிக்காதது முறையா ?

அப்படியானால், காமராஜரை தேர்தலில் தோற்கடித்த மக்கள் நன்றி கெட்டவர்களா ?

* * * * * * * 09 * * * *

 

காவல்துறை மந்திரியாக இருந்தும் தனது இறுதிக்காலத்தில் அரசு மருத்துவமனையில் தரையில் கிடந்த அமைச்சர் திரு.கக்கன் நல்லவரா ?

அப்படியானால், அவரது வாரிசுகளை கண்டு கொள்ளாமல் இந்த அரசு மறந்து போனதை கண்டிக்காத மக்கள் நன்றி கெட்டவர்களா ?

* * * * * * * 10 * * * *

 

மகாத்மா என்று போற்றப்படும் மோகன்தாஸ் கரம்சந்த் காந்தி இந்த நாட்டுக்காக உயிர் நீத்தது உண்மையா ?

அப்படியானால், அவரது பெயரனை நாடாளுமன்ற தேர்தலில் தோற்கடித்த மக்கள் நன்றியுள்ளவர்கள் இல்லையா ?

* * * * * * * 11 * * * *

 

அரசியல்வாதிகள் எவருமே உத்தமர்கள் இல்லை, கொள்ளைக்காரர்கள் என்று சொல்வது உண்மையா ?

அப்படியானால், அவர்களிடம் பணம் வாங்கி கொண்டு வாக்களிக்கும் மக்கள் அனைவரும் உத்தமபுத்திரர்களா ?

* * * * * * * 12 * * * *

 

கில்லர்ஜி தேவகோட்டை

 

காணொளி

Share this post with your FRIENDS…