இலவச இணையம்

 

நட்பூக்களே... குறுகிய காலத்தில் அரசியல்வாதிகள் பெரும் செல்வந்தர் ஆகின்றார்கள், திரைப்படக் கூத்தாடன்கள் செல்வந்தர் ஆகின்றார்கள், மட்டைப்பந்து அடிப்பவர்கள் செல்வந்தர் ஆகின்றார்கள். இதனுள் ஏதும் தவறான சூட்சுமம் இருக்கிறதோ, இல்லையோ ஆனால் நரம்பில்லாத நாக்கு சட்டென இவர்கள் மீது குற்றம் சுமத்தி விடுகின்றனர்.
 
ஆனால் பெருங்கொண்ட தொழில் அதிபர்கள் செல்வந்தர் ஆனால் அதில் உழைப்பு இருக்கிறது ஆகவே இது நேர்மையின் வழி என்று சொல்கின்றனர். பெரும்பாலானவர்கள் தொழிலாளர்களின் குருதியை உறிஞ்சுகிறார்கள் என்பதும் மறுக்க இயலாத உண்மையே... நாம் அறிந்த வரையில் தொழில் அதிபர் திரு.ரத்தன் டாடா அவர்கள் தொழிலாளர்களின் பிள்ளைகளை படிக்க வைப்பது, மருத்துவ செலவுகளை பார்த்துக் கொள்வது என்று எல்லாமே நிறுவனத்தில் உள்ள சட்டப்படி பார்த்துக் கொள்வதாக அறிகிறோம்.
 
அதேபோல திரு.பிர்லா அவர்களையும் அறிகிறோம். அதேநேரம் அதானி போன்ற தொழில் அதிபர்கள் வங்கிகளில் கடன் வாங்கி கொண்டு சாதாரணமாக நாடு விட்டு நாடு போய் வாழ்வதையும் அறிகிறோம். பிறகு இந்த செலவுகளின் நஷ்டம் பாமர மக்களின் தலையில் வரிகளாகவும், ஜி.எஸ்.டி. என்ற பெயரிலும் விழுகிறது.
 
திரு.அம்பானி அவர்களைப்பற்றி சற்றே அலசுவோம். மிகப்பெரும் செல்வந்தர் மாற்றுக்கருத்து இல்லை. மும்பையிலுள்ள இவரது அண்டிலியா வீட்டில் வேலை செய்பவர்கள் மட்டும் சுமார் எழுநூறு நபர்களாம். இருக்கட்டும் வாழ்க வளமுடன். இவர் ஜியோ ஸிம் கார்டு இறக்கினார். தொடக்கத்தில் இலவசமாக இணையம் வழங்கினார். தொடர்ந்து ஆறு மாதங்களுக்கு மேலாக வேண்டாம் என்று சொல்லாதோர் யாருமில்லை என்று நினைக்க வேண்டாம் நான் வேண்டாம் என்று கடைசி வரையில் இருந்தேன்.

 

திடீரென்று இலவசத்தை நிறுத்தினார் மாதம் நூறு ரூபாய் என்று அறிவித்தார், சிரங்கு சொறிந்த கையும், மீசை முறுக்கிய விரலும் சும்மா இருக்குமா ? வேறு வழியின்றி வாங்கத் தொடங்கினோம், பிறகு இருநூறு, முன்நூறு, இன்று எண்ணூறு ரூபாயில் வந்து நிற்கிறது. ஆனால் நமது கை நிற்பதில்லை இனி தொடர்ந்து நாளை இரண்டாயிரம் ரூபாயாகும் அன்றும் உணவருந்துவதை குறைத்துக் கொண்டு இணையம் வாங்கி மகிழ்வோம்.
 
தொலைக்காட்சிப்பெட்டி வந்தது உறவுகளிடம் பேசுவது குறைந்தது, இன்று அலைபேசியில் நள்ளிரவில் இணையத்தோடு இணைந்து கவிழ்ந்து கிடக்கின்றோம். வந்து நிற்கும் உறவினரை வாங்க என்று சொல்லக்கூட மறந்து விடுகிறோம். இன்று இளைய சமூகத்தினர் இரவு முழுவதும் இணையத்தில்தான் வாழ்கிறோம், உறக்கம் குறைந்து விட்டது. விழிகளில் பல குறைபாடுகள் எங்கெங்கும் கண் மருத்துவமனைகள் பெருகி விட்டது. அறுவை சிகிச்சைகள், சிறுவர்கள் முதலே கண்ணாடி அணிதல், குழந்தைகளுக்கு உணவு ஊட்டுவதற்கே அலைபேசியின் யூட்டியூபின் உதவி தேவை என்ற நிலையில் வாழ்கிறோம்.
 
இன்று இந்நிலையில் தமிழ்நாட்டு மக்கள் மட்டுமல்ல, இந்திய மக்களின் வாழ்வாதாரத்தை மாற்றியமைத்தவர் திரு.அம்பானி அவர்கள்தான். எல்லாம் பணம் சம்பாதிக்கத்தானே... ஒரு சில குடும்பங்களின் ராஜபோக வாழ்க்கைக்கு நாட்டு மக்களின் வாழ்வே மாறிவிட்டது. இதை தொடக்கத்திலேயே இலவச இணையம் கொடுக்கும்போது அரசாள்பவர்கள் தடுத்து இருந்தால் ? இந்த இழிநிலை வந்து இருக்குமா ?
 
அரசு எப்படி செய்யும் ? அவர்களே தொலைக்காட்சி பெட்டி இலவசமாக கொடுத்து அதனுள்ளும் கமிஷன் அடித்து நம்மை அடிமைக் குழிகளில் தள்ளி விட்டார்கள். சிந்திக்காத மக்கள் வாழும் வரையில் இந்த பாழும் கிணற்றில்தான் கிடக்க வேண்டும்.
 
கில்லர்ஜி அபுதாபி

 

சிவாதாமஸ்அலி-
ப்ரீயாக கிடைத்தால் நாம் பினாயிலைக்கூட குடிப்போமே...
 
Chivas Regal சிவசம்போ-
ப்ரீயா குவாட்டர் கிடைக்குமா ?
 

காணொளி

Share this post with your FRIENDS…