கோவில் அல்ல கோயில்

நம்மை படைத்தது இறைவன் என்பதில் பலருக்கும் ஐயமில்லை. என்னவொன்று தனி மனிதனின் தலைமை ஆசையால் மனங்கள் பிளக்கப்பட்டு, மதங்களாக பிரிக்கப்பட்டு கடவுள்களையும் படைத்து விட்டோம். தொடக்கத்தில் நம்மை படைத்தது இறைவன், என்ற வார்த்தை மாறி மனிதன் கடவுளை படைத்தான் என்ற நிலைக்கு வந்து விட்டோம்.
 
பண்டைய காலத்தில் அரசர்கள்தான் கோயில்களை கட்டி எழுப்பினர் இதற்கு மக்களும் பிரதி பலனை எதிர்பாராது உழைத்தனர். காரணம் நாம் அனைவரும் ஒரு தாய் பிள்ளை என்ற உணர்வு. இன்று கோயிலில் வேலை செய்யும் கொத்தனார், சித்தாள்களுக்கு ஐம்பது ரூபாய் குறைவாக சம்பளம் கொடுத்து பாருங்கள் ? கோயிலுக்குதானே என்று போய் விடுவார்களா ?
 
நீர் எப்படி ? என்று என்னை கேட்க வேண்டாம் எனக்கு கொத்தனார் வேலை தெரியாது. கோயில்கள் எல்லா இடங்களிலும் கட்டுவதற்கு உகந்தது அல்ல அதற்கென்று சாஸ்த்திர சம்பிரதாயங்கள் உண்டு. இன்று சில மனிதர்கள் சம்பாத்தியத்துக்கு வழி வகுக்கும் விடயமாக போய் விட்டது. மதுரை மாநகரில் எங்கு பார்த்தாலும் தெருவின் முனையில் கோயில் அந்த தெருவே எட்டு அடி அகலமே இருக்கும். ஒரு ஆட்டோ போனால் எதிர்புறம் மறு ஆட்டோ வரமுடியாது. இந்த நிலையில் கோயில்கள்.
 
அந்த கோயிலின் வாயிற்படியும் சில வீடுகளின் வாயிற்படியும் ஒன்றாக இருக்கும். கோயில் என்பது சுத்தமாக இருக்க வேண்டிய இடம் ஆனால் வீடு அப்படி இல்லையே... இந்நிலையில் அந்த வீட்டு பெண்களுக்கு இடையூறாக இருக்காதா ? இதை தெரு மக்கள் அனைவரும் உணர்தல் வேண்டும். இந்த இடத்தில் நான் சட்டக்கல்லூரியில் படித்த ஓர் பொன்மொழி நினைவில் நிழலாடுகிறது.

 

உன் வலியை உணர்ந்தால்... நீ உயிரோடு இருக்கிறாய் என்று அர்த்தம்,
பிறர் வலியை உணர்ந்தால்... நீ மனிதனாக இருக்கிறாய் என்று அர்த்தம்.
 
சரி அதுவாவது தெருவில் இருக்கின்றது இருக்கட்டும் பெரும்பாலான இடங்களில் சாக்கடையோரம் இருக்கிறது இதை புகைப்படங்களோடு நான் சொல்ல முடியும் வேண்டாமே... இது முறையா ? இந்த இடத்தில் இறைவன் வந்து கட்டச் சொல்லவில்லையே... ? அசுத்தமான இடத்தில் பல கோயில்களை பார்த்து விட்டேன். கோயில் என்பது புனிதமான இடம்தானே ? அங்கு கொடுக்கும் பிரசாதங்களை அந்த இடத்திலேயே நின்று உண்கின்றார்கள். நான் இவைகளை எல்லாம் பார்த்து தான் வருகிறேன்.
 
கோயிலை சுற்றி ஆடு, மாடுகள், அதன் கழிவுகள் இதனோடு மனித கழிவுகளும். இந்த வகை கோயில்களை கட்டத் தொடங்கும்போதே மக்கள் தடுத்து இருக்க வேண்டும். ஆனால் அது பாவச்செயல் என்று ஒதுங்கி போய் விடுவார்கள். புறம்போக்கு இடத்தில் கட்டிய பிறகு இதற்கு மின்சார வாரியமும் மின் இணைப்பு கொடுக்கிறது ? இதற்கு மின்சார வாரிய விதி முறைகளில் விலக்கு இருக்கிறதா ?
 
பிறகு திடீரென்று சாலை அகலப்படுத்துகின்றோம் என்று இடிக்கும் இயந்திர வண்டிகளோடு வந்து நிற்பார்கள். அன்று மக்களும் இதற்கு போராடுவார்கள். இந்த முறைகேடான தவறுகளுக்கு அடிப்படை காரணவாதிகளான... மாநகராட்சி அதிகாரிகளை முதலில் கைது செய்ய வேண்டும். அவர் இல்லை அவர் ஓய்வு பெற்று விட்டார், இறந்து விட்டார் என்றாலும்கூட அவர்களது சொத்துகளை பறிமுதல் செய்ய வேண்டும். இப்படி செய்தால் இருக்கும் அதிகாரிகள் முறையாக வேலை செய்வார்கள்.
 
எத்தனையோ பழைய கோயில்கள் சிதிலமடைந்து கிடக்கிறதே அதில் தெய்வம் இல்லையா ? அங்கு சக்திதான் இல்லையா ? இங்கு சாக்கடையில் நின்றுதான் வணங்க வேண்டுமா ? மக்களிடம் நியாயமான செயல்பாடுகள் இல்லை ஆகவேதான் மருத்துவமனைகள் பெறுகி வருகிறது. மக்கள் மருத்துவமனைக்கு செல்வதே இறைவன் நமக்கு மறைமுகமாக கொடுக்கும் தண்டனைதான். சாதாரண கோயிலுக்கு போனால் உண்டியலில் சில்லரைகளை இடுவதும், திருப்பதி கோயிலுக்கு போனால் கட்டுக்கட்டாக பணத்தை கொட்டி பெட்டி, பெட்டியாக திருப்பி கேட்பது தவறில்லையா ?

 

ஓரிடத்தில் பிள்ளையார் கோயில் பின்புறம் சாக்கடை, பக்கத்தில் மின்சார டிரான்ஸ்பார்மர் திடீரென்று அங்கு அசம்பாவிதம் நிகழ்ந்தால் உயிருக்கு உத்திரவாதம் யார் தருவது ?  . அரசை குற்றம் சொல்லும் முன்பு அதற்கான காரணத்தை ஆராய்வதுதான் நல்ல செயல். இதோ திருப்பதி கோயிலில் நடந்த அநியாயத்தை நடந்த போலி தரிசன சீட்டு இந்த கோயில் ஊழியர்களுக்கு திருப்பதி வெங்கடாசலபதி மீதி பயம் இல்லைதானே... கேட்டால் அரசன் அன்று கொல்வான் தெய்வம் நின்று கொல்லும் என்று பழங்கதை சொல்லக் கூடாது. எல்லா மதத்து மனிதர்களுக்கும் பக்தி அவசியம்தான் ஆனால் அது உண்மையாக இருக்க வேண்டும் என்பதே எமது எண்ணங்களும், ஆசைகளும்...
 
குறிப்பு – கோவில் என்று சொல்வது தவறல்லதான் ஆனால் கோயில் என்று சொல்வதே முறையானது. கோவில் என்பது வழக்குச் சொல்லானது
 
கில்லர்ஜி அபுதாபி