நீ நடிகனே அல்ல !

 

வணக்கம் தமிழக மக்களுக்கு அதாவது ரசிகர்களுக்கு ரசனை இருக்கிறதா ? காரணம் நமக்கு நன்றாகவே தெரிகிறது, இந்தப்படத்தில் இதன் நாயகன் மிகவும் கஷ்டப்பட்டு நடித்து இருக்கிறார், சமூகத்துக்கு பழைய வரலாற்றை சரியாகவோ, புதுப்பித்தோ, மாற்றுக்கருத்தை வலியுருத்தியோ எடுத்து தருகிறார். இருப்பினும் நாம் அந்த மாதிரியாக திரைப்படங்களை பார்த்து வெற்றியடைய வைக்காமல் இருக்கிறோமே... இது தவறு என்பது விளங்கவில்லையா ?
 
காரணம் ஒரு சிலரின் படங்களில் கதையே இல்லை, ஏதோ வந்து நான்கு சண்டைகளும், இரண்டு அர்த்தமற்ற காதில் நுழையாத டப்பாங்குத்து பாடல்களும் இருக்கிறது அந்த படங்களுக்கு மிகப்பெரிய வெற்றியை மக்கள் தருகின்றார்கள். நான் ஒன்றும் கமல்ஹாசனின், ரசிகனோ, அல்லது அவரது நண்பர் திரு.நெல்லைத்தமிழன் அவர்கள் மூலமாக ஏதாவது கையூட்டு கிடைக்கும் என்ற காரணத்திற்காகவோ இப்பதிவு எழுதவில்லை.
 
முன்பு ஒரு காலத்திலே... கமல்ஹாசன் நடித்த இந்தியன் திரைப்படம் ஆஸ்கார் பரிந்துரைக்கு சென்றது. படமும் குழுவினரால் தேர்வும் ஆனது ஆனாலும் ஒரேயொரு காட்சி அவர்களின் கண்ணை உறுத்தியது. இது சட்டப்படி குற்றம் என்று தீர்மானமாகியது. அது ‘’பச்சைக்கிளிகள் தோளோடு’’ என்ற பாடலில் இடம் பெறும் காட்சி அதாவது தந்தையான கமல் தனது மகள் மழை நீரில் கப்பல் செய்து விளையாட வேண்டும் என்று கேட்கும் பொழுது காகிதம் இல்லாத காரணத்தால்... தனது சட்டைப்பையிலிருந்து நூறு ரூபாய்த்தாளில் கப்பல் செய்து கொடுத்து விளையாட விடுகிறார்.
 
இது நூறு ரூபாய்த்தாளைவிட தனது மகளின் சந்தோஷமே முக்கியம் என்ற ஒரு தந்தையின் உயர்ந்த உள்ளத்தை வெளிப்படுத்துகிறது. இயக்குனரும் இதே எண்ணத்தில்தான் இக்காட்சியை அமைத்து இருந்திருப்பார். ஆனால் என்ன ஆனது ? இந்திய ரூபாயை இழிவு படுத்தும் செயலாக இக்காட்சியை கருதி படத்தை விருதிலிருந்து நிராகரித்தது குழு. இப்படியொரு நிகழ்வு வருமென்று நினைத்து இருப்பார்களா ? அதற்காக கமல்ஹாசன் சிறந்த நடிகர் இல்லை என்றாகி விடாது.
 
இதற்கு முன்பு ஒரு காலத்திலே... இந்தியப் புகழ் பெற்ற வங்க தேசத்து இயக்குனர் திரு.சத்யஜித்ரேய் கமல்ஹாசனை வைத்து ஓர் திரைப்படத்தில் நடிக்க தீர்மானமானது. அந்த கதாபாத்திரத்துக்கு கமல்ஹாசனை மொட்டை அடித்து குடுமி வைக்கச் சொன்னார் திரு.சத்யஜித்ரேய் இதற்கு கமல்ஹாசன் சம்மதிக்கவில்லை. நீ நடிகனே அல்ல போ என்று சொல்லி விட்டார் இயக்குனர். பின்னாளில் இதற்காக மிகவும் வருந்தினார் கமல்ஹாசன்.
 
இன்று அவர் இல்லை, ஒருக்கால் அவரது இயக்கத்தில் நடித்து இருந்தால் கமல்ஹாசனுக்கு ஆஸ்கார் விருது கிடைத்து இருந்திருக்கலாம். சிலருக்கு சில நியாயங்கள் காலம் கடந்தே தெளிவு பெறுகிறது. பலருக்கு அநியாயங்கள் காலத்தே நலமாக தெரிகிறது.
 
கில்லர்ஜி அபுதாபி