ஆறு மனமே ஆறு

எதை, எதையோ சாதிக்கணும்னு

நினைத்த நான், எதையாவது
சாதிப்போம்னு இறங்கி வந்து
எதையுமே சாதிக்க முடியாதுனு
தெரிந்தபோது எதுவுமே நம்
கையில் இல்லை என்பதை
தெரிந்து கொண்டதே எனக்கு
இறைவன் தந்த அனுபவப்பாடம்.
* * * * * * * * * * 01 * * * * * * * * * *
 
பலருக்கும் உணவாக வாழ்கிறோம்
என்று பெருமையாக நினைத்த
எனக்கு பலரும் நம்மை ஊறுகாயாக
பயன்படுத்தியதை அறிந்து கொண்டது
மனதுக்கு வலியை கொடுத்தாலும்
உணவாய் வாழ்ந்ததே உண்மை
என்பது உணர்ந்து கொண்ட,
உண்மையான உண்மை.
* * * * * * * * * * 02 * * * * * * * * * *
 
உண்டாக்கிய பணம் இறுதிவரை
காக்கும் என்று நம்பிய எனக்கு
உண்டாக்கியதை உறுதியாக்க
தெரியவில்லை என்பது நான்
உண்டாக்கியது உதிர்ந்து போன
பிறகே உறுதியாக தெரிந்தது
உழைக்க தெரிந்த எனக்கு உறுதி
செய்ய தெரியவில்லை என்பது.
* * * * * * * * * * 03 * * * * * * * * * *
 
பாசம் வைத்த உறவுகள் எல்லாம்
வேசம் தரித்து உரித்தவர்கள்
என்பது, பாசம் வழுக்கவும்
செய்யுமென்று பாடம் படித்து
கொடுத்த பிறகும், பாசம்
வைக்கும் பாசக்கார என் மனது
பைத்தியக்காரத்தனம் என்று
தன்னைத்தானே சொல்கிறது.
* * * * * * * * * * 04 * * * * * * * * * *
 
வாழ்வதற்கு வாய்ப்பு தேடி
அலைபவர்களுக்கு மத்தியில்
அற்புதமான வாழ்வை ஆண்டவன்
கொடுத்திருந்ததை அறியாத
மடந்தையாய் வாழ்ந்திருக்கிறோம்
என்பது அனைத்தும் இழந்த பிறகே
கண் போன பின் சூரிய நமஸ்காரம்
செய்கிறோம் என்பது புரிந்தது.
* * * * * * * * * * 05 * * * * * * * * * *
 
பேசத் தெரிந்த நாம் பேச்சாளர்தான்
என்று பெருமைப்பட்டு வாழ்ந்து
கொண்டு காலம் கடந்த பிறகே
பேச்சை கேட்டவர்கள் எல்லாம்
கேட்பது போல் காலம் கடத்தி
லாபம் பெற்றவர்கள் சைகை
காட்டிய பிறகே புரிந்தது நாம்
பேசியது செவிடர்களிடம் என்று.
* * * * * * * * * * 06 * * * * * * * * * *
 
கில்லர்ஜி அபுதாபி
 
Chivas Regal சிவசம்போ-
செவிடன் செவிலியப்பன் ஊமையன் ஊமைத்துரையிடம் பேசியதை குருடன் குருநாதன் பார்த்து சொன்னது போல இருக்குது கதை.

 

காணொளி