ஆத்தூர், ஆதார் ஆராயி

 

ஆதார் அட்டையில் நமது புகைப்படத்தை நாமே அடையாளம் காண முடியாத வகையில் அச்சடிப்பது நமது நாட்டின் சிறப்பு. அதையும் நாம் ஏற்றுக் கொண்டோம். வேறு வழியில்லை என்பதால், பெட்ரோல் விலை, கேஸ் விலை ஏறுகிறது என்ன செய்தோம் ? ஒரு ஆணியும் புடுங்கவில்லை. காரணம் நமக்கு புடுங்கத் தெரியாது. ஆனால் வாங்கத் தெரியும்.
 
சரி புகைப்படம்தான் இப்படி இருக்கிறது அகவையைக் கூடவா மாற்றி அடிப்பார்கள் ? அதுவும் நம்பவே முடியாத வகையில் 123 என்று இதனால் 41 அகவையுள்ள ஒரு பெண்மணி ஆதார் இருந்தும், எந்த வகையிலும் பயன் படாத முறையில் பாதிப்புக்கு உள்ளாகி இருக்கிறார். இப்படி வேலையில் கவனமின்மையாக செயல்படுவதின் அடிப்படை காரணம். ஆளும் அரசுகளின் கட்டமைப்பு இல்லாத நிர்வாகம்.
 
காரணம் மேலிடத்திலிருந்து கடைநிலை ஊழியர்கள் வரையில் இந்த மெத்தப் போக்குத்தனம் இருக்கிறது. தவறுகளுக்கு சரியான தண்டனை கொடுக்காதது. இருந்தாலும் அதனையும் மூடி மறைத்து சரி செய்து விடும். அயோக்கியத்தனம். சமீபத்தில் இடைத்தேர்தல் முடிந்தது அடுத்த இரண்டு தினங்களில் கேஸ் விலை சிலிண்டருக்கு 50 ரூபாய் உயர்வு. ஏன் முதல் வாரமே செய்யவில்லை ? இந்த மக்கள் எதையும் கேட்க வக்கு இல்லாதவர்கள் காரணம் வாக்கு அளிக்க பணம் பெறுவதால் அதன் கடன் முடிந்து விடுகிறது.
 
இது மத்திய அரசு, தேர்தல் மாநில அரசு என்று சொல்ல வேண்டாம் எல்லா அரசியல் கட்சிகளுமே நிழலில் ஓர் கூட்டும், நிஜத்தில் ஓர் கூட்டும் உள்ளவர்கள். இடத்திற்கு தகுந்தாற்போல் பேச்சு மாறும். காலம் முழுவதும் நாம் அரசியல்வாதிகளை குறை சொல்லியே நமது தவறுகளை மறந்து விடுகிறோம். நாம் செய்த தவறே அவர்களை குற்றம் செய்ய வைக்கும் அதிகாரத்தை கொடுக்கிறது என்பதை அறியா மடந்தைகளாக வாழ்கிறோம்.
 
வாக்களிப்பதற்கு பணம் வாங்குவது வேசித்தனமான செயல் என்பதை ஒவ்வொரு ஆண்-பெண் வாக்காளர்களும் உணர வேண்டும். இன்றாவது உணர்ந்து நமது பிள்ளைகளுக்கும் இந்த உண்மையை உணர வைப்போம். அவர்களும் நேர்மையாக வாக்களிப்பாளர்கள். அன்று நேர்மையானவர்களும் தேர்தலில் நிற்பார்கள். காரணம் அரசியல்வாதிகள் வானிலிருந்து குதித்து வந்தவர்கள் அல்ல நமது பிள்ளைகளோடு, பிள்ளைகளாக வளர்ந்தவர்களே...
 
அரபு நாட்டில் அரசு ஊழியர்கள் பொது மக்களுக்கு பயந்து வேலை செய்வார்கள். நான் அனுபவித்த உண்மை. இங்கு மக்கள் அரசு ஊழியர்களுக்கு பயந்து வாழவேண்டிய நிலையை வைத்து இருக்கிறோம். அவர்களுக்கு வாக்குரிமை கிடையாது. ஆனால் நமக்கு வாக்குரிமை உண்டு. வாக்கின் தன்மை உணராத நமக்கு வாக்கு எதற்கு ? இப்பொழுதே மன்னராட்சி போல நடக்கிறது. இன்றே சிந்திப்போம் நாளை நமது சந்ததிகளுக்காகவாவது...
 
கில்லர்ஜி அபுதாபி
 
Chivas Regal சிவசம்போ-
வயசு அடிக்கும்போது ஒன், ட்டூ, த்ரீ-னு அடிச்சுருப்பான்.