சாகாக்கலை

நரை திரை மாற்றிடும் வித்தை

உள்ளத்தின் உள்ளே உள பல தீர்த்தங்கள்

மெல்ல குடைந்துநின் நாடார் வினைகெடப்

பள்ளமும் மேடு்ம் பரந்து திரிவரே

கள்ள மனமுடைக் கல்வி யிலோரே-

உடம்பின் உள்ளே அமுத ஊற்றுச் சுரப்பிகள் பல உள்ளது. மூச்சுப் பயிற்சியின் உதவியால் உள்ளே உள்ள அமுத சுரபி நீரை நாடி, நரம்புகளுக்குச் பாயச்செய்வது காயசித்திமுறையாகும். இந்த சாகாகல்வி முறையை அறியாதவர்கள் தீர்த்தங்களில் நீராடுவதாகக்கூறி காடு மேடு மலைகளில் வீணே சுற்றித்திரிந்து வருவார்கள்.

Page – 53

ஒலி தியானம்

ஒலியாகிய சப்தத்தை கேட்கும் எளிய தியான முறையை கடைப்பிடித்து அதனால் பல சித்திகளை அடையலாம் என்கிறார்கள் சித்த யோகிகள்.

இந்த ஒலி என்னும் சப்தத்தைக் கேட்டு வரும் தியான யோகத்தை அப்யாசிக்க அமைதியாக சுகாசனத்தில் உட்கார்ந்து கொள்ள வேண்டும். தர்ஜினி எனப்படும் மோதிர விரல்களால் இருகாதுத் துவாரங்களையும் அடைத்துக் கொள்ள வேண்டும். காதுகளை அடைத்துக் கொண்டு கண்களையும் மூடிக்கொள்ள வேண்டும்.

Page – 97

திருக்குறளில் யோகம்

கற்றதனால் ஆயபயன் என்கொல் வாலறிவன்

நற்றாள் தொழாஅர் எனின்-

நீங்கள் மெய் அறிவை உணர வேண்டுமானால் புறத்தில் உள்ள நூல்களை எல்லாம் படித்துக் கொண்டேஇருந்தால் அதனால் எந்தப் பயனும் கிடைக்காது. ஆகவே மெய்யான அறிவை உணர நமது முதுகுத் தண்டின் கீழ் இருக்கும் மூலக் கனலை நெற்றிக்கு நடுவில் அதாவது புருவ மத்திக்கு கொண்டு வந்து அங்கே உணர்ந்தால் நோய் இல்லாமல் தூய அறிவுடன் விளங்கலாம் என்கிறார் திருவள்ளுவர்.

மலர்மிசை ஏகினான் மாணடி சேர்ந்தார்

நிலமிசை நீடு வாழ்வர்-

-திருக்குறள்

Page – 119

பாம்பாட்டிச் சித்தர் யோகம்

தூணைச் சிறுதுரும்பாகத் தோன்றிடச் செய்வோம்

துரும்பைப் பெருந்தூணாகத் தோற்றச் செய்குவோம்

ஆணைப் பெண்ணும், பெண்ணை ஆணும் செய்குவோம்

ஆரவாரித்து எதிராய் நின்று ஆடுபாம்பே.

தன்னை உணர்ந்து அறிந்தவர்கள் இந்த அகண்டவெளியைத் தமக்குள் இருக்கும் தூணாகிய முதுகுத்தண்டின் கீழ் அதை ஒரு துரும்பைப் போல் நினைத்து வைப்பர். இந்த அகண்ட வெளித்தூணை அங்கே துரும்பாக்கி அத்துரும்பை இவ்வுலகத்துக்கு ஒரு தூண்போல் தோன்றிடச் செய்வர். அவர்கள் தம் வல்லமையினால் ஆண்களின் மனதை மாற்றி பெண் மனமாக்குவர். பெண் மனதை மாற்றி ஆண் மனமாக்குவர். அத்தகைய சக்தியை பெற்றோம் என்று நின்று ஆடுபாம்பே என்று சொல்கிறார்.

Page – 127

குணங்குடி மஸ்தான்சித்தர் யோகம்

எல்லோரும் மானிடர் தாமோ – இந்த

இழிவான பிரமைகளெல்லார்க்கும் போமோ

கல்லெல்லாமாணிக்கமாமோ – என்று

கற்பித்த காரணகுருவடி போற்றி –

இவ்வுலகில் பிறந்தவர்களெல்லாம் மானிடராகிய மனிதப் பிறவியல்லர். பார்வைக்கு மனிதனாய்த் தோற்றமளித்த போதிலும் அவனது உள்ளே இருக்கும் குணங்களோடு மனிதக் குணத்தை ஒப்பிட முடியாது. அவற்றை மனிதக் குணத்தோடு ஒப்பிட்டுப் பார்ப்பவரின் தன்மை எதைப் போன்று உடையது என்றால் இவ்வுலகில் உள்ளவற்றின் மேல்பாசமற்றுப் பார்க்கும் பொருள்களை அறிந்தெறிந்து தெளிந்து உணர்ந்து தெளிவோடு நிற்பர் என்கிறார் குணங்குடியார்.

Page – 143

இதுபோல நாள்தோறும் தியானம் செய்து வரும் யோகியர்களை எமன் அணுக மாட்டான். மேலும் முக்காலத்திலும் அமுத கிரணத்தைப் பருகிச் சாகாத நிலை எய்திருப்பார்கள். எனவே சந்திரகலை பூரணமாக இருக்கும். இதுவே சந்திர யோகமாகும். இதை தகுந்த ஆசான் மூலமாக உபதேசம் பெற்றுச் செய்து மரணமில்லாத வாழ்வு வாழ்வோமாக.

இதுவே சாகாக் கலை ஆகும்.

Page – 183

இதுவரை நன்னுரை, இனி என்னுரை

எனது இனிய நண்பரொருவர் சாகாக்கலை என்னும் ஒரு நூலை எனக்கு கொடுத்து என்னைப் படிக்கச் சொன்னார், எனக்கும் பழங்கால நூல் என்றால் பாகற்காய் சாப்பிடுவது மாதிரி பாகற்காய் சாப்பிடுவது எனக்கு அல்வா சாப்பிடுவது மாதிரி எனவே நானும் நூலை மிகவும் விரும்பி படிக்க தொடங்கினேன்.

அதில் பிரக்ஞானம், அஹம்பிரமாஸ்மி, தத்துவமசி, மணிபூரகம், தத்புருஷம், ஈசானியம், வசியநம, பூதசரம், வஸ்ஸியாத், அஜபாஜெபம், ஸோஹம, காம்ஸ்யம், பிரமரந்திரம், விசுத்தி, மூலாக்கினி இப்படி நிறைய வார்த்தைகள் போதுமென நினைக்கிறேன்

இவையெல்லாம் எனக்கு அபுதாபி எனது அலுவலகத்தில் அரேபியர்களோடு அன்றாடம் புழக்கத்தில் உள்ள வார்த்தைகள் அதனால் சுலபமாக படித்து முடித்து விட்டேன். இந்நூலை எழுதிய ஆசிரியர் யார் ? என்பது நூலிலேயே இருந்தது முடிவில் இவர் என்ன சொல்கிறார் மரணமில்லாமல் வாழமுடியும் என்கிறார்.

எனது புத்திக்கு  எட்டியவரை இது சத்தியமாக, சாத்தியமாக படவில்லை. எனக்கும், எனது நண்பருக்கும் சர்ச்சை.

சரீரம் இறந்து விடும் ஆனால் ஆன்மா நிலைத்திருக்கும் என்றார்.

சரீரம்தான் இறந்திருக்கிறது ஆன்மா இறக்கவில்லை என ஒருஉடலை நமது வீட்டில் வைத்திருக்க முடியுமா ?

அதை சட்டம்தான் ஏற்றுக்கொள்ளுமா ?

சரீரம் செயல்படாத ஆன்மா கோமா நிலையல்லவா ?

மேலும் ஆன்மாவுக்கும் பேய், பிசாசுக்கும் என்ன வித்யாசம் ?

நான் ஒப்புக் கொள்ளவில்லை முடிவில்லாத சர்ச்சையை முடிப்பதற்கு முடிவில் கேட்டேன் இதை எழுதிய ஆசிரியர் எங்கே ? அவர் இறந்து விட்டார்.

அப்படியானால் முதலில் அவரல்லவா, இதைக் கடைப்பிடித்து வாழ்ந்து காண்பித்துக் கொண்டிருக்க வேண்டும், ஆகவே இதை எப்படி ஏற்றுக் கொள்ளமுடியும். முடிவில் அவர் என்னைச் சொன்னார், நீ ஒரு விதண்டவாதி.

சாம்பசிவம்-

காலம் பூராம் ஒன்னே அப்படி தானய்யா சொல்றாங்கே... அவங்கே வாயில, வண்ணப்புத்து வெக்கே.