சொர்ண-நாதன்

சொர்ணா கோயிலுக்குப் போனியே சாமிக்கிட்டே என்ன வேண்டிக்கிட்டே ?

எம் புருஷனுக்கு நல்ல புத்தியைக் கொடுனு வேண்டிக்கிட்டேன்.

கொடுத்தாரா ?

எதை ?

புத்தியைத்தான்டி...

அதெல்லாம் கடவுள் நேரடியா கொடுக்க மாட்டாரு, தானா வளரணும்.

தானா வளரணும்னு தெரியுதுல.... அப்புறம் ஏண்டி வீணா.. அலையுறே ?

தானா வளருறதுக்குத்தான் நேர்த்திக் கடனுக்கு வேண்டிக்கிட்டேன்.

என்ன... நேர்த்திக்கடன் வச்சுருக்கே ?

உங்களுக்கு முடி எடுக்கிறதாகத்தான்..

நேர்த்திக்கடன் வக்கிறவ... உனக்குத்தானே முடி எடுக்கணும்.
எனக்கு எதுக்கு ?

ஏன்... அதுக்கு தலையை எடுக்கிறதா.. வேண்டிக்கிறலாமே ?

இப்படியே பேசிக்கிட்டு திரிஞ்சீங்க... அப்படித்தான் வந்து சேரும்.

அப்படிச்செஞ்சீனா... நானும் போயிடுவேன் நீயும் ஜெயிலுக்குத்தான் போவே... பிறகு இந்த நேர்த்திக்கடன் எதுக்கு ?

வெள்ளிக்கிழமையும் அதுவுமா.... நல்லபேச்சு பேசுறீங்களா ?

அப்படினா, சனிக்கிழமை பேசலாமா ? அந்த தேங்காயை கொண்டா, உடைச்சுத்திங்க..

விபூதி மட்டும் பூசுறது இல்லை சாமிக்கு படைச்ச தேங்காயை மட்டும் திங்கலாமோ ?

பின்னே எதுக்கு... தேங்காயை வாங்கி வந்தே ?

நாளைக்கு சட்னிக்கு வேணுமுள்ள ?

அப்ப மட்டும் நான் சட்னியை சாப்பிடலாமா ? யேண்டி முட்டாச் சிறுக்கி உண்மையிலேயே உனக்குத்தான்டி புத்தி வேணும்.

காலையில உங்கள்ட்ட வாயைக் கொடுத்தா விளங்குனாப்பலதான் இன்னைக்கு.

ஏண்டி.. சும்மா இருக்கிற என்னை 25 வருஷமா மொட்டையடிச்சது போதாதுனு நல்லா இருக்குற கர்லிங் முடியை மொட்டை அடிக்கப் பார்க்கிறே ?

ஆங்..... இவரு.. வள்ளல் பரம்பரை நாங்க வந்துதான் நொட்டிக்கிருச்சு... இப்ப முடி இல்லைனு என்ன... நட்டமாகிப் போச்சு ? சம்பந்தி ஆகப்போற நேரத்துல...

எல்லாம் பேசுவேடி, புத்தி இல்லாமலா... உன்னை வச்சு 25 வருஷமா காலம் தள்ளுறேன் ?

அது நான் அம்மனுக்கு இருக்குற விரதத்தோட பலன்.

ஆமாடி அம்மனுக்கு விரதம் இருக்கியே.... எங்க அம்மாவை வச்சு சோறு போட மட்டும் உனக்கு வலிக்குது இதுக்கு மட்டும் உங்க அம்மன் உனக்கு புத்தியை கொடுக்க மாட்டாளா ?

இப்ப, உங்க அம்மாவுக்கு என்ன கொறைச்சல் ? உங்க அண்ணன் நல்லாத்தானே பார்த்துக்கிறாரு...

அதைத்தான்டி நானும் சொல்றேன் அண்ணன் வீட்ல ஆறுமாசம் இருந்தா, நம்ம வீட்லயும் ஆறுமாசம் இருக்கணும் அதுதான்டி முறை.

உங்க அண்ணன் சொந்தமா வீடு வச்சு இருக்காரு... ஒரு செலவும் இல்லை அவரு வச்சுக்கிற கூடாதோ ?

ஆமாடி அவரு எப்படி வீடு கட்டுனாரு ? மாமனாரு-மாமியாரு மச்சான் கொழுந்தியாள்னு ஒரு பிரச்சனையும் இல்லை இங்கேதான் வாராவாரம் உன் வீட்டு ஆளுக வந்து கும்மி அடிச்சா... நான் எப்படி வீடு கட்டறது ?

அதுக்காக உள்ளுருல இருக்கிற எங்க அப்பா-அம்மா என்னை பார்க்க வர மாட்டாங்களா ?

வரக்கூடாதுனு சொல்லலை எங்க அம்மா வந்துட்டா மட்டும் மூஞ்சை இஞ்சி தின்ன குரங்கு மாதிரி வச்சுக்கிட்டு இருக்கே, உங்க வீட்டு ஆளுக வந்தால் 32 பல்லும் தெரிய சிரிச்சுக்கிட்டு திரியுறே ?

உங்க அம்மாவுக்குத்தான் மாசாமாசம் பணம் அனுப்புறோம்ல அனுப்ப வேண்டாம்னா... சொன்னேன் ?

அடி எலவு மகளே வேண்டாம்னு வேற சொல்லுவியலோ... ?

இஞ்சே பாருங்க, இப்படி எடக்கு மடக்கா பேசிக்கிட்டு திரிஞ்சீங்க... ?

என்னடீ... செஞ்சுருவே ?

எங்க அம்மாக்கிட்டே சொல்லி வாயைக்கட்டி வச்சுருவேன் ஜாக்கிரதை.

இப்படிச் சொல்லியே 25 வருஷதை ஓட்டிட்டியேடி ஹும் காலவினை.

சொல்லி விட்டு வேலைக்கு கிளம்பினான் நாதன்.