மஞ்சத்து மந்திரம்

மஹேந்திரபுரி மன்னன் மதுசூதனின் அரண்மனை பள்ளியறை மஞ்சத்தில் இளவரசி நளாயினியின் மடியில்... இளவரசர் இளமாறன்.

இளவரசே தாங்கள் போரிட்டு கைப்பற்றிய மங்கள தேசத்தை தங்கள் தமக்கையின் மணாளனுக்கு முடி சூட்டப் போவதாக மன்னர் அறிவித்திருப்பதாக அந்தப்புரத்தில் நான் கேட்ட செய்தி உண்மையா ?

ஆம் நளாயினி உண்மைதான் இது சந்தோசமான செய்திதானே ?

எப்படி சந்தோசமாகும் ? தாங்கள் அல்லவா போரிட்டீர்கள் தர்மப்படி தாங்கள் முடிசூடுவதுதானே முறையாகும் ?

அதனால் என்ன... முடிசூடிக்கொள்வது உனது சகோதரர்தானே ?

இப்படிப் பார்த்தால் இந்த அரண்மனையில் மட்டும், எனக்கு எட்டு சகோதரர்கள் ஆயிற்றே அப்படியானால் என் வயிற்றில் வளரும் தங்களின் மைந்தனுக்கு நாளை எதை முடி சூட்டுவீர்கள் ?

ஆஹா என் மணாளினிக்கு இப்பொழுதே என் மைந்தனைப்பற்றி கவலை வந்து விட்டதே பரவாயில்லையே !

சமாளிக்க வேண்டாம் எனது வினாவுக்கு விடை சொல்லுங்கள் ?

நம் மைந்தன் எதிர்காலத்தில் நம் குலதெய்வம் தொட்டிச்சியம்மன் அருளால் ஏழு உலகையும் சிறை பிடித்து இளவரசன் ஆவது நிச்சயம்.

ஹும் நான் தாங்கள் மன்னர் ஆவதைப்பற்றி பேசுகின்றேன், தாங்கள் நம் மைந்தனையும் இளவரசன் ஆக்குவதைப்பற்றி பேசுகின்றீர்களே !

இளவரசி இன்று என்ன ஆயிற்று உனக்கு... மகாராணியாரோடு ஏதும் பிணக்கா ?

மகாராணியோடு பிணக்கா அது எப்படி முடியும்... நான் வாழ வந்தவள்தானே... நான் யார் மகாராணியா ?

இன்று உனது பேச்சில் ஏதோ சூட்சுமம் தெரிகிறதே ?

ஆம் நான் நேராக விசயத்திற்கு வருகிறேன் மங்களதேசத்திற்கு தாங்கள் மன்னராகவும், நான் மகாராணியாகவும் முடியுமா ? முடியாதா ?

இளவரசி சற்றுப் பொறு நான் நாளையே மன்னரிடம் கலந்து ஆலோசிக்கிறேன்.

வேண்டாம் மன்னரிடம் ஆலோசித்தால் என்ன ஆகும் என்பது தாங்களுக்கு தெரியாததா ? தங்களின் வீரத்தால் மங்கள தேசத்தை கைப்பற்றிய தாங்கள் நேரடியாக மன்னராக முடியாதா ?

மன்னர் எனது தந்தையார் அல்லவா... அப்படி செய்ய இயலாது.

ஏன் இயலாது ? லிபியாவில் கடாபி ஆட்சி அமைக்க வில்லையா ? பாலஸ்தீனில் யாஸர் அராபாத் ஆட்சி அமைக்க வில்லையா ? பாக்கிஸ்தானில் கூட முஷாரப் ஆட்சி அமைக்க வில்லையா ? அவர்களால் கூட முடியும்போது மாவீரராகிய தாங்களால் ஏன் இயலாது ?

இன்று அவர்களின் நிலையை பார்த்தாயா ? இளவரசி இது நடக்காத காரியம் மட்டுமல்ல நடக்க கூடாத காரியமும்கூட.

அப்படியானால் நான் நாளையே கொங்குநாடு செல்கிறேன்.

இளவரசி இது தவறு உனது வளைகாப்பு வைபவம் நடக்கப் போவதால் நாடே கோலாகலப்படப் போகும் இந்த தருணத்தில் நீ உனது தாய் வீடு செல்வது சரியல்ல !

வேண்டாம் எனது வளைகாப்பு வைபவம் கொங்கு நாடே சிறக்க எனது தந்தையார் மன்னர் மலையரசர் நடத்துவார் தாங்கள் மட்டும் விருந்தினராக வந்து கலந்து கொண்டால் போதும்.

இளவரசி வேண்டாம் இது தவறு.

இளவரசன் இளமாறன் சொல்லிக் கொண்டு இருக்கும்போதே சட்டென எழுந்து மற்றொரு அறையில் நுழைந்து தாழிட்டுக் கொண்டாள் இளவரசி நளாயினி

அடுத்து இதை வேறு வகையில் பார்ப்போம் – கில்லர்ஜி