கோடரிவேந்தனும், செந்துரட்டியும் (4)

இப்பதிவின் தொடர்ச்சிகளை படிக்க கீழே சுட்டிகளை சொடுக்குக...

அகோசெ ஆகோசெ இகோசெ

சாலையோர ஆலமரத்தடியில் தலைப்பாகையுடன் அமந்திருந்த ஆருடரைக் கண்ட செந்துரட்டி இருகைகளாலும் வணங்கி நமச்காரம் ஐயன்மீர் தங்களது ஆசிகள் வேண்ட, கோடரி வேந்தன் நமச்காரம் என்று ஒரு கையில் இயம்பியதைக் கண்ட ஆருடர் செந்துரட்டியை கையை உயர்த்தி நீடூழி எம்பெருமான் ஐயன் துணை என்றும் கிட்டும் என்றுரைத்து கோடரி வேந்தனை ஒரு மாதிரி பார்த்து....

(உலகுக்கு முதன் முதலாக ஒரு கையில் நமச்காரம் வைக்கும் புதுமையை புகுத்தியது கோடரி வேந்தனே என்பதை வரலாறு பின்னால் எழுதிக் கொண்டது என்பது வேறு விடயம்)

இதென்ன... ஒரு கையில் நமச்காரம் செய்வது... யாரப்பா தாங்களிருவரும் ?

ஐயா நாங்களிருவரும் குருகுலம் நோக்கி யாத்திரை செல்கின்றோம் வழியில் தங்களைக் காணவே தங்களிடம் எங்களின் எதிர்கால விடயங்களைக் குறித்து வினவலாம் என்று கருதுகின்றோம்.

சிறார்களே தாங்களிருவரும் எந்த குருகுலத்தில் பயிலுகின்றீர்கள் ?

ஊமையனார் கோட்டை இராமாநுசர் குருகுலத்தில்...

அங்கு பயிலும் சிறார்களில் நீயுமா ?

ஐயா தங்களுக்கு ஐயம் வரக்காரணம் அறியலாமா ?

பெரியோருக்கு மரியாதை செய்யும் முறையே தவறாக இருக்கின்ற காரணத்தால் நம்பிக்கை இழந்து வினவினேன்.

ஐயா நேற்றிரவு கால் இடறி கீழே விழுந்து விட்டதால் எமது இடக்கை வேதனையளிக்கின்றது ஆகவே ஒரு கையில் நமச்காரம் செய்தோம்.

உமது விழியே உமது பொய்யுரையை விளக்கி விட்டது தம்பி தாங்கள் சொல்வீர் என்ன வேண்டும் தங்களுக்கு.... ?

செந்துரட்டி வாய் திறக்கும் முன்பே....

ஐயா இவர் எம்மோடு பயிலும் மாணக்கர் அவரால் பேச இயலாது  ஆகவே நாம் தங்களிடம் உரையாடுகின்றோம்.

இவருக்கு என்னவாயிற்று ?

இவருக்கு பல்லில் வேதனை பூச்சி இருந்ததால் மருத்துவரிடம் மருந்து வைத்து கட்டி விட்டுதான் திரும்பிக்கொண்டு இருக்கின்றோம்.

என்ன இந்த அகவையில் பற்களுக்குள் பூச்சியா ?  

ஆம் ஐயா ஆகவே இவர் உரையாட முடியவில்லை.

இப்பொழுது தங்களுக்கு என்ன வேண்டும் ?

இவருக்கு விவாகம் செய்ய காலம் கைகூடி விட்டதா ? என்பதை தாங்கள் தயை கூர்ந்து சொல்லல் நன்று.

உமது வினாக்கள் உமது அகவையை கடந்து இருக்கின்றதே.... குடும்பத்தில் பெரியவர்களை அழைத்து வாரும் யாம் ஆருடம் காண்போம்.

மன்னிக்கவும் ஐயா தாங்கள் ஞானி சிரீபூவு மாதிரியே தெய்வ கடாச்சமாக இருக்கிறீர்கள் தயை கூர்ந்து தங்களுக்கு பகரமாக தட்சிணையை பெற்றுக் கொண்டு இயம்புவீராக...

தட்சிணையாக என்ன தருவீர்கள் ?

எங்களிடம் அவலும், சீடையும் இருக்கின்றது.

நல்லது இன்றைய முதல் வருமானம் உமது பொன்னான கரங்களில் கிடைக்கின்றது எமக்கு வேண்டிய தட்சிணையை வையும்.

கோடரி வேந்தன் செந்துரட்டியின் தோளில் கிடந்த மூட்டையை பிரித்து இரண்டு கையளவு அவலும், இரண்டு சீடையையும் எடுத்து கைக்கும் பொழுதே ஒரு சீடையை எடுத்து வாய்க்குள் நுழைக்க ஏதும் வினவ இயலாமல் செந்துரட்டி திகைக்க....

ஐயா எங்கள் இருவருக்குமான தட்சிணை இதோ முதலில் எமது நெருங்கிய சினேகிதரான இவருக்கு பாருங்கள் ஐயாவிடம் கரம் நீட்டுங்கள் செந்து.

திருநாமம் என்னவோ ?

செந்துரட்டி.

யாருடையது ?

இவருடையதுதான் ஐயா இவருக்கு பல் வேதனை காரணத்தால் நாமே இயம்பிக் கொள்வோம்.

தனது கையிலிருந்த சிறிய குழல் போன்ற குச்சியை செந்துரட்டியின் உள்ளங்கையில் வைத்த ஆருடர் விழிகளை மூடி தியானித்து....

ஆத்தா அம்பகரத்தாளே அருந்தவச்செல்வன் செந்துரட்டியின் எதிர்கால நலபலன் சிறப்பு இயம்புவமைக்கு நல்லதொரு குறி சொல்வாயாக....

செந்தூரட்டி உமது ஆயுள் பலன் அற்புதமாக இருக்கின்றது கேது பத்தாம் இடத்திலிருந்து வைகாசித் திங்களில் இடப் பெயர்ச்சி கொள்வதால் வியாழ நோக்கம் பெறுக்கெடுக்கின்றது உமது குருகுலவாசம் நலமுடன் முடிந்து தாவணி போட்ட பருவமங்கை ஆவணியில் உமது கண்டாங்கி உடுத்திய பாவையாவாள் மேலும் உமது அடுத்த பிறவியில் சமுத்திரம் கடந்த பாகங்களுக்கு செல்லும் பாக்கியம் உண்டு இருப்பினும் உமக்கு சினேகத் தோசமும் உண்டு இந்த தோசம் உமது அடுத்த பிறவிவரை பூமாதேவிக்குள் தைலம் எடுக்கும் அபு என்று சொல்லப்படும் சமுத்திரத்திலும் இந்த சினேக தோசம் தொடர்ந்து உம்மை தாவி தாவி தொடரும் நீரும் உமது சினேகிதரும் செல்வந்தனாக வாழ்ந்திருப்பினும் உணவுக்கு காய்ந்த மாவு வறட்டிகளையே உண்ணும் நிலையே உண்டாகும்.

ஐயா இந்த சினேக தோசக்காரர் இப்பொழுது இவரைத் தொடர்கின்றதா ?

அதுவொரு அசை போட்டுக் கொண்டே தொடரும் சடம் தோராயமாக உம்மைக்கூட சொல்கிறது ரேகை சாத்திரம்.

ஐயா தங்களது திருநாமம் என்னவோ ?

எம்மை அறியாதோர் இந்த சுற்று வட்டாரம் பதினெட்டு பட்டியிலும் இல்லை ஆந்தைமடை ஆருடர் ஆண்டியப்பன் என்றால் அனைவரும் அறிவர்.

நல்லது ஐயா எமக்கு...

உமக்கு ரேகை காண வேண்டியதில்லை உமது விழிகளை வைத்தே இயம்பலாம் ஆகவே வேண்டாம் காணாமல் இருப்பதே நலம் எமது வாயால் இயம்புவதற்கு எமக்கே அச்சமாக இருக்கிறது உமது ரேகை பலன் எழுந்து செல்லும்.

செந்துரட்டி விழிகளால் எழச்சொல்லி எழுந்து ஆருடரின் காலை வணங்க....

நலம் பெறுக நல்லதே நடக்கும் சென்று வாருங்கள்.

கோடரி வேந்தன் ஆருடரை முறைத்துக் கொண்டு புறப்பட, மீண்டும் நடையைக் கட்டினர் செந்துரட்டியும், கோடரி வேந்தனும்.

செந்து ஆருடர் தங்களுக்கு சந்தோசமான முறையில்தானே இயம்பினார் பிறகு தங்களின் வதனம் வாடுவது ஏன் ?

கோடரி ஒரு விடயத்தை கவனம் கொண்டீர்களா ? அடுத்த பிறவியிலும் சினேகிததோசம் எம்மைத் தொடரும் என்றுரைத்தாரே அதை நினைந்து அச்சமடைகிறேன்.

அது யாராக இருக்ககூடும் செந்து ?

அவரின் ஆருடம்படி இப்பிறவியில் தாங்கள்தானே எமக்கு நெருங்கிய சினேகிதர் தாங்கள் அடுத்த பிறவியிலுமா ?

இது சந்தோசமான விடயம்தானே...

தாங்களுக்குத்தானே.... ?

செந்து ஆருடரும், வேதனையைக் கொடுத்தார் தாங்களுமா ?

கோடரியாரே ஆருடர் இயம்பிதால் விசமிக்காதீர்கள் அவர் பெரியவர் ஆருடம் சொல்பவர் அவர் மனம் நோகும்படி நடக்கலாமா ?

யாம் என்ன தவறிழைத்தோம் செந்து ?

அவர் நமது தாத்தாவைப் போன்றவர் அவரை வணங்கி வருவதால் பெரியவர்களின் ஆசிதான் கிடைக்குமே தவிர வேறொன்றுமில்லை.

விடுங்கள் செந்து தங்களுக்கு ஆவணியில் விவாகம் என்றுரைத்தது சந்தோசமே... எமக்கு ஆருடம் இயம்ப மாட்டார் என்று அறிந்திருந்தால் ஓர் சீடையை இழக்காமல் இருந்திருக்காலம்.

சரி கோடரியாரே உமது மூட்டையில் இருந்த அவல் எங்கே ? எமது பங்கிலிருந்து இருவருக்கும் தானம் செய்து விட்டீர்கள் ?

எமது முடிச்சுதான் முடிந்து விட்டதே... செந்து.

எம்முடன்தானே நடந்து வந்தீர்கள் அதற்குள் எப்படி ? வழியில் தவறி விழுந்து விட்டதா ?

இல்லை செந்து வரும் பொழுது உண்டு கொண்டுதான் வந்தோம்.

எப்பொழுது... யாம் காணவில்லையே ?

இடையில் வினாக் கேட்பதால் தாங்கள் சினம் கொண்டீர்கள் ஆகவே யாம் ம் மட்டுமே இயம்பிக் கொண்டு வந்தோமே அந்த தருணத்தில்தான்.

சீடையைக் கடித்த சப்தம்கூட கேட்கவில்லையே ?

அதை வாய்க்குள் ஊற வைத்துதான் கடித்தோம் ஆகவே தங்களுக்கு கேட்காமல் இருந்திருக்கலாம் செந்து நமக்கு கிடைத்த அவல், சீடை விடயங்களை மற்ற மாணக்கர்களிடம் இயம்பாதீர்கள்.

கோடரியாரே எதற்காக ?   

இன்றிரவு குருகுலம் சென்றதும் நாமிருவரும் உண்ணலாம்.

இல்லை கோடரியாரே குருநாதரும், நாட்டாமை மோகனரங்கம் அவர்களும் நெருங்கிய நட்புடையவர்கள் குருநாதர் வினவினால் நாம் நடந்ததைத்தான் விவரிக்க முடியும் நாளை அறிந்தால் ? நம் இருவருக்கும் சிரமம்.

நாட்டாமை நம்மை ஏளனமாக நகைத்தாரே ஆகவே ஒன்றும் கொடுக்கவில்லை என்றுரைப்பதில் தவறில்லையே.... ?

இல்லை கோடரி நாம் குருநாதரிடம் ஒப்படைத்து விடுவோம் அவர் திரும்பவும் நம்மிடம்தான் தருவார்.

எம்மிடம் இல்லையே இருவருக்கும் இதுதான் என்றுரைப்போமா ?

இல்லை கோடரி அதுவும் நாளை அறியக்கூடும் இதையே இரண்டாக பிரித்து கொடுப்போம் இதுவே நமக்கு சாதகமானது.

வேண்டாம் இதை தாங்கள் ஒப்படையுங்கள்.

தங்களுடையதை குருநாதர் வினவினால் ?

அதை யாம் சரியாக்கி கொள்வோம் தாங்கள் சிரத்தை மட்டும் சிறிதாக அசைத்தால் போதுமானது.

சிரத்தை அசைப்பதால் ஏதும் பிரச்சனைகள் வந்து விடாதே ? கோடரியாரே குருகுலம் வந்து விட்டது இந்நேரம் குருநாதர் துயில் கொண்டிருப்பார் ஆகவே நாளை பொழுது புலர்ந்ததும் அவரை சந்திக்கலாம்.

வாருங்கள் செந்து உணவிடம் சென்று களித்து விட்டு பிறகு கூடாரம் செல்வோம்.

நல்லது வாருங்கள்.

தொடரும்,..

இந்தப்பதிவு உருவான காரணக் கதையை படிக்க இதோ

என்னை F m E சொடுக்க.