ஒண்ணுமே புரியலே உலகத்திலே...

செருப்பை கண்ணாடி கூண்டுக்குள்ளும், உணவை தெருவில் ஓடும் சாக்கடையோரமும் வைத்து நடக்கும் வியாபாரம் எனக்கு விளங்கவில்லை.

சோற்றில் சிறிய கல் கிடந்தால் மனைவியை ஏசும் மனிதர்கள் பக்தி என்ற பெயரில் கோவிலில் மண்சோறு சாப்பிடுவது ஏனென்று எனக்கு புரியவில்லை.

உயிரோடு இருக்கும்போது நல்ல உணவு வாங்கி கொடுக்காத உறவுகள் இறந்த பிறகு எல்லாவகை அசைவ உணவுகளையும் கிரிகை என்ற பெயரில் படைத்து தாங்களே உண்ணும் இந்த சடங்குமுறை எனக்கு புலப்படவில்லை.

தொலைக்காட்சி நாடகங்களில் குடும்ப உறவுகளை சிதைக்கும் காட்சிகள் மட்டுமே இருப்பது தெரிந்தும் பெண்கள் அதிலேயே மூழ்கி கிடப்பது ஏனென்று எனக்கு தெரியவில்லை.

சகோதரி அலைபேசியில் அழைத்தாலும் பேசுவதற்கு விரும்பாதவர்கள் கொழுந்தியாள் மிஸ்ட்கால் விட்டவுடன் அழைத்துப்பேசும் ஜடங்களின் குணாதிசயம் எனக்கு விளங்கவில்லை.

புடவை கட்ட விரும்பாத சுடிதார் பாவையர்கள் திருமணத்தன்று ஒருநாள் கூத்துக்காக பல்லாயிரம் ரூபாய்க்கு பட்டு எடுத்து பீரோவுக்குள் பூட்டி வைப்பது ஏனென்று எனக்கு புரியவில்லை.

கணவனின் சகோதரன் கல்லூரி கட்டணம் கட்ட பணம் கேட்டபோது இல்லையென்று சொன்ன கணவனை கண்டிக்காத மனைவி, அவனது கொழுந்தியாளுக்கு கொலுசு வாங்க பணம் கொடுத்தபோது கண்டிக்காதது ஏனென்பது எனக்கு புலப்படவில்லை.

மறைந்து போன அரசியல் தலைவனின் பிறந்தநாள் வரும்போது பொது மா’’க்களுக்கு இனிப்பு வழங்கி கொண்டாடுவதில் ஏதேனும் உள்க்குத்து இருக்கின்றதா என்பது எனக்கு தெரியவில்லை.

துபாயிலிருக்கும் மகனிடம் தாய் உனது தம்பிக்கு விசா எடுத்து அழைத்து போக சொன்னபோது அனுப்பிய விசாவில் மைத்துனர் பெயர் இருப்பது எப்படி என்றபோது பிரிண்டிங் மிஸ்ட்டேக் என்று ஆங்கிலத்தில் பதிலளிப்பது எனக்கு விளங்கவில்லை.

குடி குடியைக் கெடுக்கும் குடிப்பழக்கம் உடல் நலத்தைக் கெடுக்கும் என்று சொல்லும் அரசாங்கமே மதுக்கடைகளை திறந்து வைத்து மக்களை குடிக்க வைப்பது ஏனென்று எனக்கு புரியவில்லை.

ஆயிரக்கணக்கான கோடிகளை கொள்ளையடித்தவர்கள் என்பது மக்களுக்கு தெளிவாக தெரிந்தும் அவர்கள் மீண்டும் தேர்தலில் நிற்கும்போது அமோக வாக்குகள் வித்தியாசத்தில் வெற்றி பெறுவது எப்படியென எனக்கு புலப்படவில்லை.

ஏழை மக்களிடம் தனது வீரத்தை காண்பிக்கும் பதவி அதிகாரமுள்ள கா(ஏ)வல்துறை அரசியல் பக்க பலமுள்ள குடிகாரன் தன்னை தகாத வார்த்தைகளால்   பேசினாலும்கூட மடங்கி போவது ஏனென்று எனக்கு தெரியவில்லை.

காணொளி

காணொளியின் மற்றொரு இணைப்பு
https://youtu.be/L0PIhl4LVrk