அதிராம்பட்டிணம், அதிரடி அதிரா

‘’அதிரா’’

இந்த பெயரைக் கேட்டாலே... அதிராம்பட்டிணம் மட்டுமல்ல சுற்று வட்டார பதினாறு கிராமங்களின் காவல் நிலைய சுவற்றின் செங்கல்கள் இரண்டு தானாகவே பெயர்ந்து கீழே விழும். என்றால் அப்பாவி பொதுமக்கள் எப்படி பயப்படுவார்கள் ? வைஜயந்தி ஐபிஎஸ் சையே ஓர் தினம் தூக்கிப்போட்டு மிதித்ததில் உடனடியாக மாற்றலாகி வேறு ஊருக்கு பறந்து போனவர் அப்படியே வடக்கு பக்கமாகவே போய் செட்டிலாகி விட்டாராம்.

காவல் நிலையங்களே சில நேரங்களில் அலைபேசியில் அழைத்து தீர்க்க முடியாத பஞ்சாயத்துகளை முடித்துக் கொடுக்க சொல்வார்களாம். பெரிய அதிகாரிகளே நின்று கொண்டு மேடம் என்று பவ்யமாக வாயை மூடிக்கொண்டு பேசுவார்களாம். காரணம் எல்லாமே அதிரடியான முடிவுகளாக இருக்குமாம். காய்கறி மார்கெட்டுக்கு வசூலுக்கு போகும் போது பதினாறு குதிரைகள் புடைசூழ அடியாட்களோடு போய் காய்கறி வந்த முட்டைக்கோஸ் மூடையை பிரித்து கீழே கொட்டி விட்டு அதே மூடையை பணத்தோடு நிரப்பிக் கொண்டு பங்களாவுக்கு வருவார்களாம். நகைக்கடை பஜாருக்கு போனால் பதினாறு கேரட் நகைகளை இலவசமாக கொடுத்து விட்டு பூமியை பார்த்து வணக்கம் சொல்வார்களாம். டிசம்பர் மாதம் பதினாறாம் தேதி வந்தால் ஊரே அதிராவுக்கு பதினாறு கிலோவில் கேக் வெட்டி பிறந்தநாள் விழா கொண்டாடுவார்களாம். கேக்கில் ஸ்வீட் பதினாறு என்று எழுதுவது மரபாம் இல்லையேனில் பேக்கரி முதலாளிகளுக்கு காவல்துறை பாதுகாப்புடன் பேருந்து நிலைய மையத்தில் வைத்து பதினாறு சவுக்கடி கொடுக்கப்படுமாம்.

அதிரா நகருக்குள் வலம் வருகிறார் என்றால் போக்குவரத்துதுறை சமிக்ஞை விளக்குகளை மாற்றியமைத்து அவர்களது மகிழுந்து செல்வதற்கு வழிவகை செய்வார்களாம். அதேபோல் டெல்லி - இராமேஸ்வரம் விரைவு வேக புகையிரதம் அதிராம்பட்டிணம் நிலையத்தில் சாதாரணமாக நிற்பது இல்லையாம். ஆனால் அதிரா ஏதும் அவசர வேலையாக புகையிரதத்தில் வெளியூர் கிளம்பினால் உடனே புகையிரதம் நின்று விடுமாம். இதையே காரணமாக வைத்து பொது மக்களும் அன்று இராமேஸ்வரம் போய் கருமத்தை தொலைத்து வரப்போவார்களாம்.

அதிரா சில நேரங்களில் சாலையில் நடந்து போகும்போது அவங்களுக்கு முன்னால் நடந்து போனவர்கள் அப்படியே சிலைபோல நின்று விடணுமாம் அதிரா போனவுடன்தான் அவருக்கு பின்னால் வாழ்க கோஷம் போட்டுக் கொண்டு போகணுமாம்.

ஒருமுறை திருமணம் ஒன்றுக்கு செல்லும்போது திருமணத்தில் பாட்டுக் கச்சேரியில் மதுரா நகராம் தமிழ்ச்சங்கம் என்று பாடிக்கொண்டு இருந்தவரை அதிராவின் அல்லக்கைகள் அடித்து உதைத்து அவரது வாயைக் கிழித்து அவர் இனி வாயைத் திறந்து பாடமுடியாது என்று தெரிந்தவுடன் வேறு நபரை அதிரா நரகம் டமில்ச்சங்கம் என்று பாட வைத்தார்களாம். திருமண விருந்து முடிந்தவுடன் மொய்ப் பெட்டியை அதிராவின் அல்லக்கைகள் எடுத்துக் கொண்டு போவார்களாம்.

இதனாலேயே பெரும்பாலும் யாரும் திருமணம் செய்யாமலே யாரையாவது இழுத்துக் கொண்டு ஓடிப்போய் குழந்தை பிறந்தவுடன் சொந்த ஊர் திரும்புவார்களாம் அதேபோல் ஊரில் உள்ள அசைவ உணவகங்களில் ஆட்டு ஈரலை மட்டும் அப்படியே வறுவல் செய்து அதிராவின் பங்களாவுக்கு கொடுத்து விடவேண்டுமென்று சொல்லி விட்டதால் நகரில் உள்ள எல்லோருமே சைவ உணவகங்களாக மாற்றி விட்டார்களாம். காலப்போக்கில் முனியாண்டி விலாஸிலும் தயிர்ச்சாதம் கிடைத்ததாம்.

இப்படியே சொல்லி வந்தவன் பலகை மாட்டிய அந்த குடிசை முன் நின்றான்.

இதுதான் ஸார்

கதவைத் தட்டுவோமா ?

கதவு இல்லை தட்டிதான்.

அதான்

பாட்டீ... பாட்டீ...

சத்தம் கேட்டு தட்டியை விளக்கிய தொண்ணூறு வயதை தாண்டிய பாட்டி கேட்டார்.

யாருப்பா பேராண்டிகளா ?

பாட்டி நாந்தான் மொக்கை மயேன், இவங்க மதுரையிலருந்து வந்து இருக்காங்க ஒங்கிட்ட ஏதோ அனுமதி வாங்கணுமாம் கேளுங்க ஸார்.

வணக்கம் பாட்டி என் பேரு தமிழன் குறும்படம் எடுத்துக்கிட்டு இருக்கோம். பாலக்காடு தில்லையகத்து குறும்பட இயக்குனர்கள் துளசிதரன், மற்றும் கீதா அவர்கள் அனுப்பி வச்சாங்க. உங்கள் பேரு என்ன பாட்டி ?

எம்பேரு அதிராம்பட்டிணம் அதிரடி அதிரா (ஐய்... தலைப்பு வந்துடுத்து....)

உங்க வயசு என்ன பாட்டி ?

ஸ்வீட் பதினாறு

என்ன பாட்டி தொண்ணூறு வயசு இருக்கும்போல பதினாறுனு சொல்றீங்க ?

டேய் நான் என்றும் பதினாறு இதுக்கு மேலே கேள்வி கேட்டே அருவாளை எடுத்து வீசிடுவேன்.

எதுக்கு பாட்டி அருவாளை வீசுறீங்க இருந்தா தேங்காய் உடைக்க ஆகும்ல...

டேய்.... என்ன லந்தா ?

சரி பாட்டி கோவிக்காதீங்க உங்கள் வாழ்க்கை வரலாற்றை படமெடுக்க அனுமதி தரணும் எவ்வளவு வேணும் ?

பதினாறு கோடி

என்னாது... பதினாறு கோடியா ? நல்லாயிருக்கே கதை... நான் வந்ததால ஏதாவது பணம் கிடைக்கும் துளசிதரன் ஸார் வந்தாருனா... கருவேல மரத்து இலையை ரெண்டு பறிச்சு துளசி இலைனு கொடுத்துட்டு சோலியை முடிச்சுட்டு போயிருப்பாரு...

வேண்டாம் இதுக்கு மேலே படமெடுத்தே லண்டன் கோர்ட்ல கேஸ் போட்ருவேன்.

நான் உகாண்டா கோர்ட்ல கேஸ் போட்டு உன்னை இழுத்தடிச்சுவேன்.

வேண்டாம்டா வயசான காலத்துல என்னை அலைக் கழிக்காதடா ஏதோ கையில உள்ளதை கொடுடா...

சரி உனக்கும் வேண்டாம், எனக்கும் வேண்டாம் வரும்போது நெல்லை ஸ்வீட் ஸ்டால்ல உனக்கு பிடித்தமான அதிரசம் பதினாறு பீஸ் வாங்கி வந்துருக்கேன் இந்த பேப்பரில் கையெழுத்து போட்டுட்டு உட்கார்ந்து தின்னு

சரிடா சாமி கொடு.

இப்ப சொல்லிக்கிட்டு வந்தீங்கள்ல சம்பவம் இதெல்லாம் எப்ப நடந்தது ?

இது நடந்து எப்படியும் அருபது வருசத்துக்கும் மேலே இருக்கும் ஸார்.

அப்ப பாட்டியோட பங்களா, சொத்து எல்லாம் என்னாச்சு ?

அதெல்லாம் பாட்டி கூடவே இருந்த அல்லக்கைகள் அதிரசம் வாங்கி கொடுத்து பத்திரத்துல கையெழுத்து வாங்கிட்டு போயிட்டாங்கே... ஸார்

அப்ப பாட்டியோட நகைகள் எல்லாம் என்னாச்சு ?

அதெல்லாம் அல்லக்கைகளோட பொண்டாட்டிமாரு பாட்டியை என்றும் பதினாறு போலவே இருக்கீங்கனு சொல்லி ஐஸ் வச்சு நகைகளை புடுங்கிட்டு போயிட்டாளுக... இந்தக் குடிசைதான் மிச்சம்

.

ம்.... சரி நல்லது நான் புறப்படுறேன். இவ்வளவு தகவல்கள் சொன்னதுக்கும், வீட்டை காட்டியதற்கும் ரொம்ப நன்றிங்க பாட்டி வர்றேன்.

மகராசனா போயிட்டு வாப்பா... நேரம் இருந்தா வா என்னோட மூணு வயசு கதையெல்லாம் இருக்கு ஜொள்ளுறேன்.

குறிப்பு – இந்த அதிராம்பட்டிணம் தியாகியின் வரலாறுக்கும், ஸ்காட்லாந்து நாட்டுக்கும் எந்த தொடர்பும் இல்லை மீறி யாராவது தொடர்பு படுத்தினால் நிர்வாகம் ஜவாப்தாரியல்ல!

காணொளி