போக்கு மாறிய நாக்குகள்...

     1999 அபுதாபி நான் அன்று அரபி பேசிப்பழகிய காலம் பால் வடியும் குழந்தை முகமாக இருந்ததால்  அலுவலக பையனாக வேலை கிடைத்து செய்து கொண்டு இருந்தேன். அரபு எழுதப்படிக்க தெரியாது தெரிந்து இருந்தால்... இந்தப்பதிவும் வந்து இருக்காது. காலையில் காஃபி, டீ, காவா, துர்கீஷ் என்று அரேபியர்களுக்கு போட்டுக் கொடுக்க வேண்டும்.

ஒன்பது மணியைப்போல கட்டிடத்தின் பக்கத்தில் இருக்கும் எஜிப்தியன் உணவகத்தில் போய் சிற்றுண்டி வாங்கி வந்து கொடுப்பதும் எமது வேலைகளுள் ஒன்று. சூடானி ஒருவன் பெயர் யாஸ்ஸின் இஸ்மாயில். என்னை அழைத்து...

கில்லர்ஜி ஜீப் ஸபாத்தி வாஹத் ஒத்தி மத்பஹ் தாக்கல் அனா ஈஜி பாதின்.

கில்லர்ஜி ஒரு ஸபாத்தி வாங்கிட்டு வந்து அடுப்படியில் வை நான் பிறகு வர்றேன்.

கை விரலை மேஜையில் வைத்து வட்டமாக வரைந்து காட்டினான் எனக்கு புரிந்து விட்டது. அட பரவாயில்லையே சூடானியும் நம்ம ஊரு சப்பாத்தியை சாப்பிட்டு பழகிட்டான் போலயே.. ஒன்று வாங்கினால் இவனுக்கு போதுமா.... நானும் வெளியில் போய் அவனுக்காக மலையாளி உணவகத்தில் ஒரு சப்பாத்தி வாங்கி வந்து அடுப்படியில் வைத்து விட்டேன்.

பிறகு நான் மேலேயும், கீழேயும் அலைந்து கொண்டு இருப்பேன் காரணம் அலுவலகம் மூன்று தளங்களிலும் இருந்தது. இவன் அடுப்படியில் வந்து தேடி இருக்கிறான் நான் சப்பாத்தியை தெரிவது போல்தான் வைத்து இருந்தேன். பிறகு நான் வந்தவுடன் கோபமாக கேட்டான்.

ஒயின் ஸபாத்தி ?

ஸபாத்தி எங்கே ?

அதா மௌஜூத்

இதோ இகுக்கு.

என்று பொட்டணத்தை எடுத்துக் கொடுத்தேன், வாங்கி பிரித்தவன்...

சூ அதா ?

என்ன இது ?

சப்பாத்தி

சூ சப்பாத்தி ? அனா ரீத் ஸபாத்தி

எனக்கு ஒன்றும் விளங்கவில்லை என்னாடா இது சப்பாத்தியைதானே கேட்டான் இப்ப என்னமோ மாதிரி சொல்லி மறுபடியும் அதையே கேட்குறானே... அவனுக்கு பசி எடுத்து விட்டது கத்த ஆரம்பித்து விட்டான்.

இந்தே மாஃபி மாலும் ஸபாத்தி ? அதா ஈஜி மின் ஹலீஃப்..

உனக்கு ஸபாத்தி தெரியாது ? அது பாலிலிருந்து வரும்...

எனது தேவகோட்டை மூளையின் மூலையில் பொறி தட்டியது போலிருக்க...

மின் ஹலீஃப் ஈஜி தாணி ரோப் ஷா ?

பாலிலிருந்து வர்றது வேற தயிர் சரியா ?

ஐவா... ஐவா... அதா ஒயின் ?

ஆமா... ஆமா.... அது எங்கே ?

இந்தே குல் சப்பாத்தி அக்கில் மால் இந்தி.

நீ சொன்னே சப்பாத்தி இந்திய உணவு.

இந்தே மாஃபி மாலும் அரபி ஸபாத்தி, ரோப் இத்தினீன் வாஹத்

உனக்கு அரபி தெரியலை ஸபாத்தி தயிர் இரண்டும் ஒன்றுதான்.

இந்த சூடானி மூதேவி சூடான் அரபியில் சொல்லியிருக்கு நான் பொதுவான அரபு மொழியில் தெரிந்தது ரோப் என்றால் தயிர் இவனுங்க.. ஸபாத்தி என்று சொல்லவும் நான் நம்ம ஊரு சப்பாத்தி கேட்கிறானு நினைச்சு வாங்கிட்டேன் பிறகு இதையும் தின்று பார்ப்போமே என்று தின்று விட்டான்.

நமது தேவகோட்டை இலக்கியத் தமிழில் அமருங்கள் என்று சொல்வதை சென்னைத் தமிழில் குந்து என்று சொல்வார்கள் இல்லையா ? நாமும் அதைப் புரிந்து கொண்டு வாழ்கிறோம். ஹூம்.. இலக்கியத்தமிழ் பேசுற தேவகோட்டையை விட்டுப்புட்டு கொச்சையாக பேசுற சென்னையை போயி மாநிலத் தலைநகரமாக வச்சு இருக்காங்க பாருங்க இதை வெளியில் சொன்னால் வெட்கக்கேடு இதுக்குத்தான் நான் பல விசயங்களை வெளியில் சொல்வது கிடையாது.

அப்புறம் அந்த சூடானி மூதேவி சப்பாத்தி ருசியை கண்டது மறுநாளும் சப்பாத்தி கேட்டது ஸபாத்தி அல்ல... மேலும் மற்ற சூடானிகளுக்கும் ருசியின் பக்குவம் சொல்ல, தினமும் எஜிப்தியன் உணவான ஜாத்தர், ஜிப்னே, பலாப்ஃபில், ஃபூல் தின்பதை மறந்து விட்டு எல்லா சூடானி, பாலஸ்தீனி நாக்குகளும் சப்பாத்தியே கேட்டது.

மறுதினம் நானும் மலையாளியிடம் பேரம் பேசினேன்..

இங்கே பார் தினமும் இருபது சப்பாத்திக்கு மேல் தேவைப்படும் எனக்கு காலை டிஃபன் கொடுத்தால் வர்றேன் இல்லைனா... வேற கடைக்கு போறேன்.

பரவாயில்லை அண்ணா நீ வந்ததும் சாப்பிடு உனக்கு ஃப்ரீ பிறகு வாங்கிக்க, மற்ற புட்டு, கட்டதோசை, ஆப்பம், கடலை எல்லாம் அரபிகளுக்கு சொல்லிக்கொடு.

..

காணொளி