உண்மையை உடையப்பா

 ஓர் வெற்றிகரமான திரைப்படம் எடுப்பதற்கு அடித்தளம் எது ? கதைக்களம் உண்மைதானே... அதாவது கதாசிரியர் அதற்கு முன் பணம் வேண்டும் என்பது வேறு விடயம். பிறகு கூத்தாடன், கூத்தாடி, இயக்குனர், ஒளிப்பதிவாளர், ஒலிப்பதிவாளர், புகைப்படக்காரர்கள், வசனகர்த்தா, நடன இயக்குனர், சண்டைக்காட்சி அமைப்பாளர், பாடலாசிரியர், இசையமைப்பாளர், பாடகர், பாடகி, இன்னும் எத்தனையோ தொழில்நுற்ப கலைஞர்கள் இணைதல் வேண்டும்.
 
கதாசிரியர் கதை எழுதி எல்லோருக்கும் பிடித்தவுடன் பெயர் சூட்டுவார்கள் எப்படி ? கதையோடு இணைந்து, இசைந்து வருவது போல்தான் வைப்பது வழக்கம். இதில் முக்கியமானவர் தயாரிப்பாளர் என்னும் முதலாளி. இவர்கள் இல்லை என்றால் திரைப்படத் தொழில் கிடையாது இதுதான் மறுக்க முடியாத உண்மை. ஆனால் இன்றைய நிலைப்பாடு என்ன ? கசாநாயகன் என்பவர்கள் நடிப்பார்கள் இவர்கள் முதல் படத்தில் தயாரிப்பாளரிடம் பவ்யமாக இருப்பார்கள். இந்த அத்தனை தொழிலாளிகளின் உழைப்பில் திரைப்படம் வெற்றி பெற்று விடுகிறது என்று வைத்துக் கொள்வோம்.
 
அந்தப்படம் தமிழகத்தில் வாழும் வேலையில்லாத இளைஞர்கள் என்னும் அறியாமைகளால் கசாநாயகனுக்கு மன்றங்கள் அமைப்பார்கள் இதனுடைய முதலாவது முதல் யாருடையது தெரியுமா ? இந்த அறியாமைகளின் தந்தையர்களின் உழைப்பு. பிறகு இவர்கள் அந்தக் கசாநாயகனைத் தேடி சென்னைக்கு போவார்கள், நாங்கள் உங்களது தீவிர ரசிகர்கள் மன்றங்கள் அமைக்கிறோம் நீங்கள் வந்து திறந்து வையுங்கள். என்றதும் அவனுகளும் உங்களைத்தான்டா எதிர்பார்த்தேன் என்று அவர்களுக்கு கொஞ்சம் பணமும் கொடுத்து குறிப்பிட்ட தேதியில் வந்து திறப்பு விழா நடத்தி விட்டு போவதுதான் கடைசி அடுத்த படமும் வெற்றி.
 
பிறகு இவனது படங்களுக்கு பதாகைகள் வைப்பதும், பாலூற்றுவதும், அதனால் சிலர் தனக்கே பாலூற்றிக் கொண்டு தன்னை பாழாக்கி கொள்வதும் கடந்த நாற்பது ஆண்டுகளாக தமிழர்கள் செய்து வருகிறார்கள். அந்தக் கசாநாயகன் சம்பளத்தை படிப்படியாக உயர்த்தி கோடிகளை கடந்து போய்க் கொண்டே........... இருக்கிறான். இவன் நிறுத்த மாட்டான் காரணம் அறியாமை ரசிகர்கள். ஊர் முழுக்க மட்டுமல்ல, உலகம் முழுக்க தனது பணத்தை முதலீடு செய்வான். சரி இவனது இன்றைய நிலைப்பாடு என்ன தெரியுமா ?
 
முதலில் இவனை வைத்து படம் எடுத்தாரே... அவர் இவனது படப்பிடிப்பு தேதிக்காக அலைந்து கொண்டு இருப்பார். இவனுக்காக வசனகர்த்தாக்கள் பஞ்ச் டயலாக் என்ற பெயரில் அரசியல் பிரவேசம் செய்வது போல எழுதிக் கொடுப்பார்கள். இவர்கள் மட்டுமா ? பாடலாசிரியர்களும் இவனுகளுக்காக தனது அறிவை, புலமையை இந்த அறிவற்ற ஜீவிகளுக்காக மனசாட்சியை அடகு வைத்தோ அல்லது கிரையத்துக்கோ இவனுகளிடம் கொடுத்து விடுவார்கள். நானறிய பண்டைய அரசர் காலம் முதல் இந்தப்புலவர்கள் தனது வயிற்றுப்பசிக்காக அறிவை விற்றே வாழ்ந்து வந்து இருக்கின்றார்கள். அதனுடைய வம்சா வழியே இந்தக்கால கவிஞர்களும் இவ்வழி வாழியவே இவர்களது செயல் என்று சொல்ல வலிக்கிறது எம் மனம்.
 
சரி இதெல்லாம் கசாநாயகன் சொல்வதை கேட்டே ஆகவேண்டும் என்ற நிலைப்பாட்டுக்குள் வந்து நிற்கிறது. அதாவது இவர்களின் திட்டத்தைப்பற்றி மூத்த பத்திரிக்கையாளர் திரு சவுக்கு சங்கர் அவர்கள்தான் அடிக்கடி சொல்வார். ரிடையர்ன்மெண்ட் ஜாப் ஆம் அதாவது தனது திரைப்பட மார்க்கெட் சரிந்து விட்டால், அடுத்த வருமானத்திற்காக மட்டுமல்ல, தனது சம்பாத்தியத்தை பாதுகாத்துக் கொள்ளும் திட்டம்தான் இந்த அரசியல் வருகைக்கான வார்த்தை ஜாலங்கள். இதன் வல்லமை நமது விசிலடிச்சான் குஞ்சுகளுக்கு புரியாது காரணம் இவர்கள் குஞ்சுகள். சமீபத்தில் ஒர் கட்டுரையில் படித்த வாசகம் ஞாபகம் வருகிறது இதோ...
 
//திரைப்படக் கூத்தாடிகள் சொன்னால் மலத்தைக்கூட சர்க்கரைப் பொங்கல் என வாங்கி சாப்பிடும் ஒரு பெருங்கூட்டம் இங்குதான் உள்ளது//
 
முன்பு நிகழ்ந்த நிகழ்வு இவர்தான் கசாநாயகன் என்று தீர்மானம் கசாவும் வந்து அமர்ந்து இருக்கிறார் கூட்டம் எதற்காக தெரியுமா ? பெயர் சூட்டுவதற்கு எத்தனையோ நபர்கள் எவ்வளவோ பெயர் சொல்கிறார்களாம் கசாவிடமிருந்து இசைவு வரவில்லை. காலையில் தொடங்கியது மதிய உணவும் வந்து எல்லோரும் உண்டு களித்தாகி விட்டது மீண்டும் கூட்டம் ஆரம்பம். எவ்வளவோ நபர்கள் எத்தனையோ பெயர் சூட்டுகிறார்களாம். கசாவிடம் இசைவில்லை. திடீரென்று கசா எழுந்து நிற்கிறார் எல்லோரும் திகைத்து பார்க்கிறார்களாம். வடையப்பா அவ்வளவுதான் வாயிலிருந்து முத்து உதிர்ந்ததும் கூட்டம் ஆர்ப்பரித்ததாம் கசா வெளியேறி ஃபாரின் பென்ஸில் ஏறி பறந்து விட்டாராம்.
 
உடனே கதைக்குழுவினர் வடையப்பாவை சுடத் தொடங்கினார்களாம். அந்தப் படத்தையும் மகா வெற்றி பெறத்தானே வைத்தோம். இதிலிருந்து என்ன தெரிகிறது ? மக்களை மாக்கான்களாக இந்த திரைப்படக் கூத்தாடிகள் நினைத்துக் கொண்டு சொகுசு வாழ்க்கை வாழ்கிறார்கள். கதைக்குத்தானடா பெயர் வைக்க வேண்டும், பெயருக்கு கதை எழுதுறீங்களேடா... ரொம்ப படுத்தாதீங்கடா... எங்களுக்கு மனசு வலிக்குதுடா தமிழனை மனுஷனாக பாருங்கடா...
 
Chivas Regal சிவசம்போ-
நேர்ல, உட்கார்ந்து பார்த்தது போலவே சொல்றாரே.. இதைத்தான் கூட்டதுல கட்டிச் சோற்றை அவுத்து விடுறதுனு சொல்றது.

 

காணொளி

Share this post with your FRIENDS…