ஜேம்ஸ் ஊரணி

Themes River in England

(மேலே இருப்பதை சொடுக்கினால் தண்ணீருக்குள் தள்ளி விடுவர்)

 
அந்த பெண்ணை வெகு காலமாக
தொடர்ந்து கவனித்து வருகிறேன்
அவளை பார்க்கும் போதெல்லாம்
சிரிக்கின்றாள். நானும் இன்று
கேட்டு விடுவோம் என்ற முடிவு
கட்டி அருகில் சென்றேன். பெயர்
என்ன ? என்றேன் பே.. பே... பே...
என்றாள் உடன் நகர்ந்து விட்டேன்.
ச்சே இதற்காகவா மூன்று வருசம் ?
* * * * * * * 01 * * * * * * *
 
அந்த இடத்துக்கு தினமும் போகும்
போதெல்லாம் கேட்டில் பூட்டு
தொங்கியது ஆகவே ஒருநாள்
கேட்டின் அருகில் சென்று உள்ளே
எட்டிப் பார்த்தேன், அந்த நேரத்தில்
அங்கு வந்த பெரியவர் தம்பி
யார் வேண்டும் ? என்றார் கேட்
பூட்டி இருக்கே.... அதான் பூட்டி
ஒரு வருசமாச்சே என்றார்.
* * * * * * * 02 * * * * * * *
 
அந்த திரையரங்கத்தின் சுவரொட்டி
ஒட்டும் இடத்தை தினமும் பார்த்து
வந்தேன், புதிய படம் மாற்றவே
இல்லை. இது நல்ல படம்தானே
ஒருநாள் உள்ளே போய் கேட்கலாம்
என்று போனால் வாசலில் பூட்டு
தொங்கியது. என்னவென்று கேட்டேன்
அதான் பூட்டி பத்து வருசமாச்சே...
நான் பார்த்த அந்த படம் விஸ்வரூபம்.
* * * * * * * 03 * * * * * * *
 
அந்த சோபாவில் அமர்ந்து ரிமோட்டை
எடுத்து தொலைக்காட்சியை ஆன்
செய்தேன். வெகுநேரமாக இருந்தேன்
காட்சிகள் வரவேயில்லை. மாலதி
ஏன் படமே வரவில்லை ? என்றேன்
அதட்டலாக, என்னை மேலிருந்து
கீழ் ஒரு மாதிரியாக பார்த்தவள்
அதான் கரண்டு போய் ஆறு மணி
நேரமாச்சே... ச்சே அதான் தெரியலை.
* * * * * * * 04 * * * * * * *
 
அந்த பூங்காவில் உட்கார்ந்திருந்தேன்
அவள் என்னை பார்த்துக் கொண்டே
இருந்தாள். எனது மனம் ஏதேதோ
சொல்லியது பக்கத்தில் போய் கேட்டு
விடலாம். தைரியமாக சென்றேன்
சிரித்துக் கொண்டே என்ன விசயம்
என்றேன் பத்து வருசத்துக்கு முன்பு
செத்துப் போன சித்தப்பா மாதிரி
இருக்கீங்க... ச்சீ... மானக்கேடு.
* * * * * * * 05 * * * * * * *
 
அந்த டேபிளில் இருந்த எல்லா
டெண்டர் பேப்பர்களையும் திருத்தம்
செய்த பிறகு பியூன் பிரசாத்துக்கு
பெல்லை தட்டினேன், வந்தவுடன்
இந்த டெண்டரை எல்லாம் போஸ்ட்
செய் என்றதும் சார் இதெல்லாம்
ஸ்டாப்புக்கு வந்த லட்டர் பிறகு.
புரிந்தது நான் கண்ணாடி போடாதது
எல்லாமும் பிரித்து விட்டோமே...  
* * * * * * * 06 * * * * * * *
 
அந்த வானத்தைப் போல மனம்
படைச்ச மன்னவனே இளையராஜா
டிவியில் பாடிக்கொண்டு இருந்தார்.
நாமும் சேர்ந்தே பாடுவோம் என்று
மெய் மறந்து பாடிக்கொண்டு இருந்தேன்.
திடீரென்று ஏன் இசையை காணோம் ?
எதிரில் மனைவி டிவியை ஆஃப்
செய்து விட்டு நீங்க பாடுங்க கரண்டு
செலவாவது மிச்சமாகும் என்றாள்.
* * * * * * * 07 * * * * * * *
 
அந்த புத்தகத்தை தூக்கி எறிந்தேன்
வந்து நின்ற மனைவி புத்தகத்தை
எதுக்கு வீசுறீங்க ? என்னடி கதையிது
ஒண்ணுமே புரியமாட்டுது குனிந்து
புத்தகத்தை எடுத்து பார்த்தவள்
என்னை முறைத்து விட்டு சொன்னாள்.
வாங்கிட்டு வரும் போது பார்க்கிறது
இல்லையா ? குஜராத்தி புத்தகத்தை
வாங்கிட்டு வந்தால் எப்படி புரியும் ?
* * * * * * * 08 * * * * * * *
 
அந்த கடையில் நான் வைத்திருந்த
அறுநூறு ரூபாய் நோட்டை கொடுத்து
சில்லறை கேட்டேன். அவனும் உடனே
கொடுத்து விட்டான். அப்பாடா நம்மிடம்
வந்த கள்ள நோட்டை மாற்றி விட்டோம்.
வேகமாக இடத்தை காலி செய்தாச்சு
சந்தோஷமாக வீட்டுக்கு வந்து பார்த்தால் ?
இரண்டு முன்னூறு ரூபாய்த்தாள்கள்
இதை வைத்து நான் என்ன செய்வது ?
* * * * * * * 09 * * * * * * *
 
அந்த ஊரணியோரம் அழகிய
நடைபாதையில் அலைபேசியில்
மெலிதான சப்தத்தில் தியாகராஜ
பாகவதர் பாடலைக் கேட்டுக்
கொண்டு போனபோது திடீரென்று
ஒரு குரல் நான் தேம்ஸ்ல குதிக்கப்
போறேன். என் மனசு சொன்னது இது
நடக்காது பொய்யான வார்த்தை
எத்தனை வருசமாக கேட்கிறோம் ?
* * * * * * * 10 * * * * * * *
 
கில்லர்ஜி தேவகோட்டை 

Share this post with your FRIENDS…