மதங்களின் சடங்குகள்

 

இறைவனிடம் வேண்டுதல் வைக்கும் மனிதர்கள், தன்னை செல்வந்தனாக்கு என்றும், தங்களது பிள்ளைகளுக்கு நல்ல கல்வியை கொடுத்து நல்ல வாழ்க்கையை கொடு என்றும், நல்ல மாப்பிள்ளை, பெண்ணைக்கொடு என்றும் மனதுள் மனமுருகி கேட்கிறோம்.
 
அவர் கொடுப்பாரா ? மாட்டாரா ? என்பது வேறு விடயம் ஆனால் யாராவது எனக்கு நல்ல வாழ்க்கையை கொடுத்தாய் அதேபோல எனக்கு நல்ல மரணத்தை கொடு என்று கேட்டு இருக்கிறோமா ? நான் வெகு காலமாகவே மனதுள் இதைத்தான் கேட்டு வருகிறேன் எனக்கு அழகிய மரணத்தை கொடு இறைவா என்று. விஞ்ஞான வளர்ச்சி மனிதனுக்கு எவ்வளவு வினோதமான மரணங்களை கொடுக்கிறது. கொரோனா உலக மக்கள் முதன் முதலாக சந்தித்த ஓர் கொடுமையான மரணம்.
 
நடப்பது எல்லாம் நன்மைக்கே என்பது நமது முன்னோர் வாக்கு. கெடுதலிலும் ஓர் நன்மை பயக்கும் என்பதே இதன் உள்ளார்ந்த அர்த்தம். கடந்த ஒரு வருடத்துக்கு முன்பு எனது தனிமை வாழ்வின் கொடுமையை விரட்ட வெளிநாடு செல்லலாம். என்று தீர்மானித்து ஏற்கனவே போகாத நாடாக தேர்வு செய்தேன் அதாவது தமிழர்கள் அதிகம் இல்லாத நாடாக, அதன்படி எனது நண்பனை தொடர்பு கொண்டேன். அவனொரு பாலஸ்தீனி அபுதாபியில் நட்பானவன், வா உனக்கு வேண்டிய உதவிகளை செய்கிறேன் என்று சொன்னான். கடவுச்சீட்டு காப்பி, புகைபடம், பிற தகவல்கள் எல்லாம் அனுப்பி விட்டேன்.
 
நானும் புறப்படுவதற்கு ஆயத்தமானேன், பிறகு அவனை தொடர்பு கொள்ளும்போது எனக்கு கொஞ்சம் வேலைப்பளு சற்று பொறு என்றான். குடும்பத்திலும் ஒரு சிக்கல் என்னை போகவிடாமல் தடுத்துக் கொண்டே வந்தது. எனது முயற்சிகளை சற்றே தளர்த்தினேன். இச்சூழலில்தான் துருக்கி நாட்டில் பூகம்பம் இரண்டாயிரம் கட்டிடங்கள் இடிந்து தரைமட்டமாயின, கணக்கில் அடங்காத, பல்லாயிரம் மக்கள் மாண்டு விட்டார்கள். எனது நண்பனுக்கு அழைத்தால் அவன் எடுக்க மறுக்கிறான் காரணம் எனக்கு விளங்கவில்லை. நான் போக முயற்சித்த நாடு துருக்கி.
 
அங்கு நிகழ்ந்த கொடூரங்களை காணொளியில் காணும்போது மனம் பதறுகிறது. மனித வாழ்வின் மரணம் அழகாக கிடைக்க வேண்டும். சாலையில் கேபிள் பதிப்பதுபோல இயந்திரங்களால் நீளமாக குழிகள் தோண்டி அவைகளில் மனித சடலங்களை நெகிழி பைகளில் தூக்கிப் போடுவதை காணும் துர்பாக்கிய நிலை. ஏதேதோ மதவாதம் பேசுகிறோம், பிரிவினை பேசுகிறோம், இங்கு குழிகளில் இடும்போது அந்த மதங்களின் சடங்குகள், சம்பிரதாயங்கள் எங்கே போயிற்று ?
 
மனிதா மரணம் அழகாய் வேண்டும்
அதற்கு இறைவன் ரசிக்கும்
அழகியலாய் நீ வாழ வேண்டும்.
நீ மனிதத்தோடு வாழ் மரணமும்
உனக்கு மகிழ்வாய் அமையும்.
 
இறைவா உலக மக்கள் அனைவருக்கும் இனியெனும் அழகிய மரணம் கொடு
கில்லர்ஜி தேவகோட்டை

 

காணொளி

Share this post with your FRIENDS…