ஆண் மோகப்பணி

புஸ்டாக் சுவாமிகள் இவரைத் தெரியாதவர்களே இருக்க முடியாது சுற்றியுள்ள பதினெட்டு பட்டிகளுக்கும் இவர்தான் அருள் வாக்கு சொல்வார். வீட்டில் நடக்கும் திருமணம், பூப்புனித நீராட்டு, காதுகுத்து, வீடு வாங்குவது, கிரஹப்பிரவேசம், புண்ணியானம், வளைகாப்பு, ஏன் சுன்னத் கல்யாணம்கூட இவர் சம்மதம் சொன்னால்தான் செய்வார்களாம், இதில் சில நேரங்களில் வளைகாப்பு வேண்டாம் என்று சொன்னாலும், குழந்தை பிறந்த பிறகு வளைகாப்பு நடத்துவார்களாம்.

 

அதே நேரம் இவர் நமது கேள்விகளுக்கு எடக்கு மடக்காக, ஏணி மடைக்கு ஏதோவொரு மடை என்பது போல் பதில் சொல்வாராம் நாம்தான் இதை பக்குவமாக புரிந்து கொண்டு செயல் படணுமாம். உதாரணத்துக்கு மகனுக்கு திருமணத்திற்கு நல்லநாள் குறித்து கொடுங்கள் சுவாமி என்று கேட்டால், உனது வீட்டை பூட்டி சாவியை ஆத்தா காலடியில் போட்டு விட்டு வாடகைக்கு குடியேறுவதே உத்தமம் என்பாராம். உடனே இவர்களும் அதன்படி செய்வார்களாம்.

 

மறுமாதம் பார்த்தால் அந்த வீட்டில் இளவயது வடநாட்டு பெண்மணி குடியிருப்பாராம். நீங்கள் யாரென்று ? கேட்டால் நான் சுவாமிகளுக்கு பால் காய்ச்சி கொடுப்பதே என் பணி என்று கொஞ்சு தமிழில் தத்தக்கா புத்தக்கா என்று சொல்வாராம். வாயிலில் சுவாமிகள் ஆசீர்வாதம் செய்வது போல் புகைப்படம் இருக்குமாம். அதையும் வணங்கி விட்டு செல்வார்களாம்.

 

ஒருமுறை கிழக்குத்தெரு கிருஷ்ணமூர்த்தி தனக்கு குழந்தை பாக்கியம் இல்லாததால் இரண்டாவது திருமணம் செய்யலாமா ? என்று கேட்டதற்கு செய்யலாம் ஆனால் வீட்டிலிருக்கும் கறவை மாடுளை அதை பராமரிப்பவரோடு ஆஸ்ரமத்தில் கொண்டு வந்து கட்டுவது உத்தமம் என்று சொல்ல, அதன்படி செய்து இருக்கிறார் கிழக்குத்தெரு கிருஷ்ணமூர்த்தி. கறவை மாடுகளை பராமரிப்பவர் அவரது முதல் மனைவி முத்தம்மாளாம்.

 

இதேபோல் ராக்கப்பன் மகன் துபாயிலிருந்து அனுப்பிய பெரிய எல்.ஈ.டி டெலிவிஷனை வடக்கு திசையை நோக்கி பார்க்கலாமா ? என்று கேட்டதற்கு ராக்கப்பனின் மனைவி பெயரில் இருக்கும் புஞ்சை நிலத்தை சிவனாண்டியின் கொழுந்தியாள் கொடிமலர் பெயருக்கு பத்திரம் போடச்சொல்ல உடனே அப்படியே செய்தார்களாம். கொடிமலர் ஆஸ்ரமத்தின் வரவு செலவு கணக்கு பார்க்கும் ஆடிட்டராக பணியை செவ்வனே செய்பவராம்.

நாகப்பன் தனது மகனை சவூதி அரேபியாவுக்கு அனுப்பி விட்டு பீ.சி.பீ.சி.டி.சி வங்கியில் கணக்கு துவங்கலாமா ? என்று யோசனை கேட்டதற்கு சுவாமிகள் ஆத்தாளிடம் கேட்டு தவறு இந்த எண்ணுக்கு பணத்தை போடச்சொல். என்று புதிய வங்கியான ஆர்.ஓ.எஸ். வங்கி எண் 1000 0068 2487 2155 கொடுத்து இதில் போடுவதே உத்தமம் என்று சொல்லி இருக்கிறார். அதன்படியே நாகப்பனும் செய்ய, அந்த எண்ணின் வாடிக்கையாளர் பென்னி கடோர்ஸி என்ற நெதர்லாந்து பெண்மணியாம் இவர் கடந்த ஆறு ஆண்டுகளாக ஆஸ்ரமத்தில் ஆன்மீகப்பணி செய்கிறாராம்.

 

கில்லர்ஜி அபுதாபி

 

காணொளி