9 தாராவுக்கு 18

வணக்கம் கவிஞரே... தங்களது பாடலில் மக்களுக்கு நல்ல கருத்துகளை சொல்லும் தாங்கள் நல்ல வரிகளில் மட்டும் ‘’பீப்’’ மட்’’டண்’’ போன்ற ஓசையைக் கொடுத்து கேட்க முடியாமல் செய்வது ஏன் ?

மக்களிடம் எப்பொழுதுமே எதிர்பார்ப்பை திணிப்பவனே நல்ல கலைஞன் ஆகவே நானும், இசை வேந்தனும், பாடகரும் இணைந்தே இவ்வகையான புதுமைகளை செய்கின்றோம்.

இதனால் எதிர்கால சந்ததிகளுக்கு பலன் உண்டா ?

நிச்சயம் உண்டு இதன் மூலம் கெட்ட வார்த்தைகள் ஒழிந்து இனி மக்கள் உச்சரிக்கும் அனைத்து சொற்களுமே நல்ல வார்த்தை என்று உயர்வு பெற்று விடவேண்டும் இதுவே எங்களது நோக்கம்.

இப்பொழுது வரும் இசையை கேட்பவர்களுக்கு செவி சேதமாகிறது என்று இங்கிலாந்திலிருந்து வரும் புள்ளி விபர கணக்கு ஒன்று சொல்கிறதே, இதனைப்பற்றி....

இதுதான் எங்கள் வெற்றியின் முதல்படி செவி கேட்பதாலேயே பிரச்சினைகளை கேட்டு சில மனிதர்களுக்கு கோபம் வருகிறது இதன் விளைவாய் சண்டைகள், சச்சரவுகள் வந்து வாழ்க்கையே சிலருக்கு பாதிக்கப்படுகிறது கோபத்தை கட்டுப்படுத்துவதே எங்கள் நோக்கம் ஆகவே இது எதிர் காலத்துக்கு தேவையே.

சமூக வளர்ச்சிக்காக தொண்டு செய்ய நினைக்கும் தங்களுக்கு இதனால் பலனேதும் உண்டா ?

பலனைப்பற்றிய கவலை எங்களுக்கு எப்பொழுதுமே கிடையாது வேண்டுமானால் ஒன்று சொல்லலாம் சமீபத்தில் வெளியாகி மிகப்பெரிய வெற்றி பெற்ற 9 தாராவுக்கு 18 திரைப்படத்தில் பாடல் எழுதிய எனக்கு ’’சொற் கொல்லன்’’ பட்டமும், இ(ம்)சை கொடுத்த சனிருத்தனுக்கு ’’செவிக்காலன்’’ பட்டமும், பாடகர் விம்புக்கு ’’சங்கொலி’’ பட்டமும் கிடைத்து இருக்கின்றதே இதைவிட பெருமை வேறென்ன ?

தற்போது  வெளியான புஷ் திரைப்படத்தில் நாயகி அழகான இதழ்களால் உச்சரிப்பை கொடுத்து விட்டு சப்தம் மட்டும் வராமல் தடுக்கப்பட்டு இருக்கின்றது அந்த வார்த்தை என்ன ? என்று தெரியாமல் கல்லூரி மாணவ-மாணவிகள் குழம்பி போய் இருக்கிறோம் ஆகவே உடனே அந்த வார்த்தையை முழுமையாக கொடுக்காதவரை கல்லூரிகளை புறக்கணிப்போம் என்று ஆர்ப்பாட்டத்தில் ஈடுபடுகின்றார்கள் குறுகிய காலத்தில் கட்சியை ஆரம்பித்து அரசியலில் ஈடுபட்டு முதல்வராக வரவிருக்கும் தங்களுக்கு இது பாதிப்பை தராதா ?

அதுவொன்றும் பெரிய காரியமில்லை நாளை முதல் புஷ் படத்தின் ஆடியோ கேஸட் இலவசமாக கொடுக்கப் போகிறோம் தமிழக மக்களின் ஒட்டு மொத்த ஓட்டும் எங்களுக்கே பிறகு உல்லாச உலகம் எனக்கே சொந்தம் தையர... தையர... தையரா...

புதிய படங்களில் ஏதாவது புதுமை வகுத்து இருக்கின்றீர்களா ?

ஆம் அடுத்த வாரம் வெளியாகும் கிஸ்ஸிங் ஸ்டார் கில்ஜி நடித்த ‘’வகுந்துடுவேன்டா’’ திரைப்படத்தில் 9 தாராவுக்கு 18 படப்பாடல்கள் மாதிரியே 7 பாடல்கள் வருகிறது இது ரசிகர்களுக்கு நிச்சயம் நல்ல விருந்தாக அமையும்.

ஒலிநாடா வெளியீடு என்று கேள்விப்பட்டோமே... ?

ஆமாம் நானும், நண்பர் சனிருத்தும் இணைந்து 250 பாடல்கள் அடங்கிய் அல்பம் என்ற ஆல்பம் தயார் செய்துள்ளோம் இதன் வெளியீட்டு விழா செலவை அமெரிக்காவில் இயங்கும் டமில்ச் சங்கம் ஏற்றுக்கொண்டுள்ளது.

சமீபத்தில் குடிமகன்கள் அமைப்பிலிருந்து தங்களது பாடல்களுக்கு எதிர்ப்பு கிளம்பியதே எங்களைப் போன்ற பேதை உள்ளங்களுக்கு தங்களது பாடல் வரிகளில் போதை இல்லை இதன் காரணமாக தேர்தலில் தங்களது கட்சியை புறக்கணிப்போம் என்று அறிக்கை விட்டு இருந்தார்களே இவர்களை சமாளிப்பது எப்படி ?

அதை மிகவும் சுலபமாக சமாளிப்போம் கள்’’ளட்டை என்ற கார்டு ஸிஸ்டம் தயாரித்து இருக்கின்றோம் மே 10-ம் தேதி முதல் குடிமகன்கள் அமைப்புகளுக்கு மாவட்ட வாரியாக அனுப்பி வைக்கப்படும் அமைப்பின் வழியாக கார்டுகள் வழங்கப்படும் இந்த கார்டுக்கும் டாஸ்மாக் கடைகளுக்கும் உகாண்டா நாட்டிலிருந்து கணைக்டிங் பீப்புள்ஸ் இணையதளம் மூலம் செயல்பாடு உண்டு தேர்தலுக்கு முதல் நாள், தேர்தல் நாள், மறுநாள் 3 தினங்கள் இந்த கார்டை குடிமகன்கள் இலவசமாக உபயோகப்படுத்தி கொள்ளலாம் இதன் மூலம் குடிமகன்களின் வாக்கும் எங்களுக்கே சொந்தம்.

நல்லது தங்களது அறிவும், ஆற்றலும், இந்த மக்களுக்கு, ஈர்ப்பை, உண்டு செய்து ஊக்கமளித்து, என்றும் மக்கள், ஏற்றம் பெறுவதில், ஐயமில்லையென, ஒலிக்கட்டும், ஓங்கியென ஔவையாரும் குரல் கொடுக்க எமது வாழ்த்துகள்.

நன்றி வணக்கம்.

சிவாதாமஸ்அலி-

81 வயசு ஆனாலும் இவங்கே 18 தான் சொல்லுவாங்கே...

குறிப்பு - இந்தப்பதிவு சிலருக்கு கோபத்தை தரலாம் நகைச்சுவைக்காக நான் எழுதினாலும் இது எனது மனதில் தோன்றிய வேதனையை வெளிப்படுத்தவே இப்படி எழுதினேன் காரணம் நமது சமூக கோபங்களுக்கு மழைக்காலங்களில் பிறக்கும் ஈசலைப் போன்று ஆயுசு மிகவும் குறைவாகவே இருக்கின்றது இதோ தேர்தல் வந்து விட்டது மக்கள் இலவசத்துக்கு மயங்கி பேரிடரையும் மறப்பார்கள் நமது மக்களை அரசியல்வாதிகளும், திரையுலகத்தினரும் மிகச்சரியாக புரிந்து வைத்துள்ளனர் நாம்தான் இன்னும் புரியா மடந்தையாக வாழ்கிறோம் - கில்லர்ஜி.

 காணொளி