கொழுஞ்சியும், கொங்குமலையும்

வணக்கம் ஐயா கொங்கு மலையார் அவர்களே சமூக ஆர்வலரான தங்களிடம் பேட்டி காண்பதில் எங்களது கொழுஞ்சி பத்திரிக்கை பெருமிதம் கொள்கிறது பேட்டியை ஆரம்பிக்கலாமா ?
நன்று நல்லதே நிகழட்டும் கொழுஞ்சிக்கு எமது வாழ்த்துகளோடு...
 
ஐயா இன்றைய இளைய சமூகம் சரியான பாதையில் செல்வதாக தாங்கள் கருதுகின்றார்களா ?
அதற்கான காலங்கள் வந்தால் ? நிச்சயம் சொல்கிறேன்.
 
அந்தக் காலங்களுக்கான சூழல் எப்படி இருக்கும் ?
வடநாட்டவர்களின் வரவு தமிழகத்தில் குறைந்து இருக்கும்.
 
வடநாட்டவர்களின் வருகை குறைவுக்கும் இளைய சமூகத்தினரின் பாதை சரியாக செல்வதற்கும் ஏதும் பந்தம் இருக்கிறதா ?
நிச்சயமாக, அன்று அலைபேசிகளின் உபயோகம் குறைந்து இருக்கும், எல்லோருக்கும் வேலை வாய்ப்பு கிடைத்து மக்கள் சுபிட்சமாக வாழ்வதற்கான அறிகுறிகள் தென்படும்.
 
அரசியல் விழிப்புணர்வு அன்றைய சூழலில் மக்களுக்கு எவ்வாறு ஈடுபாடு இருக்கும் ?
வாரிசு அரசியலுக்கு மக்கள் வாக்களிப்பதை நிறுத்தி விடுவார்கள், இளைஞர்களும், வேலை இல்லாதோர்களின் குறைவு காரணமாக வாழ்க என்ற வெட்டி கோஷத்தை மக்கள் மறக்க ஆரம்பித்து விடுவார்கள். நெடுஞ்சாலைகளில், தெருக்களில், சந்து பொந்துக்களின் முனைகளில் மக்களுக்கு இடையூராக கொடிக்கம்பங்கள், தலைவர்கள் பெயர் பொறித்த சிறிய கல்வெட்டுக்கள் இருக்காது.
 
திரைத்துறையினரின் வாழ்வாதாரம் எப்படி இருக்கும் ?
சாலையில் செல்லும்போது ரசிகர்கள் தங்களிடம் கையெழுத்து கேட்காததாலும், செல்ஃபி எடுக்க விரும்பாததாலும், முன்பு போல மக்கள் தியேட்டர்களுக்கு செல்லாததாலும், பதாகைகளுக்கு பாலூற்றாததாலும், தயாரிப்பாளர்களும் வேறு தொழிலுக்கு சென்று விடுவது பெறுகி விட்டதாலும் பூவாவுக்கு வழியின்றி தாங்களும் சிறுகுறு தொழில் செய்தும் பிழைப்புத் தேடியும் அலைவார்கள்.
 
கிரிக்கெட் விளையாட்டாளர்களின் நிலைப்பாடு எப்படி இருக்கும் ?
அவர்களுக்கு எப்படி இருக்கும் ? இளைஞர்களுக்கு விழிப்புணர்வு பெற்ற காரணத்தால் இவர்களின் வாழ்வு நிலையும் மாறிவிடும்.
 
தமிழகத்தில் காவல்துறையினரின் செல்பாடுகள் சிறப்பாக இருக்கிறதா ?
சமிக்ஞை திடலில் சாலையின் எல்லைக் கோட்டைத்தாண்டி நின்று எதிர் சாலையிலிருந்து வரும் வாகனங்களை மறைத்துக் கொண்டு நிற்பவர்களை அதே இடத்தில் நிற்கும் காவலர்கள் அபராதம் விதிக்காமல், மூத்திரச்சந்தில் பத்துக் கிலோ மீட்டர் வேகத்தில் வரும் இரு சக்கர வாகனங்களை நிறுத்தி தலைக்கவசம் அணியாததற்கு அபராதம் விதிப்பது என்று நிற்கிறதோ அன்றுதான் சிறப்பாக செயல்படுவதாக சொல்வேன்.
 
தலைக்கவசம் அணிவது மக்களின் உயிர் பாதுகாப்புக்காக நீதிபதிகள் இயற்றிய சட்டம்தானே ஐயா ?
இந்த சட்டத்தை இயற்றிய நீதிபதிகளை பத்து தினங்களுக்கு தலைக்கவசம் அணிந்து இரு சக்கர வாகனத்தை பயன்படுத்தச் சொல்லுங்கள் பார்க்கலாம், அவர்கள் குளிரூட்டப்பட்ட மகிழுந்தில் சென்று வருபவர்கள் அவர்களுக்கு அடிப்படை மக்களின் வேதனைகள் புரியாது.
 
இந்நிலையை மாற்றுவது மக்களின் மனப்போக்கு மாறினால்தானே ?
நிச்சயமாக மாற்றம் வந்தாலே இவைகள் சாத்தியமாகும்.
 
மருத்துவமனைகளின் செயல்கள் தற்போது மிகவும் கொடூரமாக இருப்பதாக மக்கள் சொல்கிறார்கள் ஆட்சி மாற்றம் வராவிட்டால் மருத்துவத்துறையின் செயல்கள் இனிமேல் எப்படி இருக்கும் ?
மருத்துவமனைக்கு வருபவர்களின் உயிருக்கு உத்திரவாதம் இல்லை என்று நாம் முதலில் அவர்கள் தரும் அட்டவணையில் கையெழுத்து போட்ட பிறகே உள்ளே நுழைய முடியும் என்ற நிலைப்பாடு நிச்சயமாக வரும். மக்களும் மறுப்பு சொல்ல முடியாது காரணம் எங்கும் இதேநிலைதான் நோயாளிகளின் உடல் உறுப்புகள் மருத்துவர்களால் திருடப்படும், இதை எதிர்த்து நீதிமன்றம் செல்லவும் முடியாது காரணம் மருத்துவமனையை நடத்துபவர்கள் அனைவருமே ஆளுங்கட்சியினர்தான். அப்படியே போனாலும் நோயாளிக்கு திதி கொடுத்த பிறகும் வழக்கு தொடரும்...
 
அரசியல்வாதிகளின் ஊழல்கள் எந்த நிலைவரை போகும் ?
இனி வரும் காலங்களில் மக்களின் பணத்தை அவர்கள் மில்லியன் கணக்கில் கொள்ளை அடிப்பார்கள், விலைவாசிகள் மேலும் உயர்ந்து கொண்டே போகும்.
 
நல்லது ஐயா நேரத்தை எங்களுக்கு பேட்டியாக தந்தமைக்கு எங்களது கொழுஞ்சி சார்பாகவும், எமது சார்பாகவும் மனம் நிறைந்த நன்றிகள்.
நன்றி கொழுஞ்சி மேலும் செழிக்க எமது வாழ்த்துகள்.

 

கில்லர்ஜி தேவகோட்டை
 
சிவாதாமஸ்அலி-
இவரு தேர்தலில் நின்றால் ஓட்டுப் போடலாம் போலயே... ?

Share this post with your FRIENDS…