எல்லோரும் இந்நாட்டு மன்னர்

 

புகைப்படம் தந்த திரு.சுப்பு தாத்தா அவர்களுக்கு நன்றி.

 
வணக்கம் நட்பூக்களே... முன்பெல்லாம் எல்லா ஊர்களிலும், நகரங்களில்கூட கண்மாய், ஊரணி, குளம், குட்டை, அருவி, ஆறு, ஓடை, பொதுகிணறு என்று இருந்தது அதில் மக்கள் குளிப்பார்கள் அவைகள் இப்பொழுது தொண்ணூறு சதவீதம் ஒழிந்து விட்டது. இப்பொழுது வீட்டினுள் சிறிய அறைக்குள் குளிக்கின்றார்கள்.
 
சரி இதில் வீடில்லாமல் தெருவோரங்களில் உறங்கி வாழ்பவர்களின் வாழ்வில் மாற்றம் வந்து இருக்கிறதா ? இல்லையே... அவர்கள் இன்றும் அதே வாழ்வு முறையில்தான் இருக்கின்றார்கள். நான் சாலையில் செல்லும் பொழுது இவர்களை கண்டால்... இவர்கள் இப்பொழுது எங்கு குளிக்கின்றார்கள் ? என்று அடிக்கடி நினைப்பேன். கடலில் குளிக்கலாம் அதேநேரம் எல்லா ஊர்களிலும் கடல் இல்லையே... அப்படியே குளித்தாலும் நல்ல நீரிலும் குளிக்க வேண்டுமே...
 
எனக்கு ஆட்சியாளும் அதிகாரம் கிடைத்தால். முதலில் இவர்கள், மேலும் கோயில் வாசல்களிலும், சமிக்ஞை திடல்களிலும், பேருந்து நிலையங்களிலும் தர்மம் கேட்பவர்களின் மறுவாழ்வுக்கு வழி செய்வதே தலையாய கடமையாக நினைப்பேன். எல்லோரும் இந்நாட்டு மன்னர் என்ற பழஞ்சொல் இருக்கிறதே இதன் பொருளில் இருள் சூழ்ந்து உள்ளதே...
 
சமூகத்தில் கௌரவமாக தெளிந்த சிந்தனையுடன் வேலை செய்து சம்பளம் பெற்று நல்ல வாழ்க்கை வாழும் மக்களையே இந்த அரசியல்வாதிகள் காலம் முழுவதும் வாக்குறுதி கொடுத்து வாக்குகளை வாங்கிட்டு விட்டு அவர்களின் வாயில் வாக்கரிசி போடும்போது இந்த அடித்தட்டின் கீழே வாழ்பவர்களைப் பற்றியா நினைக்கப் போகின்றார்கள்.
 
சமீபத்தில் மதுரையில் ஒரு குறிப்பிட்ட தேநீர்க்கடையில் ஒரு முதியவர் தினம்தோறும் அதே இடத்தில் கையில் ஒரு துணிப்பையுடன் அமர்ந்து இருப்பார் ஆனால் யாரிடமும் பணம் கேட்க மாட்டார் குனிந்து தலையை சொறிந்து கொண்டே இருப்பார். உடலும், உடையும் அவ்வளவு அழுக்கு. எனக்கு பாவமாக இருக்கும். இந்த தருணங்களில் எல்லாம் எனக்கு இறைவன் மேல் நம்பிக்கை வந்து விடும். 

என்னை இந்நிலையில் வைக்காதிருந்தமைக்கு இறைவனுக்கு மனதுள் நன்றி சொல்லிக் கொள்வேன். அவருக்கு சில நேரங்களில் சாப்பாடு பொட்டணம் வாங்கி வந்து கொடுப்பேன் நன்றி என்று சொல்வார். என்னை இந்நிலைக்கு வைத்திருந்தமைக்கு இறைவனுக்கு மனதுள் நன்றி சொல்லிக் கொள்வேன். உலகம் சமநிலை பெறவேண்டும் உயர்வு தாழ்வில்லா நிலை வேண்டும் என்று பாடுவது பொய்தானோ...
 
கில்லர்ஜி அபுதாபி
 
சிவாதாமஸ்அலி-
அவரவர் விதிப்படியே... போக வேண்டியதுதான்...