ஊர்க்கதை

பாட்டி பட்டம்மாவும், பேத்தி ப்ரீத்தியும்.

பாட்டி, எனக்கு கதை சொல்லு.

சரி, ஊர்க்கதை சொல்றேன்.

பண்ணைக்கு, தென்னை வாங்க சென்னைக்கு போன, பொன்னையன் தொன்னைய நக்கிட்டு திண்ணையில கெடந்தானாம்.

தெருமுனையில் உள்ள பிள்ளையாரை வணங்காதவன் பிள்ளையார்பட்டி போய்த்தான் வணங்குவேன்னானாம்.

கரிசல்குளத்திலே பரிசல்ல போகும்போது விரிசல் விழுந்ததால் பரிமளாவுக்கு பரிசம் போடாமலே திரும்பினாங்களாம்.

தேவகோட்டைக்கு, தேவயானியை தேடிப்போனவன் தேவாங்கு தைலம் வாங்கிட்டு தேவிபட்டணம் போனானாம.

கமுதியிலிருந்து பரமக்குடிக்கு கமுதக்குடி வழியா நடந்து போனவன், குளிக்கும்போது முதலை கடிச்சு செத்தானாம்

கண்டமனூர் கண்டக்டர் கண்ணுச்சாமி, கண் டாக்டர் கண்ணபிரானை கண்டந்துண்டமா வெட்டிட்டானாம்.

வெள்ளையபுரம் வெள்ளைச்சாமி, வேலாண்டி பாளையம் வேலுச்சாமிய வேல்க்கம்பால குத்திட்டானாம்.

சிங்கம்புணரி நரிகிட்ட தோற்றுப் போன செங்கல்பட்டு சிங்கம், அசிங்கப்ட்டு சிங்கமுத்துவை கடிச்சுப்புட்டு ஓடிருச்சாம்.

வேல் இருக்க பயமேன்னு சொல்லிகிட்டே போன, வேலாயுதம் தேர்வேலியில தேர்ல நசுங்கி செத்தானாம்.

திண்டுக்கல்லுக்கு முண்டுக்கல் வாங்கபோன, சிக்கல் பாண்டுரங்கன் வண்டு கடிச்சு வத்தலக்குண்டு போனானாம். 

அண்ணாமலை பொண்டாட்டி உண்ணாமலை, திருவண்ணாமலைக்கு வண்ணான்குண்டு வழியாத்தான் போவேன்னாளாம். 

தாராபுரம் ராதாவும், ராதானூர் தாராவும் ஏகாம்பரத்துக்குத்தான் வாக்கப்படுவேன்னாங்களாம்.

காயல்பட்டணம் கயல்விழியும், ராமேஷ்வரம் ரமேஷும் கல்யாணமாலை மூலமாத்தான் கல்யாணம் செஞ்சாங்களாம்.

காஞ்சிபுரத்துல கஞ்சிக்கு வழியில்லாதவன் குளித்தலை வந்து தலைக்கறிதான் வேணும்னு கேட்டானாம்.

வண்டலுக்கு, வியாபாரத்துக்கு அனுப்புன சுண்டல் பண்டலை தண்டல்காரன் தூக்கிட்டு ஓடிட்டானாம்.

பல்லாவரம் பல் பாக்டர் பல்ராமும், கண்ணங்குடி கண் டாக்டர் கண்ணகியும் காரைக்கால் காலேஜுல படிக்கும்போதே விவாகரத்து செஞ்சுகிட்டாங்களாம்.

கீழக்கரை கீர்த்திவாசனை கொன்ன, சேதுக்கரை சேதுவை வேலூரிலிருந்து, ஜெய்ப்பூர் ஜெயிலுக்கு மாத்திட்டாங்களாம்.

திருநெல்வேலியில நெல்லை வித்த அய்யாச்சாமி, நெய்வேலியில போயி நெய் வியாபாரம் பார்த்தானாம்.

தீராக்கொடுமை தீரும்னு கொடுமலூர் போனவன், தீராம கோபப்பட்டு கோபாலபட்டணம் போனானாம்.

பீதாம்பரம் விட்ட, பம்பரம் சிதம்பரம் கண்ணுல அடிச்சு தாம்பரம் ஆஸ்பெட்டல்ல சேர்த்துட்டாங்களாம்.

ஏண்டி... பாபநாசம் குரங்கு படியவிட்டு எறங்குன்னு பேத்திகிட்ட என்ன கதை சொல்றே... வந்து சோத்தை வெய்யிடி, ஆக்கங்கெட்டகூவை.

இரு, உங்க தாத்தாவுக்கு சோறு ஊட்டி விட்டு வந்து சொல்றேன்.

பாட்டி, நீ பாட்டுப்பாடி தாத்தாவுக்கு ஊட்டி முடிக்குறதுக்குள்ள ஊட்டிக்கே போயிட்டு வந்துருவேன் நான் போயி, சேடபட்டி செவிட்டு பாட்டி செல்லாயிகிட்டே கேட்டுக்கிறேன். 

அன்பு நெஞ்சங்களே, 15.12.2014 முதல் வலைச்சர ஆசிரியராக பொறுப்பேற்கும் எமக்கு வலைச்சரத்திற்கு வருகை தந்து தங்களது கருத்துரையை பரிமாறிக் கொள்ளும்படி கேட்டுக் கொள்(ல்)கிறேன்.

அன்புடன்

தேவகோட்டை கில்லர்ஜி அபுதாபி