கில்லர்ஜியின் பத்தாம் ஆண்டு

வணக்கம் வலையுலக உறவுகளே... நான் வலைத்தளம் உருவாக்கி பத்து ஆண்டுகள் நிறைவடைந்து விட்டது இன்றோடு 816 பதிவுகள் எழுதி வெளியிட்டு விட்டேன்.

இவைகள் அனைத்தும் படிப்பவர்களுக்கு பொழுது போக்கான விடயங்களையும், எனது எண்ணங்களையும், பொதுநலமான கருத்துக்களையும், சமூக கோமாளிகளின் செயல்களையும், மனதுக்கு இதமான இரட்டை அர்த்தமற்ற நல்ல நகைச்சுவை பதிவுகளையும், எனக்கு தெரியாத அரசியல் அலசல்களையும், கவிதை என்ற பெயரில் என்னாலான வார்த்தை ஜாலங்களையும், குடும்பக்கதைகளையும், திரைப்பட கூத்தாடிகளின் அவலங்களையும், கிரிக்கெட் கிறுக்கர்களின் கிறுக்குத்தனங்களையும், எனது மகிழ்ச்சிகளையும், சோகங்களையும், எனது உறவுகளின் மரணங்களையும், குறிப்பாக என்னவளுக்கு நான் ஆண்டுக்கு இரண்டுமுறை மறைவு நாள், எமது திருமண நாளில் எழுதும் அஞ்சலிக் கவிதைகளையும் உங்களோடு பகிர்ந்து கொண்டு கடந்து வந்து இருக்கிறேன் இதன் மூலம் எனது மனச்சுமையை இறக்கி வைத்த உணர்வை பெற்று இருக்கிறேன் என்பதும் உண்மை.

இவைகள் அனைத்தும் தங்களுக்கு பயனுள்ளதா ? என்பதை நானறியேன் இருப்பினும் தொடர்ந்து கருத்துரை என்னும் ஊக்கத்தினை அளித்து வந்ததின் காரணமே எனது இந்தப்பயணம். இந்த தருணத்தில் என்னை இவ்வளவு தூரம் எழுத வைத்தவர் யார் ? என்பதை எனது முதல் பதிவான எழுதுகோல் இதை சொடுக்கி அறிந்து கொள்க அவருக்கு எமது நன்றிகளை கூறிக்கொள்கிறேன்.

இந்த பத்து ஆண்டுகளில் நான் எழுதியது பத்தாது என்பதே எமது கருத்து காரணம் இன்று வலையுலகம் நலிந்து போய்க் கொண்டு இருக்கிறது என்பது நாமறிந்த விடயமே... முன்பு போல எனது பதிவுகளுக்கு வருகையாளர்கள் குறைந்து விட்டதால் எழுதுவதில் எனக்கு மன அதிருப்தி ஏற்பட்டு விட்டது. முன்பொரு காலத்தில் எனது பதிவுகள் வெளியாகிய ஐந்து மணி நேரத்தில் 2000 பார்வையாளர்களை கண்டது எனது தளம் இன்று தலைகீழாக மாறி விட்டது திரட்டிகள் அனைத்தும் மரணத்தை எய்தியதே காரணம்,

எது எப்படியோ எனது பதிவுகளில் கவிதை என்ற பெயரில் எழுதிய மனம் கெட்டது கேட்டது என்ற கவிதையை மட்டும் இன்றைய தேதிவரை ஒரு லட்சத்து, இருபத்து நான்கு ஆயிரத்து அருநூற்றி பதினெட்டு பார்வையாளர்கள் கண்டு இருக்கின்றார்கள் (124,618) என்பது எனக்கு பெருமையான விடயமாக இருக்கிறது. நான் எவ்வளவோ கவிதைகள் மனம் ஒன்றி எழுதி இருக்கிறேன் அவைகளுக்கு கிடைக்காத அங்கீகாரம் இதற்கு கிடைத்ததின் காரணம் நானறியேன் இக்கவிதைக்கு நண்பர் திரு.வே.நடனசபாபதி அவர்கள் கருத்துரை தரவில்லை இவரை மட்டும் நான் குறிப்பிட காரணம். இக்கவிதையை படித்து விட்டு சில வரிகளை நண்பர் திருத்தி எழுதி அனுப்பினார், அவரது மனம் புண்படக்கூடாது என்ற பண்பால் மட்டுமல்ல திருத்திய வரிகளும் நன்றாக இருந்தது ஆகவே மாற்றி எழுதினேன் ஆயினும் அவர் கருத்துரை தரவேயில்லை இது வெளியான தேதி 01 செப்டம்பர் 2017 இதைப்போல் வெறும் பத்தொன்பது (19)  பார்வையாளர்கள் மட்டுமே வந்த பதிவும் உண்டு.

இந்த நிலையில் தேவகோட்டை, தேவதை தேவகி என்ற முழுநீள நகைச்சுவை நூலையும் எழுதி இருக்கிறேன். இத்தருணத்தில் இந்நூலுக்கு முகவுரை எழுதிய முனைவர் திரு.பா.ஜம்புலிங்கம் அவர்கள். வாழ்த்துரை எழுதிய திரு.கரந்தை ஜெயக்குமார் அவர்கள். அணிந்துரை எழுதிய திரு.வே.துளசிதரன் மற்றும் திருமதி.கீதா ரெங்கன் அவர்கள் முன்னுரை எழுதிய திரு.திண்டுக்கல் தனபாலன் அவர்களை மீண்டும் நினைவு கூர்கிறேன்.

இதை மின் நூலாக்கும் எண்ணத்தோடு புதிய பரிமாணத்தில் நட்பின் இலக்கணத்தை குறித்து எழுதி வைத்து இருக்கும் கதையை மின் நூலாக்கி வெளியிடும் எண்ணமும் இருக்கிறது. எனது தளத்துக்கு இன்றைய தேதிவரை வருகை தந்த பார்வையாளர்களின் எண்ணிக்கை எட்டு லட்சத்து நாற்பத்து ஆறாயிரத்து இருநூற்றி அருபத்தேழு  (846,267) இந்த உள்ளங்களுக்கு எமது நன்றிகளை காணிக்கை ஆக்குகிறேன். எனது மூச்சு உள்ளவரை எனது எண்ணங்களை எமது கற்பனை பிம்பங்கள் திரு.சாம்பசிவம், திரு.சிவாதாமஸ்அலி மற்றும் திரு.Chivas Regal சிவசம்போ அவர்களின் துணையோடு இறுதிவரை எழுதிக் கொண்டு இருப்பேன். எனது எழுத்துப் பயணம் தொடர தங்களது ஆசிகளையும், வாழ்த்துகளையும் வேண்டி உங்கள்....

தேவகோட்டை கில்லர்ஜி

26.04.2020

26 ஏப்ரல் 2010 - 26 ஏப்ரல் 2020