கொரோனா வியாபாரம்

வணக்கம் நண்பர்களே... இன்று மருத்துவமனை எங்கும் மக்கள் கூட்டம் அலை மோதுகிறதே... இதற்கான அடிப்படை காரணம் என்ன? இன்றைய விஞ்ஞான வளர்ச்சியை நாம் உச்சி முகர்ந்து வரவேற்று ஆராதிக்கின்றோம். காரணம் நமக்கு எல்லாமே விரைவாக கிடைக்க வேண்டும் என்ற பேராவல்.
 
முதலில் இந்த நோய்களின் தொடக்கம் எங்கிருந்து வருகிறது என்று பார்ப்போம். நாம் அன்றாடம் குளிப்பதற்கு அழுக்கு தேய்க்க உபயோகிக்கும் சலவைக்கட்டி (Soap) இருக்கிறதே இதை எதற்காக கண்டு பிடித்தார்கள்? அதன் பிறகு வியாபாரத் தந்திரத்தில் மக்களிடம் அதை எப்படி விளம்பரப்படுத்தி இன்று திரைத்தாரகைகளின் அழகு சோப் என்று நம்மை மதிமயக்கி இந்த நிலையை விட்டு விலகிச் செல்ல முடியாத வலைக்குள் வைத்து விட்டார்கள். இல்லை வைத்து செய்கிறார்கள் என்பது நமக்கு தெரியுமா?
 
இன்று நாம் அலைபேசியை தவிர்த்து விட்டு வாழமுடியுமா? சோறு இல்லாமல் போனாலும் பரவாயில்லை, ஆனால் அலைபேசி வேண்டும். தொடக்கத்தில் 2-G பிறகு 3-G பிறகு 4-G இப்ப 5-G அடுத்து 6-G ஆம் இந்த அலைக்கற்றைகள் நடமாடும் மக்களின் இதயத்தை தொட்டுக் கொண்டுதான் போகின்றது. நாம் இந்த வலையத்தை விட்டு எப்பொழுது விலகுவோம் மரணத்தன்று ஆம் அதுவரையில் வெளியேறி விடமுடியாது.
 
சரி சலவைக்கட்டிக்கு வருவோம் இதை கண்டு பிடித்தது தொழிற்சாலையில் வேலை செய்யும் தொழிலாளர்கள் வேலை முடிந்ததும் கையில் இருக்கும் எண்ணை பிசுபிசுப்புகளை கழுவுவதற்கு உபயோகப்படுத்தும் ஒருவகை திரவத்தை கொண்டு வந்தார்கள், பிறகு அதனை சாதாரண வேலை செய்யும் தொழிலாளர்களும் உபயோகப்படுத்தினார்கள். நாளடைவில் இதனை எல்லோரும் உபயோகப்படுத்த ஆரம்பித்தார்கள்.
 
இங்குதான் வியாபாரப்புத்தி வேலை செய்தது வீட்டில் சமையல் வேலை செய்த பெண்களும் கழுவுவதற்கு அறிமுகப்படுத்தப்பட்டது. நாம்தான் புதுமையை வரவேற்கும் புண்ணாக்கு வம்சமாச்சே... அடடே தேங்காய் நார்களுக்கு இது தேவலையே.. என்ற நிலை வர இது தேவையானதே... என்ற கோணத்தில் சிந்தித்தவர்கள் கை, கால், கழுவியது போதாதென்று குளிக்கும் போது உடலுக்கும் உபயோகப்படுத்தினார்கள்.
 
அதன் பிறகு இதில் வாசனைத் திரவியத்தையும் குழைத்து திரைப்படக் கூத்தாடிகளை வைத்து விளம்பரப்படுத்தி. இன்று சலவைக்கட்டி இல்லாமல் நாம் குளிக்கவே மாட்டோம். என்ற நிலைப்பாடு. விதவிதமான வடிவங்களில் விதவிதமான வண்ணங்களில் நிறுவனங்கள் தயாரித்து கொண்டுதான் இருக்கின்றனர். சரி இதனால் என்ன பிரச்சனை? இங்குதான் மருத்துவதுறை உருவாக்கம் தொடங்கியதின் பின்னணி காரணம்.
 
பணமே குறிக்கோள் என்ற சிந்தனைக்கு மனிதன் போய் விட்ட காரணத்தால், மனிதநேயம் மறந்து இறந்து வெகுகாலமாகி விட்டது. புதிய வியாதிகளை உருவாக்கி, அதற்கு பெயர் சூட்டி பிறகு அதனை குணப்படுத்துவது. என்ற கோட்பாட்டில் மனிதன் நுழைந்து விட்டான். இவைகள் இன்னும் தொடர்ந்து வளர்ந்து கொண்டே போகும் என்பதில் ஐயமில்லை.
 
உணவுகளில் கலப்படம் செய்து வியாதிகளை உருவாக்கி விடுகின்றார்கள், கோழி இறைச்சிகளின் மூலம் வியாதி, பால் பவுடர்களின் மூலமாக வியாதி, இனிமேல் அலைபேசி வழியாகவும் வியாதிகளை பரப்புவார்கள். காரணம் மக்கள் அலைபேசியை கை விடப்போவதில்லை. இயற்கை உணவை மறந்து செயற்கை மோகத்தில் வீழ்ந்ததின் விளைவு நாம் மட்டும் அழிவதில்லை, நமது சந்த்திகளையும் அழிக்க துணை போகிறோம் என்பதே உண்மை.
 
நாம் பயன்படுத்தும் சலவைக்கட்டிகளில் இருக்கும் மருத்துவ திரவியங்கள் நமது உடலில் இருக்கும் கோடிக்கணக்கான நுண்ணிய துளைகளை அன்றாடம் அடைத்துக் கொண்டே வருகின்றன. அதாவது இன்றைய மனிதன் பிறப்பு முதல் இறப்பு வரையில்... மனிதனுள் இருக்கும் கெட்டநீர் நமது உடலை விட்டு வெளியேற்றுவது சிறுநீர் என்று மட்டுமே நாம் நினைத்து வாழ்கிறோம் அதுதான் இல்லை. உடல் முழுவதுமே கோடிக்கணக்கான வழிகளை இறைவன் நமக்கு படைத்து இருக்கிறான்.
 
நாம் அவைகளை உணர்ந்து கொள்ளாமல் விஞ்ஞான வளர்ச்சியில் மூழ்கி முத்தெடுப்பதாக நினைத்து மூடர்களாக வாழ்கிறோம். அந்த கெட்டநீர் வெளியேறாமல்தான் நமக்கு புதுப்புது வியாதிகள் உருவாகின்றன... எல்லாம் உலகின் மூலை முடுக்குகளில் மக்களுக்கு தெரியாமல் மக்களோடு வாழும் இலுமினாட்டிகளின் மூளையில் தோன்றிய வியாபாரப்புத்தி. கொரோனாகூட வியாபாரத்துக்காக உருவாக்கப்பட்ட நோய்தானே...
 
நமது அடுத்தடுத்த சந்ததிகளின் வாழ்வு மிகவும் கொடூரமாகத்தான் இருக்கும். அதை சில நேரங்களில் நான் நினைத்துப் பார்த்தாலே மனது கனக்கிறது. என்ன செய்வது ? இனிமேல் உயிருள்ள மனிதன் வாழ்வை உயிரற்ற பணமே முடிவு செய்யும். நான் என்றுமே சொல்வது விஞ்ஞான வளர்ச்சி, மனித வாழ்வுக்கு வீழ்ச்சியே... வாழ்க வையகம்.
 
கில்லர்ஜி தேவகோட்டை

Share this post with your FRIENDS…