துரோகச்சுவடுகள்

நமது முன்னோர்கள் குற்றம் பார்க்கின் சுற்றம் இல்லை என்று சொல்லி வைத்தது எவ்வளவு உயர்வான அனுபவமொழி. எங்கும், எதிலும், எவரும் துரோகம் இது தவறென்றே உணராத மனிதர்கள்தான் இப்பொழுது வாழ்கின்றார்கள். யாரையுமே நம்புவதற்கில்லை. கணவனை மனைவியும், மனைவியை கணவனும் நம்பாமல் பொய்முகத்தோடுதான் இருக்கின்றார்கள். உண்மை முகங்களை அல்ல, உண்மை முகத்தை பார்ப்பது அரிது.
 
நல்லவன்கூட துரோகத்தின் பாதிப்பால் தன்னையும் அதிலே இணைத்து கொண்டால்தான் வாழவே முடியும் என்ற இழிநிலைக்குள் வந்து விட்டான். நல்ல மனிதனை ஏமாளி என்றும் மேலும் இழிவாக இளிச்சவாயன் என்றே பெயர் சூட்டி விட்டார்கள். நமக்கும் மற்றொருவருக்கும் பிடிக்கவில்லை என்று வரும். சூழலில் இருவருக்கும் பொதுவானவன் இரண்டு பக்கமும் பேசாத வார்த்தைகளை கூடுதலாக போட்டுக் கொடுத்து மேலும் பகையை விரிவுபடுத்தி அவன் ஆதாயம் தேடிக் கொள்கிறான்.
 
இவனைப்பற்றி அவனிடமும், அவனைப்பற்றி இவனிடமும் சொல்லிக் கொடுக்கும் பொழுது இருவருமே அவன் சொல்வதை நம்புகின்றார்கள். காரணம் அவன்மீது இவனுக்குள் எரிந்து கொண்டு இருக்கும் கோபக்கனல். இருவருமே கேட்டுக் கொள்ளப்போவதில்லை இதுதான் இடைத்தரகரின் பலம். எந்த விசயத்தையும் உடனே சம்பந்தப்பட்டவரிம், அகம்பாவத்தை கலைந்து பணிவாக இந்த மாதிரி கேள்விப்பட்டேன் நீ சொன்னது உண்மையா ?
 
உண்மையானால் அவனது பதிலில் தெரிந்து கொள்ள முடியும். இல்லை எனில் சொன்னவரை காட்டிக் கொடுக்காமல் மன்னிக்கவும் தெரிந்து கொள்ளவே கேட்டேன். என்று சொல்லி விட்டால் அங்கு சில நல்ல எண்ணங்கள் இருவருக்குமே புரிய தொடங்கும். இதுவே பகைமைத்தீயை சற்றேனும் அணைக்க வழி வகுக்கும். நான் பல மனிதர்களை பார்த்து விட்டேன் ஓர் உதவியை நாடும் பொழுது அது கடனுதவியோ, மற்ற எதுவாயினும் எவ்வளவு பணிவு இருக்கிறது அது முடிந்தவுடன் அவர்களது பேச்சின் தொணி வேறு வகையாகிறது.
 
நமக்கு துரோகம் செய்தவர்களை ஒதுக்க தொடங்கினால் இறுதி யாத்திரையில் நாம்தான் சுடுகாட்டுக்கு நடந்து போய் குழியில் படுத்துக் கொள்ள வேண்டிய நிலைவரும். ஆகவே மனக்காயம் உண்டாக்கியவர்களை, மனதுக்குள் வைத்துக் கொள்வோம். பேசும் பொழுது உதடுகள் மட்டும் சிரிக்கட்டும் வேறு வழியில்லை. இல்லை எனில் உறவுகள் அனைவரும் நம்மை கை கொட்டி சிரிக்கும் நிலையில் தனிமரமாய் நிற்போம்.
 
துரோகம் எங்குதான் இல்லை ? அரசியல்வாதிகள் துரோகம் செய்தாலே நிற்கமுடியும். ஓ.பன்னீர் செல்வத்தை கட்சிக்கு துரோகம் செய்து விட்டார் என்கின்றார்கள். எடப்பாடியார் சாதாரண ஆளா ? சசிகலாவுக்கு நம்பிக்கை துரோகம் செய்யவில்லையா ? அதற்காக சசிகலாவை உண்மையின் சுயரூபம் என்று நான் சொல்ல வருவதாக அர்த்தமில்லை. எல்லோருமே ஒரே குட்டையில் ஊறிய மட்டைகள்தான், இந்தக்கட்சி மட்டுமல்ல எல்லாக்கட்சி என்ற குட்டைகளுமே இதேநிலைதான்.
 
காரணம் அரசியல்வாதிகள் வானிலிருந்து குதித்து வந்த தேவதூதர்கள் அல்ல நம்மிலிருந்து சென்றவர்கள், நம்மைப் போலத்தானே இருப்பார்கள். ஆகவே நல்ல அரசியல்வாதிகள் இனியெனும் வேண்டுமெனில் முதலில் நாம் நல் மனிதராக மாறிடல் வேண்டும் அது இனி சாத்தியமில்லைதான். ஐந்தில் வளையாதது ஐம்பதில் வளையுமா ?
 
ஆகவே நமது பிள்ளைகளையாவது நல்லவர்களாக வளர்க்க இன்றுமுதல் முயற்சிப்போம். அப்பொழுது நல்ல ஆட்சியாளர்களால் நமது அடுத்தடுத்த சந்ததிகளாவது நல்ல வாழ்க்கை வாழட்டும். அதற்கு இன்றே சூழுரைப்போம். இருப்பினும் நமது வழி நேர்மை என்பது நமது மனசாட்சிக்கு நிச்சயமாக தெரிந்தால் நாம் நாமாகவே வாழ்ந்திடுவோம் பிடித்தவர்கள் நம்மோடு, இருக்கட்டும் பிடிக்காதவர்கள் மண்ணோடு போகட்டும். வாழ்வது ஒருமுறை அதுவே நல்லமுறையாக இருக்கட்டும்.
 
நீ பிறந்ததற்கு அடையாளமாக எதையாவது பதிந்து விட்டுச்செல் இல்லையேல் உனக்கும் கற்களுக்கும் வித்தியாசம் இல்லாமல் போய் விடும்.
-சுவாமி விவேகானந்தர்
 
கில்லர்ஜி தேவகோட்டை
 
Chivas Regal சிவசம்போ-
இன்னா பாஸூ... இதெல்லாம் இன்றைக்கு நடைமுறைக்கு நடக்கிற மாதிரியா இருக்கு ?

Share this post with your FRIENDS…