ரேணிகுண்டா, ரேஷன்கடை ரேணுகா

ஆந்திர மாநிலம் ரேணிகுண்டா தமிழர்கள் அதிகம் வாழும் பகுதி. அங்கு ரேஷன்கடையில் பணியாற்றும் ரேணுகா நல்ல மனதுக்காரர். பொது மக்களிடம் அதிகம் கெடுபிடி செய்ய மாட்டார். இல்லாதவர்கள் யார் வந்து கேட்டாலும் அரிசி கொடுத்து அனுப்புவார்.
 
பிறகு பற்றாக்குறை பொருட்களை ஏதாவது கோல்மால் செய்து சரி செய்து விடுவார். யார் எது கேட்டாலும் இல்லை என்று சொல்ல மனசு வராது, வீட்டிலிருக்கும் பொழுது யாராவது தர்மம் கேட்டாலும் இல்லை என்று சொல்லாமல் வீட்டிலிருப்பதை கொடுத்து அனுப்புவார். ஒருமுறை பணம் இல்லாததால் கையிலிருந்த ஏடிஎம் கார்டை கொடுக்க, வாங்கியவர் பின் நம்பரையும் கேட்டு எழுதிப் போனார். அந்த வங்கியில் ஆறு வருடத்துக்கு முன்பே கணக்கு ரத்தாகி விட்டது என்பது வேறு விசயம்.
 
இப்படித்தான் ஒருநாள் ஒரு வயதான அம்மாள் எங்க வீட்டில் டி.வி. இல்லை நாடகங்கள் பார்க்க முடியாமல் கஷ்டமாக இருக்கிறது என்று சொல்லவும். வீட்டிலிருந்த டி.வி.யை எடுத்துட்டு போங்கள் என்று சொல்லி விட்டார். மற்றொரு நாள் ஒரு பெண்மணி எனக்கு உறவுக்காரர்கள் திருமணத்துக்கு போட்டு போக நெக்லஸ் இல்லை என்று சொல்லவும். தனது நெக்லஸை கழட்டி கொடுத்து விட்டார்.
 
இப்படியே போவதால் அவருக்கும், கணவருக்கும் சண்டைகள் வந்தது. நீ எதற்கு எல்லோருக்கும் தர்மம் செய்துக்கிட்டே இருக்கே ? என்று கேட்கும் பொழுது டி.வி.யை வாங்கிட்டு போன அம்மாள் வந்து நீ கொடுத்த டி.வி. ஓடவே மாட்டுதே... என்று கேட்கவும். அதுதான் ரிப்பேராகி மூன்று மாதமாக சும்மா கிடக்குதே... என்று சொல்ல அந்த அம்மாள் திட்டிக் கொண்டே போனாள்.
 
பேத்திக்கு வாங்கிய, நெக்லஸை எதற்கு கொடுத்தே ? என்று கேட்டதுக்கு அது கவரிங்தானே கழுத்துல அரித்துக் கொண்டே இருந்துச்சு அதான் கொடுத்துட்டேன் என்ற ரேணுகாதேவி அம்மாளை வியப்பாக பார்த்த, வீட்டுக்காரர் கேட்டார், உனக்கு எதற்கு இந்த மொட்டப்பகுசி ?
 
கில்லர்ஜி தேவகோட்டை
 
Chivas Regal சிவசம்போ-
கொடுமை, கொடுமைனு கொடுங்கலூர் போனா, அங்கே ரெண்டு கொடுமை கொழுக்கட்டையோட ஆடுச்சாம்.

Share this post with your FRIENDS…