குட்டிச்சுவரு...

நண்பர்களே... ஜெயிலர் என்றொரு திரைப்படத்தில் வந்த பாடல் வரிகள் ஒன்று என்னை மெய் சிலிர்த்து கேட்டு இரசிக்க வைத்தது அதனைக் குறித்து எழுத வேண்டுமென்று வெகு நாட்களாக நினைத்திருந்தேன். பாடலின் தொடக்க வரிகள் என்னவென்பதை என்னால் இன்னும் கண்டு பிடிக்க முடியவில்லை காரணம் பின்னணி இசையின் மெல்லிய நீரோட்டம் ரீங்காரமிட்டுக் கொண்டே இருக்கிறது.
 
எனது மனதை மயக்கிய முக்கியமான வரி இதோ...
குட்டிச் சுவற்றை எட்டிப் பார்த்தா உசுரக் கொடுக்க கோடிப்பேரு...
 
ஆஹா என்னவொரு சந்தம் ‘’குட்டிச்சுவரு கோடிப்பேரு’’ கவியரசர் கண்ணதாசனுக்குப் பிறகு  சரியான பாடலாசிரியர் இல்லை என்ற மனக்கவலை தமிழக மக்களுக்கு தீர்ந்தது. பாடலாசிரியரின் பெயரைத் தேடினேன் வந்தது. புதிய பாடலாசிரியர் திரு. சூப்பர் சுப்பு அவர்கள். சரி பாடலின் உள்ளார்ந்த கருத்துக்கு போவோம். அதாவது உசுரக் கொடுக்க கோடிப்பேரு... இவர்கள் யார் ? சர்வ நிச்சயமாக ரசிகர்கள்தான் இது பாமரனுக்கும் தெரிந்த விடயம்.
 
அதாவது ரஜினி ரசிகர்களை மிகவும் உயர்வாகவே வைத்து இருக்கிறார். அடுத்து இந்தக் கோடிப்பேரு இதற்கு முன்னால் வரும் வரி குட்டிச் சுவற்றை எட்டிப் பார்த்தால் அதாவது இவர்கள் அந்தக் குட்டிச்சுவற்றின் பக்கமாக இருக்கின்றார்கள் அதாவது நிற்கின்றார்கள். அப்படித்தானே ? குட்டிச் சுவற்றின் பக்கம் நம்மூரில் நிற்பது எது ?
 
இதுதான் மக்களே எனது நெடுங்கால ஐயப்பாடு ரஜினி அவர்களுக்கு வேண்டுமானால் இதன் உள்ளார்ந்த அர்த்தம் தெரியாமல் இருக்கலாம். ஆனால் பாடலாசிரியர் தமிழர்தானே ? அவருக்கு இதன் அர்த்தம் தெரியாமல் போவது எப்படி ? காலப்போக்கில் ரசனை மாற்றம் தேவைதான் அதற்காக இப்படி கருத்து மாற்றமும் தேவையா ? இப்பாடலும் அமோக வெற்றி பெற்று அடங்கி விட்டது அவ்வளவுதான். பாடலின் வரிகள் என்பது பாடலாசிரியரின் மறைவுக்குப் பிறகும் வாழணும் அதுதான் பாடல்.
 
இன்னும் எவ்வளவோ தத்துவார்த்தமான பாடல் வரிகள் நிறைந்து இருக்கிறது அவற்றில் சிலவற்றை தங்களுக்கு அறிமுகப்படுத்துகின்றேன்...
 
தாய்க்கிழவி... தாய்க்கிழவி... தாய்க்கிழவி... தாய்க்கிழவி... இவ்வளவுதான் மீண்டும், மீண்டும் அதாவது கடைசி வரையில் இந்த வரிகள் மட்டுமே பாடல் முடிந்து விடுகிறது.
 
அடுத்து ஓட்டக் கருவாட்... ஓட்டக் கருவாட்... ஓட்டக் கருவாட்... ஓட்டக் கருவாட்... இதுவும் பாடல் முழுவதும் வந்து முடிந்து விடுகிறது.
 
மேலும் டானு, டானு, டானு... சீனு, சீனு, சீனு... மானு, மானு, மானு... டோனு, டோனு, டோனு... ஆஹா... என்னவொரு உண்மையை ஆசிரியர் கண்டு பிடித்து இருக்கிறார் பாருங்கள்.
 
அப்புறம் எவன்டி உன்னை பெத்தான் என் கையில கிடைச்சா செத்தான் இந்த தத்துவப்பாடலும் என் மனதை கவர்ந்தது.
 
மேலும் ஹேய் கோலி சோடாவே யேங் கறிக்குழம்பே உன் குட்டி பத்தினி நானே  ஆஹா... என்னவொரு உவமையை கையாண்டு இருக்கிறார்.
 
மேலும் தற்போதைய திரைப்படங்களில் பார்த்து இருப்பீர்கள், அதாவது சோகப்பாடலுக்கு நடனம் ஆடுவது அதுவும் என்னைக் கவர்ந்தது இது எது மாதிரியும் இல்லாத புது மாதிரியாக எனக்கு தோன்றியது.
 
கில்லர்ஜி அபுதாபி