வசம்புவாயனும், வடிச்சகஞ்சியும்

வணக்கம் வசம்புவாயண்ணே நல்லா இருக்கியளா ?
வாடாத்தம்பி வடிச்சகஞ்சி நல்லா இருக்கியாடா ? என்ன இந்தப்பக்கம் ?
 
சில சந்தேகம் வந்துச்சு அதான் கேட்டுப் போகலாம்ணு...
கேளுடாத்தம்பி அண்ணேஞ் சொல்லுறேன்.
 
உங்கள் துக்கம் சந்தோஷமாக மாறும் அப்படினு சுவத்துல எழுதிப்போட்டு இருக்காகளே அது எப்படிணே ?
தம்பி பக்கத்து தெரு பஞ்சாட்சரம் செத்துப் போயிட்டான்னு வச்சுக்க அது துக்கம், அவனுக்கு நீ பத்தாயிரம் ரூபாய் கடன் கொடுக்கணும்னு வச்சுக்க அது சந்தோஷம்டா...
? ? ?
* * * * * * * * * * 01 * * * * * * * * * *
 
வாத்தியாருகள் எல்லோருமே பிள்ளைகளை படிக்கச் சொல்லி தொந்தரவு பண்ணுறாங்களே ஏண்ணே ?
படிச்சாத்தான்டா கலெக்டர். ஆகலாம், போலீஸ் அதிகாரியாகலாம், வழக்கறிஞர் ஆகலாம் அதுக்குத்தான்டா.
அப்படீனாக்கா... அவுங்க மட்டும் படிச்சுட்டு கலெக்டர் ஆகாம ஏண்ணே வாத்தியார் வேலை செய்யிறாங்க ?
? ? ?
* * * * * * * * * * 02 * * * * * * * * * *
 
அமாவாசை அன்னைக்கு சில பேரு வீட்டுல விரதம் இருந்து காக்காய்க்கு சோறு வக்கிறாங்களே ஏண்ணே ?
தம்பி இறந்து போன தகப்பனார் அன்னைக்கு காக்கா உருவத்துல வருவாரு அதுக்காகத்தான் சோறு வக்கிறாங்கடா...
அப்படீனாக்கா... உசுரோட இருக்கும்போது எதுக்குணே முதியோர் இல்லத்துல விடுறாங்க ?
? ? ?
* * * * * * * * * * 03 * * * * * * * * * *
 
பணத்தை செலவு செஞ்சு பிள்ளைகளை படிக்க வச்சு அத்தக் கூலிதானே கிடைக்கும் ?
படிச்சாத்தான்டா வேலை கிடைக்கும் நமக்கும் பெருமை, நல்ல இடத்துல சம்பந்தம் செய்யலாம் அதுதான் வேணும்..
பணத்தை தண்டச்செலவு செய்யிறதுக்கு படிக்காமல் அரசியலுக்கு போயிட்டா, கோடி கோடியா சம்பாரிக்கலாமேணே ?
? ? ?
* * * * * * * * * * 04 * * * * * * * * * *
 
படிக்கும்போது பொய் பேசக்கூடாதுனு சொல்லித் தருவாங்களாண்ணே ?
ஆமாடா படிக்கும் போதே நல்ல பழக்கம் வந்தால்தானே தொழில்ல நல்லபடியா முன்னேற முடியும்.
அப்படினாக்கா... வக்கீல் வேலைக்கு போனால் பொய் சொல்லாமல் முன்னேற முடியுமாண்ணே ?
? ? ?
* * * * * * * * * * 05 * * * * * * * * * *
 
நாம நாட்டுக்காக ஏதாவது நல்லது செய்தால் வரலாற்றில் இடம் பெறுவோம்னு சொல்றாங்களே உண்மையாண்ணே ?
ஆமாடா காந்தி நமக்காக உயிரை விட்டார் அதனாலதான் அவர் ரூபாய் தாளில் இடம் பெற்று மக்கள் மனதிலும் தினம் பேசப்படுறாரு...
அப்படினாக்கா... கொலை செய்த கோட்சேவை ஏண்ணே மக்கள் மனதில் வச்சு இருக்காங்க ?
? ? ?
* * * * * * * * * * 06 * * * * * * * * * *
 
நம்ம கிழக்குத்தெரு கிருஷ்ணன் தூக்குப் போட்டு செத்துட்டாராமே ஏண்ணே ?
ஆமாடா பயிர்த்தொழிலுக்கு நாற்பதாயிரம் கடன் வாங்கி இருக்காரு, அதை வங்கிகாரங்க கேட்டு நச்சரிக்கவும் தொல்லை தாங்காம மனுஷன் தொங்கிட்டாருடா...
அப்படினாக்கா... கோடிக்கணக்குல கடன் வாங்குன விஜய் மல்லையா, அதானி இவுங்கள்லாம் எப்பணே தொங்குவாங்க ?
? ? ?
* * * * * * * * * * 07 * * * * * * * * * *
 
கில்லர்ஜி அபுதாபி