சிவன் ராத்திரி

சிவன் ராத்திரி என்றால் என்ன ? அன்று தமிழர்கள் அவரவர் குலதெய்வக் கோயில்களுக்கு சென்று இரவு முழுவதும் விழித்திருந்து பூஜை செய்து வழிபடுதல் என்பதுதான் தொன்று தொட்டு வழக்கம். உறங்காமல் உட்கார்ந்து இருப்பார்கள். காரணம் அன்றுதான் சந்திர, சூரிய கிரகணங்கள் ஒரே நேர்கோட்டில் சந்திப்பதாகவும், அதன் மூலம் நமது முதுகுத்தண்டில் அதன் சக்தி பாய்ந்து நமக்கு சக்தி பெருகுவதாகவும் சொல்லப்பட்டது.
 
இதை இன்றைய விஞ்ஞானமும் ஏற்றுக் கொண்டது. ஆனால் கோயமுத்தூர் ஈஷா மையம் என்ற கோயில் என்று சொல்லப்படும் வியாபாரத் தலத்தில் ஜக்கி வாசுதேவ் என்ற ஆசாமி (?) அரசின் பலநூற்றுக் கணக்கான ஏக்கர் நிலத்தை கையகப்படுத்தி சர்வ நிச்சயமாக இவர் உழைத்த பணத்தில் வாங்கி இருக்கவே முடியாது. ஆனாலும் இன்றைய நிலையில் இதை வாங்கும் அளவு பணம் இருக்கிறது என்பதும் மறுக்க இயலாத உண்மை.

 

இங்கு ஜனாதிபதி, பிரதமர் மற்றும் பல அரசியல்வாதிகள், திரைப்படக் கூத்தாடன்கள், கூத்தாடிகள் வருகை தந்து பாமர மக்களின் நம்பிக்கையை வளர்த்து விடுகிறார்கள். தமிழன் அறிவுக் கூர்மையானவன் என்பது பண்டைய காலத்தில் இருந்தே நிரூபணமான உண்மை. அந்த பாரம்பரியத்தில் வந்த நாம் இன்று இந்த மூடத்தனமான சடங்குகளை நம்பி ஏமாறுவது காலத்தின் கோலம். நமது சுயசிந்தனையை எங்கு தொலைத்தோம் ?
 
இங்கு போய் சிவனை வணங்குவதற்கு லட்சக்கணக்கில் பணத்தை கொட்டுகின்றனர். ஒவ்வொரு நிலைப்பாட்டுக்கும் ஒவ்வொரு கட்டணம். அதாவது ஜக்கியை அருகில் நெருங்குவதற்கு... பணம் கொடுத்துதான் நாம் இறைவனை தொழுதல் வேண்டுமா ? இது எனக்கு உடன்பாடு இல்லாத விடயமே. இந்த ஜக்கி வாசுதேவ் இளம் பெண்களை தலையை மழித்து அலங்கோலப்படுத்தி பக்தைகளாக மாற்றி இருக்கிறார். ஆனால் அவர் முழுஜடாமுடியுடன் காட்சி தருகிறார் பேண்ட் சர்ட் அணிகிறார்.

 

விலை உயர்ந்த மூன்று சக்கர பைக் வாகனத்தில் வலம் வருகிறார். இங்கு நடனம் ஆடுவதும், அதற்கு காதைக் கிழிக்கும் திரைப்படப் பாடல்களை ஒலிக்க வைப்பதும் எவ்வகையில் தர்மமாகும் ? அதைவிட நடிகைகளுக்கு இங்கு வேலை என்ன ? தமிழன் ஏன் சிந்திக்க மறுக்கிறான் ? இந்திய கலாச்சாரத்தை சீரழிப்பதற்கான கைக்கூலிகளே இவர்கள் என்பது தமிழனின் சிந்தைக்கு தெரியவில்லையா ?
 
அதே நேரத்தில் இவரது வளர்ப்பு மகள் என்று சொல்லப்படுபவர் அயல் தேசத்தில் படித்து ஆங்கிலோ இண்டியன் பெண்ணாகவே வாழ்கிறார், வலம் வருகிறார். இதுதான் உண்மையான பக்தி வழிபாடு என்றால் அவரது மகளைத்தானே இங்கு முதன்மை படுத்தி இருத்தல் வேண்டும். இது ஏன் தமிழர்களுக்கு தெரியவில்லை ? ஒருவேளை தெளியவில்லையா ?

 

இன்றைய கோயில் தலங்களில் பணம் கட்டினால்தான் தெய்வத்தை வணங்கு முடியும் என்ற நிலை கட்டாயப்படுத்தப்பட்டுள்ளது. நாம் மனதில் உண்மையாகத்தானே இறைவனை தொழுகிறோம். கண்மூடி பிரார்த்தனை செய்தால் இறைவன் நமக்கு அருள் புரியமாட்டாரா ? தொடக்க காலத்தில் கோயில்களின் பராமரிப்பு பணிக்கு பொருளுதவி தேவைப்பட்டது மக்கள் தங்களது காணிக்கையாக நேர்ச்சை வைத்து யார் எவ்வளவு போடுகிறார்கள் என்பதை பிறர் அறியாவண்ணம் இருப்பதற்காக உண்டியலை வைத்து பணம் போட வைத்தார்கள்.

 

இன்றைய மனிதன் அதையே வியாபாரமாக்கி மக்களிடம் பணத்தை கட்டாயமாக வசூல் செய்கின்றான். அரச்சகர்களுக்கு இன்றைய நிலையில் ஊதியம் இல்லை என்ற பேச்சு வழக்கும் இருக்கிறது. ஆகவே இறைவனை தொழும் நாம் அர்ச்சகர்களுக்கு தட்டில் விரும்பியதை போட்டு விட்டு உண்டியலில் போடும் பணத்தை வெளியில் தர்மம் கேட்பவர்களுக்கு பிரித்து போட்டு வரலாமே... ஏழையின் சிரிப்பில் இறைவனைக் காணலாம் என்று நீ படித்ததை நம்பவில்லையா ?

 

உண்டியல் பணம் அறநிலையத்துறை என்ற பெயரில் பல அரசியல்வாதிகளின் கைகளுக்குத்தான் போகிறது. எத்தனையோ கோயில்களுக்கு பல்லாயிரக்கணக்கான ரூபாயில் சொத்துகள் இருக்கிறது. அவைகள் வெறுதே இருந்து பயன் என்ன ? வீடட்றவர்களுக்கு அதில் கோயில் நிர்வாகமே வீடு கட்டி கொடுக்கலாமே... ஸ்விட்சர்லாண்ட் வங்கிகளில் வெட்டியாக கிடக்கும் இந்தியர்களின் பணம் எப்படி அந்த நாட்டார்களுக்கு பயனாக இருக்கிறதோ... அதைப் போலவேதான் இவையும். கோயில் நிலங்களாவது இந்தியாவில் இருக்கிறது ஆனால் ஸ்விஸ் பணம் ?
 
கில்லர்ஜி தேவகோட்டை
 
காசை முன்னுக்கு வச்சான்
கடவுளை பின்னுக்கு வச்சான்
ஆசையை கண்ணுக்கு வச்சான்
அத்தனையும் மண்ணுக்கு வச்சான்
 
(பழைய நாடகப்பாடலொன்று என் நினைவில் ஆடுகிறது பபூன் பொன்னமராவதி திரு.ஆறுமுகம் அவர்கள் பாடுவது)
 
சிவாதாமஸ்அலி-
பலம் படைத்த மனிதரால் மதத்தின் கோட்பாடுகளையே மாற்ற முடிகிறது. கேள்வி கேட்க வக்கு இல்லாத ஜடங்களாக இருப்பதுகூட தவறில்லை. பணம் கட்டி ஆதரிக்கும் பணக்கார பிண்டங்களை என்ன சொல்வது ?
 

காணொளி

Share this post with your FRIENDS…