வேப்பமரத்து மாரியாத்தா

 

சமீபத்தில் ஓர் ஊரில் மரணம் நிகழ்ந்த வீட்டுக்கு போயிருந்தேன். தெருவின் அகலம் சிறியதுதான் பதினாறு அடிகள் உள்ள குறுகிய தெரு. ஒரு வாகனம் போனால் மற்றொரு வாகனம் வழி விடுவது கடினமான காரியம். காரணம் நமது மக்கள் எல்லா ஊர்களிலும் தனது வீட்டின் வாயிற்படியிலிருந்து சுமார் ஐந்து அடிகள் ஆக்கிரமித்துக் கொள்வது நமது தமிழர் பண்பாடுதானே....
 
பக்கத்து வீட்டின் வாயிற்படியில் ஓர் வேப்பமரம் இருந்தது, அதுவும் சாலையில்தான் இருக்கிறது அந்த வீட்டுக்காரர்களோ, அல்லது தெருவாசிகளோ, யார் செய்ததோ தெரியவில்லை வேப்பமரத்தில் சிவப்பு துணியை சுற்றி, மஞ்சள், குங்குமம் சாத்தி வழக்கம் போல மாரியம்மாள் ஆக்கி விட்டார்கள். அதையும் வழக்கம்போல மக்கள் வணங்கிச் செல்கிறார்கள். சரி அந்த வீட்டின் வாயிற்படியில்தான் அந்த தெய்வம் (?) இருக்கிறது. அதாவது கோலம் போடும் இடத்தில். வீட்டில் சுத்தம் இல்லாத காலத்தில் அப்பெண்கள் எப்படி அதனைக் கடந்து வருவார்கள் ?
 
அடுத்த விடயம்தான் எனது மனதை உறுத்தியது அதாவது அந்த மரத்தோடு ஒட்டி நெகிழி பதாகைகளின் சுற்றலோடு ஓர் சிறிய கழிவறை. அதில் சமூகப்போராளி நமீதா இருந்ததையும் எமது விழிகள் கவனித்தது. அதாவது குளிப்பது மற்றும் அவசரத்துக்கு, ஆனால் கழிவறை அல்ல காரணம் இது இருப்பது தெருவில்தான். சரி ஒருபுறம் மாரியம்மாள் இருக்க, மறுபுறம் குளித்துக் கொண்டு கழிவுநீரை வார்த்து விடுவது முறையான பக்தியா ?
 
நமக்கு மன்னர்கள் காலத்தில் கட்டி வைத்த கோயில்கள் போதாதா ? அவைகளை வணங்கி, பராமரித்து பாதுகாத்து வரலாமே... எதற்காக இந்த தவறுகளை மக்கள் செய்கின்றார்கள் ? மாரியம்மாள் தெய்வம்தானே ? இப்படி இழிசெயல்கள் செய்யும் மக்களை காப்பாளா ? புதிது, புதிதாக கோயில்கள் கட்டி பயன்னென்ன ? உண்மையான பக்தி இல்லையே... புதிதாக கட்டும் கோயில்கள், புதிப்பிக்கும் பழைய கோயில்கள் இவைகளில் டைல்ஸ், மார்பிள், கிராணைட் கற்கள் பதிக்கின்றார்களே இது முறையா ? அல்லது செலவு கணக்கு காண்பித்து கொள்ளை அடிப்பதற்க்கான வழி முறைகளா ?
 
பழைய கோயில்களில் தரிசனம் முடிந்தவுடன் கோயிலை மூன்று தடவை பிரகாரம் சுற்றி வரவேண்டும் என்ற சம்பிரதாயத்தை நமது முன்னோர்கள் நமக்கு கடைப்பிடிக்க வைத்தார்களே அதன் காரணமென்ன ? அப்பொழுதுதான் தெய்வம் நமக்கு பலனைத்தரும் என்றா ? இல்லை, காரணம் கோயில் பிரகாரம் சுற்றும் நடைபாதை முழுவதும் கரடுமுரடான அகலமான முண்டுக்கல் பதித்து இருந்தார்கள். அதில் நடக்க வைக்க வேண்டும் என்பதற்காக. மற்றபடி தெய்வம் இப்படி சொல்லவேயில்லை.
 
பண்டைய மக்கள் காலையில் கோயிலுக்கு சென்று தரிசிப்பதை கடமையாக கருதி கட்டாயமாக சென்று வந்தார்கள். நமது முன்னோர்கள் தாம் மூன்று முறைகள் சுற்றி வரும்போது இதில் தினந்தோறும் நடந்து வந்தால் ? சுமார் ஒரு மைல்கள் நடந்து இருப்போம். இப்படி கல்லில் நடப்பதால் காலுக்கு இன்று அக்குபஞ்சர் என்று சொல்லப்படும் சிகிச்சையை தானாகவே செய்து வந்தோம் இதனால் முழங்கால் வலிகள் வராது, கால்களும் வலுப்பெறும்.
 
அதனை மறந்தோம் இன்று மூட்டுவலி தைலங்களை தொலைக்காட்சி விளம்பரங்களில் போலிகளில் எந்த போலி நல்ல போலி என்று தேடிக்கொண்டு இருக்கிறோம். இந்தக் கோயில்களில் நவீனமாக டைல்ஸ், மார்பிள், கிராணைட் கற்கள் பதிப்பதுகூட மக்களுக்கு வியாதிகளை வரவைத்து வைத்தியம் பார்க்க வைக்கும் மறைமுக சதி என்றே இருக்கும். இதனுள் பள்ளிவாசல்கள், சர்ச்சுகளும் அடங்கும். இதன் பின்னே உலகலாவிய அரசியல் சதிகள் இருக்கும் என்பதே எனது திண்ணமான எண்ணம்.
 
பக்தி தேவைதான் அவைகள் பிற மதங்களில் பார்வைக்கு கேலிக்கூத்தான விடயங்களை உறுதி படுத்தக்கூடாது என்பதே எமது தாழ்மையான கருத்து. தேவகோட்டையில் நானூறு ஆண்டுகள் பழமையான தெப்பக்குளத்தோடு கூடிய பெரிய சிவன் கோயில் இருக்கிறது. இங்கு கந்தர்சஷ்டி திருவிழா எல்லா வருடங்களும் நாட்டுக்கோட்டை செட்டியார்கள் சமூகத்தினரால் இன்றும் சிறப்பாக நிகழ்ந்து வருகிறது. இதில் எனக்கு வருத்தம் என்னவென்றால் சாதாரண தினங்களில் இங்கு மக்கள் வருவதில்லை.
 
ஆனால் எனது வீட்டின் அருகில் கட்டியுள்ள சாய்பாபா கோயிலுக்கு கூட்டம் தெருவே அடைக்கும் அளவுக்கு மக்கள் வருகிறார்கள். சிவன் வழங்காத அருளை நேற்று வந்த சாய்பாபா தருகிறாரா ? சாய்பாபா வாழ்ந்து மறைந்த ஓர் மாமனிதர் என்பதையும் இங்கு பதிவு செய்கிறேன். பதிவு நீண்டு விட்டதால் இதனைக் குறித்து விரைவில் மீண்டும் எழுதுகிறேன்.
 
கில்லர்ஜி அபுதாபி
 
சிவாதாமஸ்அலி-
எல்லோருக்கும் பிரச்சனை எத்தை தின்றால் பித்தம் தெளியும் என்ற நிலை.
 

காணொளி

Share this post with your FRIENDS…