குழந்தைகள் சுமைதாங்கி கல்லா ?

வணக்கம் நண்பர்களே அன்றாடம் இந்தக் காட்சிகளை பலரும் சாலையில் மட்டுமல்ல, தங்களது வீட்டில்கூட கண்டு மனம் வருந்தி இருப்பீர்கள். அதாவது ஐந்து அகவை உள்ள குழந்தைகள் பள்ளிக்கு செல்வதை அவர்கள் எப்படி செல்கிறார்கள் ? தங்களது எடைக்கு மீறிய புத்தகச் சுமைகளை முதுகில் தூக்கிக் கொண்டு செல்வதை. கூன் விழுந்த பாண்டியர்களைப் போல் அவர்களை இப்படி செல்ல வைப்பது சரியா ?
 
பிறநாடுகளில் குழந்தைகளின் உயிர்களுக்கு எவ்வளவு பாதுகாப்பு கொடுக்கிறது தெரியுமா ? பள்ளி பேருந்துகளை முந்திச் செல்வதுகூட குற்றம். ஏதோவொரு நாடு அதன் பெயர் நினைவில் இல்லை குழந்தைகளை 12-வது அகவையில்தான் பள்ளியில் சேர்க்க வேண்டும். அதுவரையில் அவர்கள் இந்த உலக வாழ்வை சந்தோஷமாக அனுபவிக்கட்டுமே... இப்பொழுது பால்குடி மறக்காத ஒரு வயதில் பால்வாடி என்ற பள்ளியை உருவாக்கி அதிலும் வருமானத்தைப் பெருக்கி கொள்கின்றார்கள்.
 
இவைகளை புரிந்து கொள்ளாத நாம், நமது பிள்ளை நாளையே மாவட்ட கலெட்டராக வருவது போல நினைத்துக் கொண்டு பணத்தை கட்டி சேர்க்கிறோம். அது கல்லூரியை விட்டு வெளியே வந்து கூத்தாடிகளின் பதாகைகளுக்கு பாலூற்றி தனது வாழ்வை பாழாக்குகின்றது. வெளிநாடுகளில் பள்ளிக் குழந்தைகளின் பேருந்தின் கதவுகள் முழுமையாக அடைத்த பிறகே புறப்படும் இங்கு வாயிலில் பத்து குழந்தைகள் தொங்கி கொண்டு செல்கிறது. காரணம் இலவச அட்டையில் செல்கின்றார்களாம்.
 
அதனால் இவர்களுக்கு மதிப்பு இல்லை மேலும் நாட்டை ஆளும் வெட்டி முந்திரிகள் நல்லா ஓசியில் போறீங்களா ? என்று நம்மைக் கேட்கிறது தனக்கு அனைத்துமே ஓசி என்பதை மறந்து விட்டு, காரணம் நாம் இவைகளை மறந்து விட்டு இவர்களுக்கே மீண்டும் ஓட்டளிப்போம். நாம் பால்வாடியில் குழந்தைகளை சேர்ப்பதற்கு முதல் காரணம் கணவன்-மனைவி இருவருமே வேலைக்கு செல்கின்றார்கள். வேலைக்கு செல்வது எதற்கு தெரியுமா ? நமது ஒண்ணே ஒண்ணு, கண்ணே கண்ணை எல்.கே.ஜி. சேர்க்க பணம் வேண்டுமே அது மட்டுமா ? கல்லூரி வரையில் படிக்க வைக்க வேண்டுமே...
 
மேலும் வீட்டில சுட்டி செய்கிறதாம் அட அற்பப்பதறுகளா... சுட்டி செய்தால்தான் அது குழந்தை இல்லை எனில் அது பிண்டம். நீ மட்டும் சாதாரண ஆளா ? பின்புறம் வால்தான் இல்லை. குழந்தையின் சுட்டியை இரசிக்கத் தெரியாதவன் இவ்வுலகில் எதைத்தான் ரசிப்பான் ? பிறகு உங்களுக்கு என்ன மானாவுக்கு குழந்தை ? அன்று பத்து குழந்தைகள் பெற்று வளர்க்கவில்லையா ? அதேநேரம் அன்று ஐந்தாவது அகவையில்தான் பள்ளியில் சேர்த்தனர்.
 
என்னுள் ஓர் குழப்பமான கேள்வி ஐந்து அகவை நிரம்பாத குழந்தையின் முதுகில் ஆறு கிலோ புத்தகச்சுமையை ஏற்றிடும் நாம், இருபத்து இரண்டு அகவை நிரம்பி கல்லூரி போய் பெரிய்ய்ய்ய்ய்ய்ய்ய படிப்பை படிக்கப் போகின்றவன் கையில், ஒரு சிறிய நோட்டை மட்டுமே எடுத்துக் கொண்டு அதையும் மரியாதை இன்றி விரல் நுணியில் சுற்றிக்கொண்டு போகின்றானே இது முறையா ? இந்த இழிநிலைக்கு காரணவாதி மக்களா ? அரசா ?
 
கில்லர்ஜி அபுதாபி
 
சிவாதாமஸ்அலி-
மக்கள் மாக்கல்லாக இருக்கும் வரையில் விடிந்தும் விடியாது.

Share this post with your FRIENDS…