கண்டாலே காண்டாகிறது

நட்பூக்களே... நமது நாட்டில் திருமணம், கோயில் விசேஷம் போன்ற இடங்களுக்கு செல்லும் பொழுது பெண்கள் தங்க நகைகள் அணிந்து செல்வார்கள், அதிலும் பெரும் செல்வந்தர்கள் என்றால் வைர நகைகள் அணிந்து செல்வதும் வழக்கம். ஆனால் வீட்டில் சாதாரணமாக சும்மா இருக்கும் பொழுது சமைத்து முடித்து வீட்டிலுள்ள வேலைகளை செய்து விட்டு குளித்து, முடித்து சாதாரண சேலை உடுத்தி அல்லது இன்றைய தேசிய உடையான நைட்டியை அணிந்து சுத்தமாக இருப்பார்கள்.

 

அதேநேரம் எவ்வளவு பெரும் செல்வந்தர்கள் குடும்பமாக இருந்தாலும் வீட்டில் இருக்கும் பொழுது பட்டுப்புடவை உடுத்திக் கொண்டு, வைர நகைகளை அணிந்து கொண்டு ஹாலில் வந்து பத்து நபர்களுக்கு மேலாக சுற்றி நின்று கொண்டு வசனம் பேசமாட்டார்கள். நடைமுறையில் பல குடும்பங்களும் தனிக்குடித்தனமே இரண்டு நபர்கள், அதிக பட்சமாக குழந்தை பிறந்தால் மூன்று நபர்கள். அதிலும் வசதி இல்லாதவர்கள் எண்ணை வழிந்த முகங்களோடு இருப்பார்கள் மேலும் சிலர் வேப்பண்ணை கிராக்கி மாதிரியும் இருக்கக் கூடும்.

 

ஒருமுறை மணமேல்குடி உறவினர் வீட்டுக்கு சென்று இருந்தேன் வீட்டில் தொலைக்காட்சியில் நாடகம் ஓடிக்கொண்டு இருந்தது. அதன் காரணமாக இடைவேளை நேரத்தில் மட்டும் என்னிடம் பேசினார்கள். பிறகு பயபக்தியோடு நாடகத்தை பார்க்கின்றார்கள். நமக்கு இவைகளை கண்டாலே காண்டாகும் ஆனாலும் வந்த இடத்தில் சொல்லவா முடியும்.

 

வேறு வழியின்றி இன்று நாமும் ஜோதிகாவோடு மன்னிக்கவும் ஜோதியோடு ஐக்கியமாவோம் பதிவுக்கு வழி கிடைக்கும் என்று பார்த்தேன் அதாவது நாடகத்தில் வருபவர்கள் எல்லோருமே,. பெருங்கொண்ட பங்களாவாசிகளாக இருந்தார்கள். உடைகளும் பட்டுப்புடவைதான் கட்டி இருந்தார்கள், விதம் விதமாக வைர நகைகள் அணிந்து இருந்தார்கள். அறையிலிருந்து வெளியில் ஒவ்வொருவராக வருகின்றார்கள். நான் நினைத்தேன் ஏதோ உறவினர் வீட்டு சடங்குக்கு போகின்றார்கள் போல என்று நினைத்தேன்.

 

எனது நினைப்பில் மண் விழுந்தது எல்லோரும் கூடி நின்று அதை அப்படி செய்யணும், இதை இப்படி செய்யணும் என்று ஏதேதோ பேசினார்கள் எனக்கு அடிப்படை விளங்கவில்லை காரணம் மூன்று வருடங்களுக்கு முன்பு ஆரம்பித்த நாடகமாம் அன்றே நான் மணமேல்குடி வந்து இருந்தால் ஒருவேளை கதை (?) புரிந்து இருக்கலாம். இவர்களின் வைர நகைகள் மீது எனக்கும் ஆசை வந்தது நகைகளின் அழகை பார்த்த எனக்கு அவர்களின் தாலி எங்கே ? என்று சந்தேகப்பொறி தட்டியது.

 

இவர்கள் எல்லோருமே சுமங்கலிதானே, இதோ இவன் அவளோட புருசன், அதோ அவன் இவளோட புருசன் என்று மனம் கணக்கு போட்டதும். நின்ற ஆறு பெண்களின் கழுத்தையும் பார்த்தால் மஞ்சக்கயிற்றில் கட்டிய தாலி இல்லை. சிலர் சொல்லலாம் இப்பொழுது தாலிச்செயின் தங்கத்தில்தான் போடுகின்றார்கள் அதனால் மஞ்சக்கயிற்றை பார்க்க முடியாது என்று. நானும் சோபாவிலிருந்து எழுந்து போக முடியாமல் ஆந்தி, ஆந்தி பார்த்தேன்.

ஒரு வழியும் கிடைக்கவில்லை காரணம் நெக்லஸ் போட்டு இருக்கின்றார்கள் அதன் மோடல் அமைப்பே இங்கு தாலிக்கு வேலை இல்லை என்று திட்டவட்டமாக அறிவித்தது. இந்த மாதிரியான சாக்கடைகளில்தான் நமது தாய்க்குலங்கள் மூழ்கி கிடந்து வெளியுலகம் வராமல் இருக்கின்றார்கள். வந்தால்தானே விலைவாசி குறைவதற்கான மாற்று வழிகள் நமது அறிவுக்கண்ணுக்கு புலப்படும்..

 

அடுத்து மற்றொரு விடயம் இதில் வந்து கண்ணீர் சிந்தி விட்டு போவதற்காக வரும் பெண்கள்கூட சுமார் மூன்று இஞ்ச் அளவுக்கு பவுடர் அடித்து இருக்கின்றார்கள். இதை எப்படி கண்டு பிடித்தேன் தெரியுமா ? கிளீசரின் உதவியால் கன்னங்களில் வழிந்து ஓடும் நீர் பவுடரை ஆழம் பறித்து குழியாக்கி ஓடுகிறது. இதன் வழி எனது அறிவால் யோசித்து தெரிந்து கொண்டேன்.

 

மேலும் தனது கதாபாத்திரம் 35 அகவை பிள்ளைகளுக்கு அம்மாவாக இருந்தாலும், ஏன் பாட்டியாக இருந்தாலும்கூட தலைமுடி நரைப்பதை பெண்கள் ஒத்துக் கொள்ளாமல் டை அடித்து வருகின்றார்கள். ஆனால் அப்பாவாக நடிக்கும் ஆண்கள் இவ்விசயத்தில் சரியாக வருகின்றார்கள் காரணம் வயதும் சரியாக இருக்கும், ஒப்பனையும் போடுவதில்லை. இரண்டும் இணைந்து சரியாகி விடும்.

 

இதோ மேலே முதல் புகைப்படத்தில் இருக்கும் பெண்மணிக்கு, கீழே மருத்துவமனையில் படுத்து கிடக்கும் ஆண் என்ன உறவாக இருக்ககூடும் ? என்று உங்களிடம் கேட்டால் அவளது ஒப்பனையும், உதட்டுச்சாயமும் பார்த்து, அவளுக்கு அண்ணன் அல்லது கணவனாக இருக்கும் என்று கணிப்பீர்கள். ஆனால் உண்மையில் அதாவது கதாபாத்திரத்தில் அந்தப்பெண் அவனுக்கு அம்மா ஆம் பெற்றெடுத்த அம்மா அவன் மட்டுமல்ல அவனைப் போல இன்னும் இரண்டு எருமை மாடுகள் இருக்கிறது. என்னாங்கடா இது உங்க கதை சொல்லும் போக்கு ?

 

கில்லர்ஜி அபுதாபி

 

சிவாதாமஸ்அலி-

திருச்சிக்காரவுங்க இதை எப்படித்தான் பொறுமையாத பார்க்கிறாங்களோ.. ?

 

அவசியம் (காணொலி) கேளுங்கள்