தலைவர் தண்டல்பாடே

தையரதக்காபுரம் பண்ணை பங்களா கொ.இ.க தலைவர் தண்டல்பாடே தொண்டர்களை தேர்தல் தோல்விக்குப் பிறகு தன்னை சந்திக்க அனுமதி வழங்கி இருந்த காரணத்தால் அல்லக்கைகள் முதல், அடிவருடிகள் வரை அலைமோதிய கூட்டத்தை அடியாட்கள் கூட்டம் வசப்படுத்தி வடக்கு பக்கமாக போட்டிருந்த நிரந்தர கொட்டகை பந்தலில் ஒதுக்கியது.
 
இதோ தலைவர் இப்பொழுது மாடியை விட்டு கீழே இறங்கி வருவதாக கூட்டத்தில் கிசுகிசுவாக குசுகுசுவென்று பேச்சு அடிபட்டது. பங்களா வாசலில் தலைவரின் பளீர் முகம் கண்டதுதான் தாமதம்...
 
‘’தலைவர் பாடே’’
‘’வாழ்க’’
‘’தலைவர் பாடே’’
‘’வாழ்க’’
‘’தன்மானத்தலைவன் பாடே’’
‘’வாழ்க’’
 
தொண்டை வறண்டு கத்தினார்கள் வாங்கிய கூலிக்கு... கோஷம் விண்ணைத் தொட்டு பிளந்தது...
 
இந்திரலோகத்தில் சயன அறையில் தேவதைகளை வதை செய்து கொண்டிருந்த இந்திரன் கீழே என்ன சத்தம் இந்த நேரம் ? உயிரின் ஒலியா ? என்று கேட்க, தேவதையொருத்தி கீழே தையரதக்காபுரத்தை நோக்கி விட்டு...
ஏதோ அரசியல் அடிவருடிகளின் கோஷம் பிரபு என்றாள்.
 
தண்டல்பாடே கூட்டத்தை வணங்கியபடியே மேடையில் ஏறினார் மய்யமாக போட்டிருந்த சோபாவில் அமர்ந்து கையை அசைத்து தொண்டர்களை அமரச் சொன்னார். 24/7/30/365 நேரமும் கெனிக்கென் பீரை குடித்து, கன்னங்கள் உப்பி ஊரின் பண்ணையைப் போல தொந்தியை வார்த்து, வளர்த்து வந்தார்.
 
நன்றாக சிலம்பம் ஆடுவார், ஆடுவதுபோல தொண்டர்களை அடித்தும் விடுவார். கம்பு எடுக்கும்போது யாரும் முன்னே வரமாட்டார்கள். இது உங்களுக்கும் சேர்த்துதான் சொல்கிறேன். முப்பது வருடங்களுக்கு முன்பு வடக்கிலிருந்து பானிபூரி விற்றுக் கொண்டே அரக்கோணம் வந்தவரை, வந்தாரை வாழ வைக்கும் தமிழகம் அள்ளி அணைத்து கொண்டது.
 
சிகப்பு தோலையும், தத்தக்கா, புத்தக்கா உச்சரிப்பிலும் மயங்கிய தமிழர்கள் தலைவராக்கினார்கள். பாடே என்ற தனது ஜாதிப்பெயரை இணைத்துக் கொண்டால்தான் தன்மீது டெல்லிக்கு மரியாதை இருக்கும் என்பதை அறிந்தவர் தண்டல்பாடே. இந்தப்பாடையில போற தெண்டங்களுக்கு பாடே என்பது ஜாதி என்று தெரியாது ஆகவே கோஷம் போட்டே சாகின்றார்கள்.
 
‘’என்னாது உயிதிள் களன்ட உதவுகலே’’
(எனது உயிரில் கலந்த உறவுகளே)
 
என்று தொடங்கியதுதான் தாமதம் விசில் சத்தம் மீண்டும் அந்த தேவதையை எட்டிப் பார்க்க வைத்தது. காலம் முழுவதும் தமிழனை கத்த வைக்க தலைவர்கள் கண்டு பிடித்து வைத்த ஒன்றை வார்த்தைகளில் எத்தனை சக்தி வழக்கம் போல் அமைதியாக கேட்ட பிறகு, உதவியாளர் உத்தவ்வை பார்க்க...
 
உதவ், உத்தவ் மைக்கை கையில் எடுத்து,
ஆர்ப்பரிக்கும் சிங்கங்களே தொண்டர்களே இப்பொழுது அங்கு கொடுக்கப்பட்டு இருக்கும் மைக்குகளை வாங்கி நமது தொகுதிகளில் உள்ள பிரச்சனைகளை தெளிவாக தலைவரிடம் விளக்கி சொல்லுங்கள் வரிசையாக சலசலப்பு இல்லாமல் பேசுங்கள். உங்களது பிரச்சனைகளுக்கு தலைவர் முடிவில் தீர்வு சொல்லுவார்கள்.
 
அல்லக்கை ஒன்று மைக்கை முதல் வரிசையிலிருந்து கொடுத்து வாங்க ஆரம்பித்தது...
 
நபர் - 1
தலைவா வணக்கோம் எங்க ஊத்துப்பேட்டை தொகுதியிலே சாக்கடை நாத்தம் தாங்க முடியலை முனுசுபாலிட்டியிலே சொன்னா ஆளுங்கச்சிகாரங்க போலீசை வுட்டு அடிக்க வராங்க... கேசு போட்டு உள்ளே தள்ளுறாங்க...
 
நபர் - 2
தல போன தடவை நம்ம ஆச்சியிலே நீ கொடுத்த பொட்டிக்கடை பெட்டி அதுலதான் நான் யாவாரம் பாத்துக்கிட்டு வந்தேன் இப்ப என்னை எடத்தை காலி பண்ணச் சொல்லி டாச்சர் குடுக்கிறாங்கே தல...
 
நபர் - 3
வணக்கோம் தலைவரே நான் தேர்தல் மேடையில கொஞ்சம் ஓவரா பேசிப்புட்டேன் அதுக்கு இப்ப ஆளுங்கச்சிகாரங்கே ரோட்ல நடக்க வுட மாட்றாங்கே. வூட்ல பொண்ணு, பொரசுங்க வெளியே போக முடியல கொஞ்சம் சரி பண்ணி கொடுங்க தலைவரே...
 
நபர் - 4
தலைவா ரோடு காண்ட்ராக்ட் எல்லாம் நான்தான் எடுத்துக்கிட்டு இருந்தேன், நம்ம ஆளுதான் மங்காத்தா இப்ப ஆளுங்கச்சியிலே மாவட்ட செயலாளர் சென்னிமலையோட சேர்ந்துக்கிட்டு என்னை கழட்டி விட்டுட்டா தலைவரே...
 
நபர் - 5
தலைவரே நம்ம ஆட்சியல இருக்கும்போது தம்பி காலேஜ்ல பொட்டணம் வித்தான் போலீஸ்காரங்க கண்டுக்கலை இப்ப ஆளுங்கட்சி சகலையோட மச்சினன் ஒருத்தன் அவன்தான் விற்கணும்னு போலீசுல சொல்றாங்க ஒரு போனு போட்டு சொல்லுங்க தலைவரே...
 
சரி, சரி போதும் தலைவருக்கு டெல்லியில மீட்டிங் இருக்கு அடுத்த முறை பேசிக்கலாம் இப்ப தலைவர் உங்களுக்கு இதற்கான தீர்வை சொல்வாரு எல்லோரும் அமைதியாக இருங்க... சொல்லி விட்டு மைக் ஸ்டாண்டை அவரது வாயின் அருகில் வைத்தான் உதவ் உத்தவ்.
 
தலைவருடைய உச்சரிப்பை அப்படியே எழுதினால் பலருக்கும் புரியாது, மேலும் காது கொடுத்து கேட்க... மன்னிக்கவும் வாய் கொடுத்து படிக்க முடியாது ஆகவே நானே முழி பெயர்த்து தருகிறேன்.
 
ஓரளவுக்கு மேல்தான் நாம் பொறுமையை கையாள முடியும் அதற்கு மேல் செய்ய வேண்டியதை செய்வோம்.
 
சொல்லி விட்டு எழுந்த தலைவர் கூட்டத்தை வணங்கி விட்டு பங்களாவை நோக்கி நடந்தார். கோஷம் மீண்டும் இந்திரனை கடுப்பேற்றியது. தலைவரது உரையின் உள்ளார்ந்த வார்த்தைகளின் அர்த்தம் இங்கு வந்திருக்கும் ஒவ்வொரு தொண்டர்களுக்கும் அத்துபடி ஆகவே...  அடுத்த சில நாட்களில் தொலைக்காட்சி, தினத்தந்தி பத்திரிக்கைகளில் செய்திகளை பார்க்கலாம்.
 
கில்லர்ஜி தேவகோட்டை
 

காணொளி

 
சிவாதாமஸ்அலி-
ஏண்டா நாதாரிகளா... கொசுக்கடி பிரச்சனைக்கெல்லாம் ஃபாம் போடுவீங்களாடா... ?
 
Chivas Regal சிவசம்போ-
இந்த மாதிரித்தான் எல்லாக்கட்சி அரசியல்வாதிகளும் காலத்தை ஓட்டுறாங்களோ ?

Share this post with your FRIENDS…