முதலூர், முதலாளி முத்தையா

    அந்த முதலூர் முத்து தியேட்டரின் வளாகத்தில் வேலையற்ற ரசிகர்களின் பெருங்கூட்டம் நிரம்பி வழிந்தது ‘’வெல்டிங் ஸ்டார்’’ வடுகநாத் நடித்த சிவப்பு ரத்தம் வெளியாகி இருந்தது. அருபது அடி உயர பதாகையில் திருப்பாச்சி அருவாளிலிருந்து இரத்தம் சொட்டுச் சொட்டாக வழிந்தது போல வைத்து இருந்தனர். அதன் உச்சியில் ஏறி நின்று மூன்று முடுதாருகள் பாலை ஊற்றிக் கொண்டு இருந்தனர். தமது வாழ்வு பாழாவது தெரியாமல்.
 
பால் அந்த சாலையில் வழிந்தோடிக் கொண்டு இருசக்கர வாகனங்களை தடுமாற வைத்ததைக் கண்டு ரசிகக்குஞ்சுகள் காணொளி எடுத்து அதை உடனுக்குடன் வாட்ஸ்-ஆப்பில் வெளியிட்டு புலங்காகிதம் அடைந்தனர். ஆயிரம், ஐநூறு வாங்கி வாக்களித்த, மக்கள் வெட்கமே இல்லாமல் ஆளும் அரசை சபித்துக் கொண்டு சென்றனர் ஏதோ இவர்கள் அரிச்சந்திரன் குடும்பத்தில் பிறந்து வந்தவர்களைப் போல....
 
மேலும் ரசிகக்குஞ்சுகள் விசிலடித்தும், கரகோஷம் எழுப்பியும், தெருவில் செல்லும் மக்களின் காதை கிழிக்க வைத்து மகிழ்ந்தனர். காவல்துறையினர் தங்களது வாகனத்தை சாலையோரம் போக்குவரத்துக்கு இடையூராக நிறுத்தி வைத்து போக்குவரத்தை ஒழுங்கு படுத்திக் கொண்டு இருந்தனர். யாரையும் அடிக்க கூடாது என்று மேலிடத்திலிருந்து வந்த இரகசிய உத்தரவு. ஆனால் அவ்வழியே வேலை விசயமாக சென்றவர்களை தடியால் விரட்டினர்.
 
தியேட்டரின் முதலாளி முத்தையா மேலே மாடியில் நின்று கண்ணாடி வழியாக புன்முருவலுடன் பார்த்துக் கொண்டு நின்றார். திடீரென்று பரபரப்பு கருப்பு நிறத்தில் BMW கார் வந்து நிற்க, எம்.எல்.ஏ. வந்து விட்டாரோ என்று பயந்த காவல்துறையினர் அதிரடியாத சூழ்ந்திட, பிறகுதான் தெரிந்தது வந்தவர், அம்மாவட்ட வெல்டிங் தலைமை ரசிகர் மன்ற செயலாளர் செல்லத்துரை காரில் வந்து இறங்க, ரசிகர் வட்டம் சூழ்ந்து கொண்டு செயலாளர் செல்லத்துரை வாழ்க என்று கோஷமிட, வேறு வழியின்றி செயலாளரை உள்ளே அழைத்து கொண்டு விட்டனர்.
 
மாலைக்காட்சி தொடங்குவதற்கு சற்று நேரமே இருந்தது, திடீரென்று அலறல் சத்தம் கேட்டு கூட்டம் ஓடிப் போய் பார்க்க பதாகையின் மேலே நின்று தலைவனுக்கு பாலுற்றிக் கொண்டு இருந்தவன், சாரத்தின் பிடியிலிருந்து நழுவி கீழே விழுந்து இரத்த வெள்ளத்தில் துடித்தான். தலைவனுக்கு பாலாபிஷேகம் செய்தவன் இப்போது இரத்தாபிஷேகம் செய்து கொண்டு மயக்க நிலைக்கு போனான். உடல் மண்ணுக்கு, உயிர் தலைவனுக்கு.
 
கில்லர்ஜி தேவகோட்டை

Share this post with your FRIENDS…