அன்று உணர்வாய்...

 

வணக்கம் நட்பூக்களே... மேலேயுள்ள சுவரொட்டியில் நண்பருக்கு திருமணம் இதற்கு வாழ்த்துகளை தெரிவிப்பது மகிழ்ச்சியான விடயமே.. காரணம் அப்பத்தானே அவன் நமக்கு ஒட்டுவான் இதுதான் அடிப்படை காரணம் மொய் செய்துதானே... மொய் பெறுகிறோம். என்பதே மெய். இதற்கு மணமக்களின் புகைப்படத்தை போடுவது தவறில்லை அதைப்பார்த்து மாப்பிள்ளை பெருமைப் படலாம்தானே...
 
ஆனால் அவசியமற்ற திரைப்படக் கூத்தாடன்கள் மேலிருப்பவர்கள் போன்றவர்களின் படத்தை போடுவது அவசியம்தானா ? இதை அவர்கள் பார்த்து விட்டு இவனுடைய திருமணத்திற்கு அவர்கள் சுவரொட்டிகள் ஒட்டப் போகின்றார்களா ? அதுவும் மணமக்களின் புகைப்படம் சிறிய அளவில் கூத்தாடன்களின் படம் பெரிய அளவில். அதுவும் சில திருமணங்களிஸ் சுவரொட்டிகள் ஒட்டுவார்கள் பார்த்து இருப்பீர்கள் அவனது ஆதர்ச நாயகன் திருமண வீட்டில் கையில் அருவாளுடன் இரத்தக்களரியாக நிற்பான்.
 
இப்படி அமங்கலமான படத்தை போடலாமா ? என்று பெரியவர்களும் கேட்பதில்லை, கேட்டாலும் ஒன்றும் மாறப்போவதில்லைதான். உலகில் ஏமாற்றுபவன் அறிவாளி, ஏமாறுபவன்தான் முட்டாள். காரணம் ஏமாற்றுவதற்கு அறிவு வேண்டும். மற்றவர்கள் ஏமாற்றுகின்றார்களோ... இல்லையோ நான் ஏமாறுவேன் என்று கங்கனம் கட்டி வாழ்பவன்தான் இன்றைய படித்த தமிழன்.
 
இதில் இன்னுமொரு கோமாளி ரசிகர்களை காணலாம் இரண்டு மூன்று கூத்தாடன்களின் புகைப்படங்கள் போட்டு இருக்கும் அதாவது நாங்கள் ஒன்றுமையாக இருக்கின்றோம் என்று இந்த சமூகத்துக்கு சொல்கின்றார்களாம். அடேய் கூதரைகளா... உங்கள் வீட்டில் இன்று அடுப்பு எரிந்ததா ? அதைப்பாருங்கள். இப்படி பணத்தை விரயம் செய்யாதீர்கள்.
 
நிச்சயம் ஒருநாள் தமிழகம் பசி, பட்டினியால் புரட்சியில் இறங்கும் அன்று உனது நாயகன் அயல் நாடு பறப்பான் குடும்பத்தோடு நிம்மதியாக வாழ்வதற்கு. மக்களின் கோபம் முதலில் உங்கள் மீதே விழும் உங்களது தவறுகளை அன்று உணர்வாய் மக்கள் மன்னிப்பார்களா ? என்பது உனது விதியால் தீர்மானிக்கப்படும்.
 
கில்லர்ஜி தேவகோட்டையிலிருந்து...
 
சிவாதாமஸ்அலி-
இவங்கே யோசித்து விட்டால் அவங்கெளுக்கு நல்ல வாழ்க்கை ஏது ?