மன்னித்து விடு மகளே...

நமது ஊரில் அவசியமின்றி மகிழுந்தில் பறக்கும் மக்களே... இந்த குழந்தை பள்ளிக்கு செல்லும் பொழுது இப்படி சேற்றை வாறி இறைத்து செல்கின்றீர்களே... இவள் உனது மகளாக இருந்தால் எப்படி இருக்கும் ? உனக்கு பணத்தின் திமிரா ? வீடு பக்கத்தில் இருந்தால்கூட உடன் மாற்றி செல்லலாம். ஒருவேளை மற்றொரு சீருடை அழுக்காக இருந்தால் ?
 
மேலும் இந்தக் குழந்தைக்கு வீட்டிலும் வசை கிடைக்கலாம் ? பள்ளிக்கு தாமதமாக சென்று அங்கும் ஆசிரியரின் வசையும் கிடைக்கலாம் ? உங்களை எல்லாம் சிங்கப்பூர் போன்ற நாடுகளில் வேலைக்கு அனுப்பி பாடம் படிக்க வைத்தால்தான் உணர்வீர்களா ? அரபு நாடுகளில் தலைக்கு தலை, கண்ணுக்கு கண், கைக்கு கை என்று குற்றவாளிக்கு தண்டனை கொடுப்பார்கள். இந்தியாவுக்கும் இது வந்தால்தான் குற்றவாளிகளின் எண்ணிக்கை குறையும்.
 
ஆனால் இந்த சட்டங்களை இயற்ற வேண்டிய அரசியல்வாதிகள் இவைகளுக்கு முட்டுக்கட்டை போட்டுக் கொண்டே காலம் கடத்துவார்கள். காரணம் இவைகள் சட்டமானால் அவர்களின் வாரிசுகள்தான் முதலில் பாதிக்கப்படுவார்கள். ஒழுக்கம் என்பது நமது நாட்டு மக்களின் மனதுக்கு ஒட்டாத எட்டாக்கனியாகவே தெரிகிறது. ஒழுக்கத்தை ஓர்முறை சுவைத்துப் பார்த்தால் இறுதி காலம்வரை அச்சுவை தித்திக்கும். நியாயம், தர்மம், நீதி, நேர்மை, கண்ணியம், கட்டுப்பாடும் இப்படித்தான்.
 
உலகமெல்லாம் சுற்றி வரும் அரசியல்வாதிகள் அந்த நாட்டின் நல்ல செயல்களை தமது மக்களுக்கும் போதிக்கும் புத்தி வராதா ? எதற்குத்தான் இவர்கள் அரசாள வருகின்றார்கள் ? பணம் சேரக்க மட்டும்தானா ? அத்தோடு உங்களது கணக்கில் பாவமும் சேர்வது உமது அகக்கண்ணுக்கு தெரியவில்லையா ? புண்ணியத்தை நாடி வாருங்கள் தலைவர்களே...
 
அறச்சீற்றம் கொண்டு
கல்வி பயில் மகளே...
இவர்கள் முகத்தில் காறி
உமிந்து விடு மகளே...
உனக்கும் ஓர் எதிர்
காலம் உண்டு மகளே...
இந்த சண்டாளர்களை
மன்னித்து விடு மகளே...
 
கில்லர்ஜி அபுதாபி

Share this post with your FRIENDS…