அப்பா என்னும் தாரகமந்திரம்

‘’அப்பா’’ இந்த வார்த்தையை ஒரு தாரகமந்திரம் என்றும் சொல்லலாம் எமது பார்வையில் இந்த சமூகத்து மனிதர்கள் பலரும் இந்த அப்பாவை நிரந்தரமாய் பிரிந்த பிறகே உணர்கின்றார்கள் இதில் அனுபவப்பட்டு உணர்ந்தவர்களில் நானே முதலாமாவன் என்பதை வெட்கப்பட்டு ஒத்துக்கொள்கின்றேன் இந்த வட்டத்துக்குள் பெரும்பான்மை வரக்காரணம் என்ன ? வாழும் காலத்தில் தந்தையும், மகனும் நண்பர்களைப் போல வாழ்ந்து கடக்க முடியாதா ? இளவயதில் தந்தையை இழந்தவன் தந்தையின் பாசத்துக்கு ஏங்கி வாழ்கின்றான்.

தந்தையைப் பெற்ற அபாக்கியசாலி முதியோர் இல்லத்தில் சேர்க்கின்றான் இவன் நாளை நாம் இந்நிலைக்கு வரமாட்டோம் என்பதை ஆணித்தரமாக நம்புகின்றான் நிச்சயமாக இந்நிலை வரும் பொழுது தந்தையை நினைத்துப் பார்க்கின்றான் குற்ற உணர்ச்சியால் மனம் கனத்து அழுகின்றான் அனாதை ஆஸ்ரமங்கள் இந்த சமூகம் தோன்றிய காலத்திருந்து உள்ளது உண்மையே... இது சமூக ஆண்வர்க்கங்களின் ஒழுக்கமின்மையே அன்றி வேறென்ன ? 

சரி அது கிடக்கட்டும் தற்பொழுது முதியோர் இல்லங்கள் எங்கெங்கு காணினும் நவீன வசதிகளுடன்.... இதுவும் ஒரு வியாபார நோக்கத்தில் பெருகி விட்டதே இது எதனைக் குறிக்கின்றது ரத்தபந்த உணர்வுகளின் சுறுக்கத்தையா ? இல்லை தான்தோன்றித்தனமாக குறுகிய எண்ணப் பாட்டுகளுடன் இன்றைய இளைய சமூகம் எதிர் நோக்கிச்செல்லும் எண்ணிக்கைகளின் பெருக்கத்தையா ? இந்த தவறுகளின் தொடக்கம் எங்கே ? தந்தையர்களின் அணுகுமுறையிலா ? இல்லை பிள்ளைகள் புரிதலின் தவறான கோணத்திலா ? ஏதுவாயினும் இதன் பாதிப்பு யாருக்கு ? நமக்குத்தானே... அதாவது இன்றைய மகன் நாளை அப்பாவாகின்றான், அவனே பிறகு தாத்தாவாகவும் ஆகின்றார் இதுதானே இயல்பு வாழ்க்கை. இதை மனிதன் என்று உணர்கின்றானோ அன்றுதான் முதியோர் இல்லக் கட்டிடங்கள் தகர்த்து எறியப்படும்.

தந்தையை புரிந்து கொள்ள தந்தையானால்தான் முடியுமா ? அப்படியானால் பிரமச்சாரிகள் எப்படி புரிந்து கொள்வது ? அப்பா உங்களை விதைத்த திசையை நோக்கி உங்களை நினைவு கூர்ந்து இந்த நாளில் இரு சொட்டு கண்ணீரை காணிக்கை ஆக்குகின்றேன் உங்களை புரிந்து கொள்ள முயற்சிக்காத மடந்தையாகிய உங்கள் மகன்.

நட்பூக்கள் அனைவருக்கும் தந்தையர் தின வாழ்த்துகள்.

இன்று தந்தையர் தினத்தை கொண்டாடும் நாடுகளில் இந்தியாவும் ஒன்று.

- தேவகோட்டை கில்லர்ஜி அபுதாபி - 

கேளொலி