7 ½

வாங்க தொல்காப்பியம் என்ன காலையிலேயே இந்தப் பக்கம் உட்காருங்க, நல்லாயிருக்கீங்களா ?

நல்லாயிருக்கேன் பிரசாத், வேலைக்கு கிளம்பலையா... எங்கே உங்க புது மனைவியை காணோம்... ?

இன்னைக்கு சனிக்கிழமையில்ல... அதான் கோயிலுக்கு போயிருக்கா.

இன்னைக்கு எந்தக் கோயிலு ?

சனீஸ்வரன் கோயிலுக்கு.

சரிதான், என்னமோ கேள்விப்பட்டேன்.. எந்த நேரமும் வீட்ல சண்டையாம்..

என்ன செய்யிறது தினம் ஏழரையாத்தான் இருக்கு.

ஜாதகம் பார்த்துதானே, கல்யாணம் செஞ்சீங்க, ஆமா எத்தனை பொருத்தம் இருந்துச்சு ?

ஏழரை.

சரிதான் எந்த சோஸியருட்ட பார்த்தீங்க ?

நம்ம சோலந்தூர் சோஸியர் சோனைமுத்து.

அவரே ஒரு ஏழரை புடிச்சவரு, அவருட்டே போயி பார்க்கலாமா ?

(வீட்டுக்குள் நுழைந்த நளாயிணி)

வாங்கண்ணே நல்லாயிருக்கீங்களா ? அண்ணி நல்லாயிருக்காங்களா ?

ஆமாம்மா... என்ன கோயிலுக்கு போயிட்டு வர்றியா ?

ஆமா, இந்தாங்க பிரசாதம் எடுத்துகங்க...

வந்ததுக்கு பிரசாதம் கெடைக்கணும்னு, பிராப்தம் இருந்திருக்கு பிரசாத்துக்கு கொடுமா...

(நளாயிணி வெடுக்கென்று தலையை இழுத்து விட்டு அறைக்குள் நுழைந்தாள்)

என்னம்மா, பிரசாத்துக்கு பிரசாதம் கொடுக்கலையா ?

இதுக்கா  நான் பிரகாரம் சுத்தி பிரசாதம் வாங்கி வந்தேன் ?

என்னம்மா நீ புருஷனுக்கு, கொடுக்குறதுக்கு இப்படி செல்றே... ?

வேணும்னா அவரைப் போயி வாங்கச் சொல்லுங்க...

வேணாம் விடுங்க தொல்ஸ் இந்தச் சனியன்ட்ட, வாங்கி என்ன  ஆகப்போகுது ?

யாரு.. சனியன், நீங்களா ? நானா ?

ஏம்மா, நீ வாங்குனா என்ன புருஷன் வாங்குனா என்ன ?

இவரு கூடத்தான் சம்பளம் வாங்கிட்டு வர்றாரு எனக்கிட்டயா  கொடுக்குறாரு ?

பார்த்தீங்களா... இந்தக் கிரகத்தை கட்டிக்கிட்டு கண்டகண்ட நாய்க்கு முன்னாலயெல்லாம் அவமானப்பட வேண்டியிருக்கு... ச்சே என்னபொழப்பு.

(தனக்குள்... இவன் நாய்னு யாரைச் சொல்றான் ?)

இங்கே மட்டும் என்ன வாழுதாம் தெருவுலபோற நாயெல்லாம் கூட்டிக்கிட்டு வந்து தினம் பஞ்சாயத்து வைக்கிறது.

(தனக்குள்... இவ தெருநாய்னு யாரைச் சொல்றா ? சரிதான் இன்னைக்கு நமக்குத்தான் ஏழரை)

புடிக்கலைனா உன்அப்பன் வீட்டுக்கு போடீ...

போறேன் எனக்கென்ன சாதிசனம் இல்லையா ?

ச்சே... அன்னைக்கே, சொன்னேன்.....

கணவனும், மனைவியும் தொல்ஸ் வெளியே போனதுகூட தெரியாமல் 

சண்டையிட்டு கொண்டிருக்க..... வீட்டை விட்டு வெகுதூரம் வந்திருந்த தொல்காப்பியம் மணியை பார்த்தார் 07.30 am

7 ½ ஐ இழுத்து விட்டவர் நண்பர் திரு. அஜய் சுனில்கர் ஜோசப்