வடக்கோஸ்ரமா மடாலயம்

இடம் - வடக்கோஸ்ரமா தியான மடாலயம். அரவங்காடு.
 
வணக்கம் ஐயா வடக்கு நேசன் அவர்களே சமூக கட்டுக்காப்பாளரான தங்களை பேட்டி எடுக்க அனுமதி வழங்கியமைக்கு எங்களது காத்தாடி பத்திரிக்கையின் வாயிலாக முதற்கண் நன்றி. பேட்டியை துவங்கலாமா ?
வணக்கம் வடக்கின் வனவாசத்துடன் வரவேற்கும் உங்கள் வடக்கு நேசன்.

ஐயா உங்களுக்கு வடக்கு நேசன் என்று பெயர் வரக்காரணம் ?
நாங்கள் பரம்பரை, பரம்பரையாக சிவபக்தர்கள். எனது ஐயா சாம்பமூர்த்தி, சாம்பக்குளம் மடாதிபதியாக இருந்தார், எனது தந்தையார் சாம்பகிருஷ்ணன்,  சாம்பலூர் தேவஸ்தான அறங்கவலராக இருந்தவர், எனது இயற்பெயர் சாம்பசிவம். மரணத்தைக் குறித்து ஆராய்ந்து சிவனை தொழுது, அழுது எரிந்து சாம்பலாகி வடக்கே சிவனடி சேர்ந்து விட்ட காரணத்தால் வடக்கு நேசன் என்று எமக்கு நாமே நாமம் சூட்டிக் கொண்டோம்.
 
ஐயா புரிகிறது ஆனால் வடக்கே என்று சொல்கின்றீர்களே அப்படி என்றால் டெல்லியா ? அதாவது தாங்கள் பிஜேபி என்று சொல்கின்றீர்களா ?
அட ஞானசூன்யமே, நமீதாவுக்கும், சாமுத்திரிகா பட்டுப்புடவைக்கும் முடிச்சுப் போடும் உமக்கு என்ன மெய்ஞானம் இருக்கப் போகிறது ?
 
ஐயா வடக்கு என்பதின் அர்த்தம் என்னை அப்படி கேட்க வைத்தது ?
வடக்கு என்றால் திசையை குறிக்கும், நாளை நீ மரணித்து விட்டால் எந்த திசையை நோக்கி கொண்டு செல்லப்படுவாய் ?
 
அதாவது சுடுகாடு இருக்கும் திசையை நோக்கி...
அதேதான் சுடுகாடு வடக்கில்தானே இருக்கும், தெற்கே தலை வைத்து வடக்கே கால் நீட்டி வைக்கப்படுவாய்.
 
ஐயா நீங்கள் சொல்வது பண்டைய காலத்தில் ஊரின் ஒதுக்குப்புறமாய் வடக்கு திசையில் இருந்து இருக்கும். இப்பொழுது சுடுகாட்டையும் தாண்டி கார்ப்பரேட் முதலாளிகள் வீட்டு மனைகளை போட்டு விற்கின்றார்களே அவர்கள் தெற்கு நோக்கிதானே வரவேண்டும் ?
அந்த அவல நிலையை உண்டாக்கியதுதான் காரணம் வீட்டின் பால்கனியில் இருந்து பிணம் எரிக்கப்படுவதை பார்க்கின்றனர். இதனால் இன்றைய மக்கள் நிம்மதி இழந்து வாழ்கிறார்கள். தெற்கு தேய்கிறது, வடக்கு வாழ்கிறது என்று நமது முன்னோர் சொல்லி வைத்தார்கள்.
 
ஐயா இந்த வசனம் அறிஞர் அண்ணா அவர்கள் சொன்னதுதானே ?
நீ என்னிடம் அரசியல் பேசி, எமக்கும் பிரதமருக்கும் பிரிவினையை உருவாக்க முயல்கிறாய்.
 
ஐயா நான் தங்களிடம் பேட்டி எடுக்கத்தான் வந்தேன்
பேட்டி எடுக்க வந்தாயா ? இல்லை தோ.மு.மை. கட்சியிடம் பெட்டி வாங்கி கொண்டு வந்தாயா ?
 
அப்படியானால் தங்களுக்கும், தோ.மு.மை-க்கும் தொடர்பு இருக்கிறதா ?
தம்பி தொடக்கம் முதலே சிண்டு முடியும் வேலை செய்கிறாய் நீ வாழவேண்டிய வயது நினைவு வைத்துக்கொள்.
 
ஐயா சமூகத்தை கட்டுக்கோப்பாக வைத்துக் கொள்வதாக சொல்லப்படும் தாங்கள் இப்படி பகிரங்கமாக கொலை மிரட்டல் விடுவது போல் பேசலாமா ?
தேளோட கொடுக்கிடம் விரலைக் கொண்டு போனால் கொட்டும்னு சொல்றேன் அது உனக்கு புரியலை.
 
இதுகூட தெரியாமலா நான் வளர்ந்துட்டேன்.
என்னோட அனுபவம்தான் உன்னோட வயசு.
 
ஐயா சமூக நலனை வேண்டி உங்களிடம் பயனுள்ள தகவல்களை தெரிஞ்சு எங்களோட காத்தாடி பத்திரிக்கையில வெளியிடுவதற்காகத்தான் நான் வந்து இருக்கேன். ஆனா நீங்க....
உன்னோட முதலாளி ஆத்தாடினு அலறப் போற சகுனம் உன்னால வந்துடுச்சு... போய் உங்க ஆசிரியர் காத்தமுத்துவிடம் சொல்லு காத்தாடி காத்தாடப் போகுதுனு உன்னோட பெயரென்ன ?
 
என் பெயர் காத்தவராயன், ஐயா கடைசியா ஒரு....
இதுவே கடைசி எழுந்து போகலாம்.
 
சொன்ன வடக்கு நேசன் எழுந்து கோபக்கனலோடு மடாலயத்தின் கிழக்கு திசையை நோக்கி நடந்தார், நிருபர் காத்தவராயன், ஒளிப்பதிவாளர் ஒண்டிப்புலி, உதவியாளர் உதயகுமாரோடு ஸ்டுடியோவுக்கு புறப்படத்தயாரானான்.
 
கில்லர்ஜி அபுதாபி
 
சிவாதாமஸ்அலி-
இடத்தோட பேரே அரவங்காடு அதனாலதான் அரைவேக்காடு மாதிரி பேசுறாங்கே...
 
சாம்பசிவம்-
காத்தவராயன் நட்டுவாக்கலி நாக்குலயே தேன் தடவுவான் போலயே...
 
Chivas Regal சிவசம்போ-
இந்த மடாலயத்துல ரமா யாருனு தெரியலையே... யாருட்டயாவது விசாரிக்கணுமே...