இரும்புக்குதிரை

இந்தப் புகைப்படத்தை காணும்போது எனக்கு ஒரு மார்க்க கதை ஞாபகம் வருகிறது அதை எனது பாணியில் சிறிது சொதப்பி தருகிறேன்....

ஒருவர் தன்மகனை அழைத்துக் கொண்டு இந்த சமூகம் எப்படியென காட்டுகிறேன் வா என ஒரு குதிரையில் ஏறிக்கொண்டு தன்மகனை தன்னுடன் நடந்துவா, என்று வீதியில் போய்க்கொண்டு இருந்தார் வழியில் ஜவான் டீக்கடையில் நான்கு பேர் உட்கார்ந்து பேசிக்கொண்டு இருந்தார்கள் இவர்களைக் கண்டதும் இவர்கள் காதுபட ஒருவன் சொன்னான் பார்த்தாயா ? சின்னப் பயலை நடக்கவிட்டு இந்த எருமை மாடு குதிரையில் போகுது...

மறுநாள் இவர் மகனை குதிரையில் ஏற்றிவிட்டு தான் நடந்து அதே டீக்கடை வழியாக போனார், அந்த நான்கு பேரும் பேசிக் கொண்டிருந்தார்கள் அதிலொருவன் சொன்னான், பார்த்தாயா ? வயசான அப்பனை நடக்க விட்டு இந்த எருமை மாடு குதிரையில போகுது...

மறுநாள் மகனை குதிரையில் ஏற்றி விட்டு தானும் ஏறிக்கொண்டார் அதே டீக்கடை வழியாக போனார், அந்த நான்கு பேரும் பேசிக் கொண்டிருந்தார்கள் அதிலொருவன் சொன்னான், பார்த்தாயா ? பாவம் அந்தக் குதிரை, இந்த ரெண்டு எருமை மாடும் ஏறிக்கிட்டு போகுது...

மறுநாள் மகனை அழைத்துக் கொண்டு தானும் நடந்து கொண்டே குதிரையை ஒட்டிக்கொண்டு அதே டீக்கடை வழியாக போனார், அந்த நான்கு பேரும் பேசிக் கொண்டிருந்தார்கள் அதிலொருவன் சொன்னான், பார்த்தாயா ? கிறுக்குப்பயல்க குதிரை வாங்கிட்டு நடந்து போறாங்கே...

வீட்டுக்கு வந்தவுடன் குதிரையை விற்று விட்டார், மறுநாள் மகனை அழைத்துக் கொண்டு அதே டீக்கடை வழியாக நடந்து போனார், அந்த நான்கு பேரும் பேசிக் கொண்டிருந்தார்கள் அதிலொருவன் கேட்டான்...

குதிரை எங்கேப்பா ?

குதிரையை விற்று விட்டேன்

ஏன் ?

இல்லே ஒவ்வொரு, ஆளும் ஒவ்வொரு மாதிரி பேசுறாங்க அதான் வித்துட்டேன்

ஊருனா நாலுபேரு நாலு விதமா பேசத்தான் செய்வான் அதுக்காக வித்துடுறதா ?

வீட்டுக்கு வந்தவுடன் மகனிடம் சொன்னார் பார்த்தாயா ? இதுதான் சமூகம் நாம என்ன செய்தாலும் குறை சொல்லிக் கொண்டே இருக்கும் அதனால உன் மனசாட்சிக்கு எது நியாயமாகபடுதோ ! அதை செய்துட்டு போ அதே நேரம் நீ நினைப்பது நியாயமாக இருக்கட்டும்.

 

எதைச் செய்தாலும், குறை கண்டு, கில்லர்ஜி போன்றவர்கள் சொல்வதை நம்பும் இதயமில்லா குருட்டுச் சமூகமே... என்னை குதிரையாக்கி உங்களை சவாரி செய்யச் சொன்னேன், எனக்கு இதயம் உண்டு நானும் உண்டு வாழ்வதற்கு கொள்ளு வேண்டாமா ? என்னை இரும்புக் குதிரை என நினைத்தீரோ ஓ.... பாமர சமூகமே.... உன் வாழ்வின் இருளை நீக்கி ஒளியேற்றிட வேண்டி என் SUNமுகத்தை காட்டிட நினைக்கும் என்னை என்றுதான் நீ புரிந்து கொள்வாயோ !

-இளைஞர் கருணாகரன்

காணொளி
நட்பூக்களே... வணக்கம் தேர்தல் வருவதால் வலைப்பூ நண்பர்களுக்கு ஆக்கப்பூர்வமான நல்ல சிந்தனைகளை கொடுப்போம் என்று சிந்தித்தால் அக்கபோரான சிந்தனைகளே வருகிறது ஆகவே அரசியலைப்பற்றி எழுதுவோமா ? வேண்டாமா ? என்று குழம்பிபோய் இருக்கின்றேன் காரணம் எனக்கு அரசியல் தெரியாது என்ன செய்யலாம் அரசியல் எழுதவா ? அல்லது வழக்கம் போலவே... எழுதவா ? சொல்லுங்கள் – கில்லர்ஜி