விழி கொடுத்து ஒளி ஏற்றுவோம்

வணக்கம் நட்பூக்களே...
மேலேயுள்ள புகைப்படத்தை படித்தீர்களா ? இந்தியாவின் இன்றைய மக்கள் தொகை 118 கோடி தினசரி இறப்பு விகிதம் 62389 தினசரி பிறப்பு விகிதம் 86853 இன்றைய நிலவரப்படி பார்வை இழந்தோர்கள் 682497 மரணம் அடைந்தவர்கள் அனைவருமே கண் தானம் செய்தால் ? ? ? அடுத்த பதினொன்று 11 தினங்களில் இந்தியாவில் ஒரு குருடர்கூட இருக்க மாட்டார்கள்.
 
இதை சாத்தியப்படுத்த முடியுமா ? முடியும் அதற்கு மிகப்பெரிய மனம் வேண்டும் இது எங்கு கிடைக்கும் ? எமனேஸ்வரத்திலா ? மனித மனம் மிகப்பெரிய பக்குவம் அடைய வேண்டும். தனது வீட்டு உறவுகளை விழியை எடுத்து விட்டு புதைத்தால் இரவில், கனவில் வீட்டுக்கு குருடர்களாக மீண்டும் வருவார்கள். என்ற குருட்டு நம்பிக்கை நம்மிடம் உள்ளது.
 
குருடர்களின் ஒருநாள் வாழ்க்கையை நீங்கள் ஒத்திகையாக வாழ்ந்து பாருங்கள். அதன் கஷ்டம் புரியும். அதுவும் இடையில் விழியை இழந்தவர்களின் மனநிலை சொல்லி மாளாது. திடீரென்று இயற்கை சீற்றத்தாலோ, அல்லது மனித மிருகங்களின் இழிவான செயலாலோ நாம் கோரமாக சிதறிச்சாகின்றோம். அப்பொழுது நம் உறுப்புகளின் நிலை என்ன ?
 
இறந்த பிறகு விழியை கொடுத்து மறைந்தால் இறந்தும் நாம் உலகை கண்டு கொண்டு இருப்போம், அந்த மனிதர்களின் மனங்களிலும் கடவுளாகவே வாழ்வோம். இப்படி இந்திய மக்கள் மட்டுமல்ல உலக மக்கள் அனைவருமே இந்த முடிவை எடுத்தால் பல மனிதர்களின் வாழ்வில் ஒளியேற்றி வைக்க முடியும். வாரிசு இல்லாத மனிதர்கள்கூட கொரோனாவின் கொடூரமான காலகட்டத்தில் தங்களது பெருஞ்செல்வத்தை பிறருக்கு கொடுக்காமல். இருந்தார்களே... இவர்களா விழிகளை கொடுப்பார்கள் ?
 
ஆனால் ஜெர்மன், இத்தாலி போன்ற நாடுகளில் மனிதர்கள் தங்களது பணத்தை (Euro) கோபத்துடன் தெருவில் வீசினார்கள் நகராட்சி ஊழியர்கள் தெருவை பெறுக்கி அள்ளினார்கள் என்பது வரலாறு. இவ்வளவு பேசும் உனக்கு தகுதி இருக்கிறதா ? என்றால் இருக்கிறது என்பதே எமது பதில் நான் இறந்த பிறகு விழிகளை கொடுப்பதற்கான அதிகார வாக்குறுதிகளை வாங்கி எழுதி வைத்து இருக்கிறேன். இரண்டு நண்பர்களில் ஒரு நண்பரது சாட்சி கையெழுத்துக்காக காத்திருக்கிறேன்.
 
மேலும் எனது உடலை மருத்துவக் கல்லூரிக்கு கொடுப்பதாக தீர்மானித்து இருக்கிறேன். இதன் மூலம் எனது இரத்த உறவுகளுக்கு இடையூறு செய்யாமல், கஷ்டத்தை கொடுக்காமல் நான் இறைவனடி சேர்தல் வேண்டும் என்பதும் எமது சுயநல ஆசையே. நான் ஆசைப்பட்டது எதுவுமே நிறைவேறாத வாழ்வில் இதனையாவது இறைவன் நடத்தி வைப்பார் என்று நான் ஆத்மார்த்தமாக நம்புகிறேன்.
 
கில்லர்ஜி அபுதாபி