திங்கள், ஜூன் 26, 2017

நூர் இஸ்லாமிய வங்கி

100-ஐ சுற்றி மூன்று வலம்,

இடம் தாயும், மகனும் வீட்டில்....
அம்மா நான் சினிமாவுக்கு போகணும், நூறுரூபா கொடு.
அப்படி என்ன சினிமா பார்க்கப் போறே கண்ணா ?
நூறாவது நாள்.
அந்த மாதிரி சினிமாவெல்லாம் பார்க்கக் கூடாது நீ கெட்டுப் போயிருவே நான் பணம் தரமாட்டேன்.
அப்படினா அவசர போலீஸ் நூறு சினிமாவுக்கு போறேன்.
ஆங்... உங்க அப்பா போலீஸ்ல வேலை பார்த்து கிழிச்சட்டுட்டாரு நீ வேற அவசர போலீஸாம் அதெல்லாம் பார்க்க கூடாது.
அப்படினா நாகேஷ் நடிச்ச நூற்றுக்கு நூறு சினிமாவுக்கு போறேன்.
முதல்ல நூற்றுக்கு நூறு மார்க் எடுத்துட்டு வா ! அப்புறமா நூறென்ன ? நூற்றெண்பது சினிமாவுக்கு நான் கூட்டிட்டுப் போறேன்.
அதுக்கு நான் இன்னும் நூறு மாசம் படிக்கணுமே.

இடம் பள்ளி வகுப்பறையில் ஆசிரியரும், மாணவனும்....
இன்னைக்கு நாம சோசியல் பாடம் நடத்தப் போறோம். எத்திராஜ் நீ எந்திரி உனக்கிட்ட ஒரு கேள்வி கேட்கப் போறேன் இதுக்கு நீ சரியான பதில் சொன்னால் உனக்கு நூறு மார்க் தருவேன் சரியா சொல்லலைனா, உன் தலையில நூறு கொட்டு தருவேன் இது ரெண்டுல நீ எதை விரும்புறே ?
இது ரெண்டையுமே நான் விரும்பலை ஸார்.
வேற எதை விரும்புறே ?
உங்ககிட்டருந்து ஒரு நூறு ரூபா செலவுக்கு வாங்குறதை விரும்புறேன் ஸார்.
நான் ஏன் உனக்கு பணம் கொடுக்கணும் ?
ஏன் ஸார் கோபப்படுறீங்க ? நூறு ரூபா கூடஇல்லாம எதுக்கு ஸார் வாத்தியார் வேலைக்கு வர்றீங்க ?
உட்கார்டா நீ பதிலே சொல்ல வேண்டாம்.

Place – Noor Islamic Bank Coimbatore
வணக்கம் ஸார்.
வாங்க வணக்கம் என்ன விசயம் ?
எனக்கு உங்க பேங்க்ல லோன் வேணும்
உட்காருங்க உங்க பேர் ?
நூர் முஹம்மது.
எங்கே வேலை செய்றீங்க ?
நூரா ஹாஸ்பிட்டல்ல,
கல்யாணம் ஆயிடுச்சா ?
ஆயிடுச்சு ஸார்.
மனைவி பேர் என்ன ?
நூர்ஜஹான்.
கல்யாணம் ஆகி எவ்வளவு காலமாச்சு ?
இன்னையோட நூறு நாள்தான் ஆகுது ஸார்.
சொந்த ஊரு இதுதானா ?
ஆமா ஸார்.
சொந்த வீடு இருக்கா ?
இருக்கு ஸார்.
வீடு யாரு... பேருல இருக்கு ?
எங்க வாப்பா, நூருல்அமீன் பேருல இருக்கு ஸார்.
வீட்ல எத்தனை பேருக்கு பங்கு இருக்கு ?
எனக்கும், எங்க அண்ணன் நூருல்ஹக் ரெண்டு பேருக்கு மட்டும் ஸார்.
புது வீடா ?
பழைய வீடுதான் கட்டி நூறு வருசம் இருக்கும் ஸார்.
வீடு எங்கே இருக்கு ?
நூறடி ரோட்ல.
எத்தனை செண்டு இருக்கும் ?
பெரிய வீடு பின்னால காலி இடத்தையும் சேர்த்தா நூறு செண்ட் இருக்கும் ஸார்.
எவ்வளவு லோன் எதிர் பார்க்கிறீங்க ?
ஒரு நூறு கோடி ரூபாய்.
எவ்வளவு நாள்ல கட்டி முடிக்கலாம் ?
ஒரு நூறு வருசத்துல கட்டிடலாம் ஸார்.
எந்திரிய்யா இந்த ஏரியாவ விட்டு நூறு கிலோ மீட்டருக்கு அந்தப் பக்கம் போய் நிற்கணும் ஓடுயா...

இஸ்லாமிய நட்பூக்களுக்கு இனிய ரமதான் வாழ்த்துகள்.
video
காணொளி

வெள்ளி, ஜூன் 23, 2017

மேலே வானம் கீழே பூமிகா

1991 - ///லாலாக்கு டோல் டப்பிம்மா கண்ணே கங்கம்மா... உன் இடுப்பசுத்தி திருப்பி பாரம்மா எண்ணை இல்லாம விளக்கு எரியுமா கண்ணே கங்கம்மா மரம் இழுக்கிற கையெப்பாரம்மா ஏ... அடக் படக் சடக்/// இதை கவிதை என்று இந்த சமூகம் ஏற்றுக் கொள்ளும்போது நாமேன் கவிதை எழுதக்கூடாது ? என்று எனக்கு தோன்றியது அதன் விளைவாய் என் மனதில் உதித்த 1991 ஆண்டின் எனது கவிதைகளில் முதல் கவிதை.


இக் கவிதையின் கரு..

தற்காலம் ஈருடலாயினும் பிற்காலம் ஓருடலாவோமென கருதியிருந்த கன்னியின் மரணத்தால் வேருடல் வடித்த சிவப்பு கண்ணீர் அஞ்சலி....



பூமாஞ்சலி

பூத்திருந்த பூந்தளிரே...
காத்திருந்தாய் கனியதற்கு,

தேன் கொட்டும் நேரத்திலே...
தேள் கொட்டி விட்டதென,

தேர் ஏறி போனவளே...
ஊர் தேடிவந்து விட்டாய்,

கொஞ்சுகின்றாய்... கொஞ்சுகின்றாய்...
துயில் கொள்ளும் எனைக்கண்டு

அஞ்சுகின்றேன்... அஞ்சுகின்றேன்...
அஞ்சுகமே உனைக்கண்டு

தறிகெட்டு ஓடினாலும்-கழுத்து
நெறிபட்டு விடுவேனோ

விழி பிதுங்கி விடும் முன்னே...
வழி தேடி வாரேன் பின்னே...

சாம்பசிவம்-
அந்த வேருடல் தனிமையில் இந்தக் கவிதையை ரேவதி ராகத்தில் பாடும்போது நான் கேட்டிருக்கிறேன்.

video
காணொளி

புதன், ஜூன் 21, 2017

தமிழ்க் கலாச்சாரம்

துபாய் இந்தியன் ஸ்கூல் இசை நிகழ்ச்சி விழா.

எனது குடும்ப நண்பர் + மருத்துவர் இவர்களுடன் போயிருந்தேன் காணொளி யாருமே எடுக்ககூடாது அனைவரும் ஜெயா தொலைக்காட்சியில்தான் பார்க்க வேண்டுமென திட்டவட்டமாக அறிவித்து இருந்ததால் ? சுற்றி வளைத்து சுமார் 2 ½  மணிநேரம் எமது கேமராவால் எடுத்து மறுநாளே நண்பருக்கு சி.டி போட்டுக் கொடுத்து விட்டேன் அன்று நடந்த கூத்துகளைத்தான் இன்று விவரிக்கப் போகிறேன் அதன் ஒரு காட்சியைத்தான் கீழே இணைத்து இருக்கிறேன் காரணம் அந்தக் காட்சியை வைத்துதானே இந்தப்பதிவு.

பாவாடை தாவணி போட்டருந்தபோது பெண்களிடம் ஒரு நல்ல பழக்கம் தொற்றி வளர்ந்து கொண்டே வந்தது இது அவர்கள் கிழவியாகி சுடுகாடு செல்லும்வரை தொடர்ந்தது இதைப்பற்றி நான் விரிவாக எழுத வேண்டிய அவசியமில்லை சுடிதாருக்கு மாறிய பெண்கள் ‘’சால்’’ என்றொரு துண்டை பழங்கால பெரிசுகள் தோளில் போடுவதுபோல இவர்களும் போட்டுக்கொண்டு போகிறார்கள் பெரும்பாலும் முதுகுப்புறமே இது கிடக்கின்றது அது இல்லாமலும்கூட போகலாம் என்ற நிலையும் ஆகி விட்டது இது நாகரீகத்தின் வளர்ச்சியா ? வீழ்ச்சியா ? (இதனைக் குறித்து விரிவான பதிவு பிறகு எழுதுவேன்) உதாரணமாக பாவாடை தாவணி அணிந்த பெண்களின் மேலாடையை நாம் பொது இடத்தில் எடுத்து விடமுடியுமா ? எடுத்தவனின் நிலையை நினைத்துப் பாருங்கள் உடனடியாக அந்த இடத்தில் தர்மப்பிரபுக்கள் முளைத்து விடுவார்கள் இன்று சுடிதார் போடுவதால் அந்த சால் எடுத்தும் விளையாடலாம் என்பதை பல திரைப்படங்களிலும் காட்டி விட்டார்கள் அதே கூத்துதான் இங்கும் அரங்கேறி இருக்கிறது மொத்தமும் தமிழ்க் குடும்பங்கள்தான் அந்தக் கூட்டத்தில் நானும் உட்கார்ந்திருந்து இந்த காட்சிகளை சுட்டேன் திடீரென ஆடிக்கொண்டு இருந்தவன் அடுத்த வரிசையில் உட்கார்ந்திருந்த பெண்ணின் சால்’’லை எடுத்து வந்து தனது தலையில் போட்டுக் கொண்டு ஆடுகிறார் முடிந்ததும் கொண்டு போய் கொடுத்து விடுகிறார் இந்தக் கூட்டத்தினர் அனைவருமே தமிழர்கள் என்பதை நான் தங்களுக்கு சொல்ல வேண்டிய அவசியமில்லை என்று நினைக்கிறேன் பாருங்களேன்.

சேலை கட்டும் பெண்ணுக்கொரு வாசம் உண்டு
கண்டதுண்டா... கண்டவர்கள் சொன்னதுண்டா...

ஒரு சினிமாக்கவிஞர் கூட இப்படி எழுதினார் ஆம் முந்தானை விரித்தாள் என்கிறோம் இதன் அர்த்தமென்ன ? அந்த சேலையின் வாசம் அவனது கணவன் மட்டுமே நுகரவேண்டும் இதுவும் சேலைதானே இங்கு நுகர்ந்தவன் யாரோ ? எவரோ ? தமிழ்க் கலாச்சாரம் என்பது பழங்காலம் தொட்டு வளர்ந்தது அவை இன்றும் அயல் நாடுகளில் மதிப்புடன் பேசப்படுகிறது ஆனால் போற்றிப்பாதுகாக்க வேண்டிய நாமோ இப்படி வாழப்பழகி விட்டோம்.

மேலும் மகளுடன் குத்தாட்டம் அந்த மகள் எதிர் காலத்தில் எந்தவிதமான வாழ்க்கையை தேர்ந்தெடுப்பாள் ? பொது இடத்தில் இப்படி அடுத்தவன் மனைவியின் சால்’’லை உருவி ஆடுவது தவறென்று எடுத்தவனுக்கும் தெரியவில்லை, எடுக்க விட்டவளுக்கும் தவறென்று தெரியவில்லை, ஏன் ? இதை விட்டு விட்டவனுக்கும் தவறென தெரியவில்லை எந்த தொடர்பும் இல்லாமல் காட்சியாளராக வந்திருந்த எனக்கு மட்டும் ஏன் ரத்தம் கொதிக்கின்றது ? மெத்தப் படித்தவர்களிடம் கேட்டால் லைப்பில் என்ஜாய்மெண்ட் வேண்டும் என்பார்கள் சந்தோஷம் வேண்டும்தான் அதற்காக பொதுக்கலாச்சாரத்தை சீர்குழைத்து பொது இடத்தில் உனக்கென்ன சந்தோஷம் ? வேண்டுமானால் வீட்டுக்குள் வைத்து யாரும் யாருடனும் ஆடட்டும் வைர ஊசி என்பதால் வயிற்றில் குத்திக்கொள்ள முடியுமா ? இதில் ஆடுவதை நான் படமெடுக்கின்றேன் என்பதை அறிந்தும் ஆடுவதுதான் வேதனையிலும் வேதனை. அடுத்தவன் பொண்டாட்டி ஆடுவதை படமெடுப்பது குற்றமில்லையா ? எனக்கேட்கலாம் இல்லை என்பதே எமது பதில் காரணம் பொது இடத்தில்தான் எடுத்தேன் அவர்களின் சொந்த வீட்டினுள் நுழைந்து ஆடும்போது அல்ல !

புதுமைப் பெண்களடி பூமிக்கு கண்களடி
பாரதி சொன்னானே தமிழ்ப் பாரதி சொன்னானே
செல்லம்மா அக்கா புருஷன் சொன்னது இதற்காகவா ?

இப்பதிவுக்கும், இசைக்கடவுள் பதிவுக்கும் தார்ரோடு போட்டு இணைப்பு ஏற்படுத்திய நண்பர் திரு. ஸ்ரீராம் ஜி மற்றும் நண்பர் திரு. வே. நடனசபாபதி அவர்களுக்கு நன்றி.

video
காணொளி

திங்கள், ஜூன் 19, 2017

என் நினைவுக்கூண்டு (3)


இதன் பின்னணிகளை அறிவதற்கு கீழே சொடுக்கலாம்...


தவறு செய்து விட்டேன் உன்னை இங்கு கொண்டு வந்தது என் தவறு வனிதா உனது உயிர் பிரிந்த நேரம் நள்ளிரவு 2:30 am

அவர்களிடம் போராடி அதிகாலையில் உன்னை ஸ்டெச்சரில் வைத்து கொண்டு வந்த காட்சி இருக்கின்றதே... இன்னும் எனது விழிகளை விட்டு நீங்கவில்லை. வீட்டில் வளர்த்த நாய்களைக்கூட சற்று மரியாதையாக நடத்துவார்கள். உன்னை மட்டுமல்ல சுமார் இருபது நபர்களாவது இருக்கும் நேற்று இரவு முழுவதும் எங்களுடன் காத்துக்கிடந்த கூட்டம் உயிருடன் அனுப்பிய உறவுகளை உடல்களாக பெறுவதற்குத்தானா ? பிணக்கிடங்கு அருகில் காத்துக்கிடந்தோம் உன்னை கோவையில் அடக்கம் செய்ய எனக்கு விருப்பமில்லை இங்கு யார் இருக்கிறார்கள் ? நீ பிறந்து, வாழ்ந்த தேவகோட்டை மண்ணுக்கே உன்னை கொண்டு செல்ல விருப்பம் மேலும் அந்த வீட்டில் உன்னை கொண்டு சென்று ஒரு இரவாவது உறங்க வைக்க(?)வேண்டும் என்பது எனது அவா. காரணம் நாளை நானும் எங்கு இறப்பினும் தேவகோட்டையில்தான் அடங்குவேன்.

நீ சற்றே நேரத்தில் சிறிய குழந்தைபோல சுறுங்கி விட்டாயே உயிர் பிரிந்து விட்டால் இப்படித்தானா ? அல்லது நான் நெருக்கத்தின் காரணமாய் முதன்முதலாக காண்பதால் எனக்கு இப்படி தோன்றுகிறதா ? உன்னை வெள்ளைத்துணியில் சுருட்டி தருவதற்கு இவ்வளவு பணமா ? எந்த இடத்தில் இப்படியெல்லாம் கேட்பது என்ற வரைமுறை கிடையாதா ? தினம் பிணமும், அழுகையும், மரணஓலமும் கேட்பவர்களுக்கு மனிதநேயம் இருக்குமா ?

நண்பர் திரு. நெல்லைத்தமிழன் அவர்கள் சொல்வதுபோல். //இவர்களுக்கு எத்தனையோ உயிர்களில் ஒன்று நமக்குத்தான் நீ ஒன்றே ஒன்று// இது உண்மைதான். உடன் கிளம்ப மருத்துவமனை ஆம்புலன்ஸ் தரவில்லை இலவசமாம் ஓட்டுனருக்கு பணம் கொடுக்ககூடாதாம் எழுதிப்போட்டு இருக்கின்றார்கள் அவர் கேட்பது ஆம்புலன்ஸின் வாடகையை அப்படியே கேட்பார் போலயே... தனியாக ஆம்புலன்ஸ் வேண்டுமெனில் பத்துமணி ஆகும் உடன் கிளம்ப வேண்டுமெனில் போகும் வழியில் பொள்ளாச்சி அருகே ஒருவரை இறக்கி விட்டு பிறகு அப்படியே போகலாம் என்பதை பெரிதாக கருதாமல் ஏற்று முன்புறம் ஓட்டுனருடன் சகோதரரும், அம்மாவும் இருக்க பின்புறம் உன்னுடன் நான் ப்ரீஜருக்குள் நீ பின்புற சக்கரத்தின் தூக்கலான சற்றே சறுக்கலான இடத்தில் நான் உட்காரக்கூட இடமில்லாமல் தேவகோட்டை புறப்பாடு நேரம் காலை ஐந்துமணி பொள்ளாச்சியோரம் ஏதேதோ கரடுமுரடான பாதையில் பயணம் மொத்தமும் குலுக்கல் திடீரென ஒரு இடத்தில் குலுங்கியதில் எனது மடியில் வந்து விழுந்தது ஒரு முகம் அதுவும் கோரமான மிகவும் மோசமான வாடையுடன் நெடுநாட்களாக ஐஸியூவில் கிடந்தவரின் பிரேதம் அந்த அரையிருட்டில் பார்த்ததும் ஒரு கணம் திகிலடித்து உறைந்தே விட்டேன்.

சட்டென சுதாரித்து சடச்சடவென்று சைடில் தட்டி ஓட்டுனரிடம் சொன்னேன் வண்டியை நிறுத்துங்க.... ஏன் ? இங்கே... இங்கே ஏதோ பாடி கெடக்குங்க... அப்படியே தள்ளி விட்டு உட்காருங்க... வண்டி நிற்காமல் தொடர்ந்து குலுக்கலோடு போய்க்கொண்டே இருந்தது... வாடை தாங்க முடியவில்லை ஸ்டெர்ச்சரை விட்டு தலை கீழே விழுந்த பாடியை தலையை அழுத்தி தள்ளினேன் குலுக்கலில் தலை சடக்கென்று ஒடிந்ததுபோல் உணர்ந்தேன் இருப்பினும் அழுத்தி தள்ளினேன் பிறகுதான் அந்த அரையிருட்டில் கவனித்தேன் அதனுள் இன்னொரு பாடியும் ஒரு துணியை போட்டுகூட மூடாமல் ஏதோ கலவரத்தில் இறந்து கிடந்த சடலம்போல எனது பக்கத்தில் இருந்ததை வாழ்வில் அந்த நொடி என்னை எதிரியாக நினைப்பவர்களுக்கும் வரக்கூடாது வனிதா உனக்காக நான் எவ்வளவோ பணம் செலவு செய்து இருக்கலாம் அதெல்லாம் ஒரு விடயமே இல்லை ஆனால் இந்த நொடியில் உனக்காக நான் பட்டகஷ்டம் இருக்கின்றதே.... ஆம்புலன்ஸின் முன்புறம் ஒரு கார் வழி நடத்தி சென்று கொண்டு இருந்தது இந்த சடலத்தின் உடமைக்குறியவர்கள் என்று அறிந்தேன். பிறகு கையை பார்த்தால் பிசுபிசுவென்று ஏதோ பசை போலிருந்தது துடைப்பதற்கு வழியில்லாமல் அந்த கிராமம் வரும்வரை பொறுமையாக இருந்தேன் அதன் பிறகு அக்குக்கிராமம் செல்லும் பொழுது விடிந்து விட்டது உடன் சட்டென கீழே இறங்கி மண்வெளியில் கையை தேய்த்து விட்டு கை கழுவுவதற்கு கிராம மக்களிடம் தண்ணீர் கேட்டால் யாரும் கொடுக்கும் நிலையில் இல்லை அப்பொழுதுதான் அந்த சடலத்தின் முகத்தை கவனித்தேன் இத்தனை கோரமான முகமா ? இந்த முகம்தான் அதிகாலை நம் மடியில் விழுந்ததா ?

வனிதா நல்ல மனதுடன் வாழ்ந்து இறந்தவர்கள் தெய்வமாகி விடுவார்கள் என்று கேள்விப்பட்டு இருக்கிறேன் அப்படியென்றால் யாருக்குமே தீங்கு நினைக்காத நீ நிச்சயமாக தெய்வமாகி இருப்பாய் என்று நம்புகிறேன் ஆகவே எனது சந்ததிகளுக்கு துணையாய் இருப்பாய் என்றும் நம்புகிறேன். மதியம் மதுரை இராஜாஜி மருத்துவமனை வந்தது ஆம்புலன்ஸ் அங்கு மற்றொரு ஆம்புலன்ஸில் உன்னை மாற்றும் பொழுது எனது விழிகளில் நீர் வற்றி விட்டது. மாலை நான்கு மணியளவில் தேவகோட்டை நமது வீட்டுக்கு நீ வாழ்ந்த வீட்டில் உன்னை கொண்டு வந்து இரவு முழுவதும் உறங்க வைத்ததில் அந்நிலையிலும் எனது மனதில் சிறிய நிறைவு ஏற்பட்டது.

கூண்டுகள் சுழலும்...

வெள்ளி, ஜூன் 16, 2017

இசைக்கடவுள்


அபுதாபியிலிருக்கும் பொழுது ஒருமுறை DUBAI SCHOOL ஒன்றில் நடந்த இசை நிகழ்ச்சிக்கு போயிருந்தேன் பொதுவாகவே எனக்கு எழுத்தாளர்கள், கவிஞர்கள், பேச்சாளர்கள், இசைக் கலைஞர்களிடம் ஒருவித ஈர்ப்புணர்வு உண்டு, காரணம் சராசரி மனிதர்களைவிட அவர்களிடம் ஒரு கூடுதலான விசயத்தை இறைவன் அவர்களுக்கு அளித்துள்ளார் என்பது எனது கருத்து அந்த STADIUM மில் சுமார் 2000 பேர் அமர்ந்திருப்பார்கள், அந்தப் பாடகர் மேடைக்கு வரும்போது சாதாரண பாடகி ஒருவர் இப்படிச் சொன்னார்,

//இசைக்கடவுள் மேடைக்கு வருகிறார் அவருக்கு நாம் அனைவரும் எழுந்து நின்று மரியாதை கொடுத்து வரவேற்போம்.//


என்று உடனே அமர்ந்திருந்த அனைவருமே எழுந்து பலத்த கை தட்டலுடன் கரகோஷமாய் வரவேற்றார்கள் இதில் ஒரேயொரு ஜீவராசி மட்டும் எழவில்லை காரணம் கோபம் கோபத்திற்கு முக்கிய காரணம் சிறிய பாடகர்கள் காலைத்தொட்டு வணங்க வரும்பொழுது சோபாவில் அமர்ந்திருந்தபடி ஷூக்காலை தூக்கி கொடுத்ததை திரையில் கண்டதால் ஜீவராசியின்  ரத்தம் கொதித்தது தமிழனுக்கு இது தேவையா... ? ஆனால் அந்த ஜீவராசி சிறிய அளவில் கை மட்டும் தட்டியது பக்கத்தில் அமர்ந்திருந்த ஒரு அறுபது வயது மதிக்கத்தக்க பெரியவர் அந்த ஜீவராசியிடம் கேட்டார்.

நீ ஏன் எந்திரிக்கவில்லை ?
நான் ஏன் எந்திரிக்கவேண்டும் ?
எவ்வளவு பெரிய பாடகர் அவருக்கு மரியாதை கொடுக்க வேண்டாமா ?
ஐயா உங்க வயசு என்ன... நீங்க போயி எந்திரிச்சு மரியாதை கொடுத்தது என்னைப் பொருத்தவரை தவறு.
அது எப்படி தவறாகும் ? இவரு எவ்வளவு பெரிய திறமைசாலி எவ்வளவு பாட்டு பாடியிருக்கார் அந்த திறமைக்கு மரியாதை கொடுத்துதான் ஆகணும்.
அவரு என்ன சும்மா பாடுனாரா ? இல்லை இப்பகூட பணத்துக்காகத்தானே பாடுறாரு,
எல்லோருமே பணத்துக்காகத்தானே... வேலை செய்றோம்.
அந்தப் பெண் ஏன் அவரை கடவுள்னு சொன்னது ? இவர் மூலம் தனக்கு சினிமாவில் சந்தர்ப்பம் கிடைக்கும்னுதானே.
என்ன சாதாரணமா சொல்லிட்டே ? இந்தியா முழுக்க இவரை தெரியாதவங்க கிடையாது.
சினிமாவுல பாடும்போது தெரிஞ்சுதான் ஆகும் அது நீங்களா இருந்தாலும் சரி, எனது பேரனாக இருந்தாலும் சரி. 
இவரைப்போல... திறமையாக யாராவது பாட முடியுமா ?
திறமைங்கிறது வேற... சுயநலத்துக்காக மனுசனை கடவுள்னு சொல்றதை எப்படி ஏற்க முடியும் ?
கடவுள்னு சொல்றது தவறுதான் சரி கச்சேரி முடிஞ்சதும் நாம விவாதத்தை வச்சுக்கிருவோமா
சரி.
ஐந்துமணி நேரத்திற்கு பிறகு SCHOOL -ன் வெளியே...
சொல்லு இவரைப்போல எல்லாரும் பாடமுடியுமா
ஐயா உங்க பாணியிலேயே கேட்கிறேன் ஐயா T.M.சௌந்தரராஜன் பாடுனாரே //முத்தை தரு பத்தித் திருநகை// இந்த பாடலை உச்சரிப்பு மாறாமல் எவனாவது இப்போது பாடமுடியுமா ? இவனையெல்லாம் கடவுள்னு சொன்னா T.M.Sசை என்னானு சொல்வீங்க ? அதற்காக T.M.Sசை கடவுள்னு நான் சொல்லவில்லை அவரும் நம்மைப்போல மனிதர்தான்.
இருந்தாலும் உனக்கு ரசனை இல்லாத மாதிரி பேசுறியே.. பின்னே எதற்கு செலவு செய்து பார்க்க வரணும் ?
ஐயா இதே விழாவுக்கு ஒரு நடிகரோ, நடிகையோ வந்திருந்தால் நான் நிச்சயம் வந்துருக்க மாட்டேன் உங்களைவிட ரசனையாளன் நான் ரசிக்கத் தெரிந்தவன் தான் மனிதன், ஆனால் நாம அடிமையாகி விடக்கூடாது சுயசிந்தனை அடகு போககூடாது இதுதான் எனது கொள்கை.
ஏதோ தெரியலை உனது பேச்சு எனக்கு பிடிச்சுருக்கு இப்ப நேரமில்லை நான் உன்னிடம் நிறைய பேசவேண்டி இருக்கிறது உனது நம்பர் கொடு.
நம்பர்கள் பறிமாறப்பட்டு, அடுத்தநாள் முதல் தொலைபேசியில், வாதங்களும் தொடங்கப்பட்டு, ஜீவராசி துபாய் போனாலும் ஐயா அபுதாபி வந்தாலும் நேரிலும் வாதங்கள் வார்க்கப்பட்டு, பல வருடங்களாக தொடரப்பட்டு, முடிவில் ஒருநாள்.... (அவர் இறப்பதற்கு ஒருவாரம் முன்பு)
உன்னை நான் முழுசா புரிஞ்சுக்கிட்டேன் நீ ஜெயிச்சுட்டே வெற்றி உனக்குத்தான்டா.
இல்லை ஐயா இது வெற்றினா இந்த வெற்றியை, உங்க காலடியில போடுறேன் மிதிச்சுடுங்க இத்தனை வருஷத்துல உங்கள்ட்டருந்து நிறைய படிச்சுருக்கேன் அதற்கு நான்தான் உங்களுக்கு நன்றி சொல்லணும், குறிப்பா மனுசனை கடவுள்னு சொன்ன அந்த பெண்மணிக்கும். 

அந்த ஐயா– Jadagopan Ayer Internet City Dubai. (Hometown, Thiruvannamalai)
அந்த ஜீவராசி– Killergee Pension Authority Abu Dhabi. (Hometown, Devakottai)

video
 காணொளி
Related Posts Plugin for WordPress, Blogger...