தண்ணீரிலே உன் செருப்பு

1986 தேவகோட்டையில் ஒருநாள் நானும், எனது மாப்பிள்ளையும் (தூரத்து சொந்தம்தான்) அவனுக்கு செருப்பு வாங்கப் போனோம் அந்த நேரம் வால்க்கர் என்ற செருப்பு மிகவும் பிரபலம் கல்யாண மாப்பிள்ளைகள் எல்லாம் அதைத்தான் வாங்குவார்கள் செருப்பும் அழகாகவே இருக்கும் என்பது தங்களில் பலரும் அறிந்த விடயமே அதை வாங்கவும் பழைய செருப்பை அந்த இடத்திலேயே கழட்டிப்போட்டு விட்டு புதியதை மாட்டிக்கொண்டு வந்தான் பாதயாத்திரைதான் வீட்டுக்கு வரும் வழியிலேயே மழை வந்து விட்டது.

ஒரு வீட்டோரமாய் ஒதுங்கினோம் சிறிது நேரத்தில் பலத்த மழை பிடிக்க செருப்பு முற்றிலும் நனைந்து விட்டது மேலும் ஒதுங்கி போக முடியவில்லை அவனை செருப்பைக் கையில் எடுத்துக்கொள் என்றேன் முடியாது என்றான் காரணம் எனக்கு பிறகே புரிந்தது எனக்கு அவனைப் பார்க்கும்போது சிப்பு சிப்பா வந்து தாங்க முடியலை சிறிது நேரத்தில் தண்ணீர் பெருக்கெடுத்து ஓட செருப்பு தண்ணீருக்குள் எனக்கு பாட்டு பாடவேண்டும்போல் இருந்தது அந்த நேரம் மைதிலி என்னை காதலி வெளியான தருணம் அதில் வரும் பாடலான தண்ணீரிலே மீன் அழுதால் கண்ணீரைத்தான் யார் அறிவார் என்ற பாடல் மிகவும் பிரபலமாகிக் கொண்டு இருந்தது அதே மெட்டில்....

 தண்ணீரிலே உன் செருப்பு

நனைந்து விட்டால் யார் பொருப்பு

உன் செருப்பு அதன் நிறம் கருப்பு

மாப்ளே.... மாப்ளே... மாப்ளே...

என்று நான் பாட அவன் எனக்கு பின்னால் பார்த்துக் கொண்டு சிரிக்க மேலும் விழுந்து விழுந்து சிரிக்க நான் குழம்பி திரும்பி நோக்க... அப்புறத்தில் ஒரு பெண்ணும், இவனைப் பார்த்து சிரித்துக் கொண்டு நிற்க எனக்கு வெட்கமாகிப் போனது நான் அசடு வழிய இருவரும் மேலும், மேலும் சிரித்தார்கள் ‘’ச்சே’’ இவங்களுக்கு இன்றைக்கு நான் ஊறுகாயாகி விட்டேனே....

காலங்கள் உருண்டோட காட்சிகளும் மாறியது  சுமார் ஒரு வருடம் கழித்து மாப்பிள்ளை தனக்கு திருமணம் என பத்திரிக்கை வைத்தான் பெண்ணும் உள்ளூர்தான் என்றான் பரிசுப்பொருளுடன் போனேன். மணப்பெண்ணைப் பார்த்ததும் எனக்குள் மனக்குழப்பம் எங்கோ... பார்த்து இருக்கின்றோமே... மணப்பெண்ணை நான் பார்க்க, மணமேடையிலிருந்த மணப்பெண் என்னைப்பார்த்து ’’கொல்’’ என சிரிக்க சுற்றி நின்றவர்களுக்கு ஒன்றும் புரியவில்லை எனக்கு சட்டென புரிந்து விட்டது ஆஹா செருப்பு இதெப்படி முன்னாலேயே இவனுக்குத் தெரியுமா ? இல்லை அதன் பிறகா... பக்கத்தில் உட்கார்ந்திருந்த மாப்பிள்ளையைப் பார்த்தேன் அவன் சிரித்து விட்டு பெண்ணைப் பார்க்க இருவரும் மௌனமாய் சிரிப்பது எனக்கு புரிந்தது அவனை முறைத்துக் கொண்டே உட்கார்ந்திருந்து கல்யாணம் முடிந்ததும் அவனிடம் கேட்டேன்.

மாப்ளே உன் கூடவே இருக்கேன் இது எப்படிடா ? நாளைக்குப் பேசுவோம் ஆமா ஆமா இனி என்கூட பேச உனக்கு நேரம் ஏது... மறுநாள் அவன் சொன்னான் மாப்ளே ரொம்ப நன்றிடா... எதுக்கு ? உன்னாலேதான் எனக்கு இவள் மனைவியா கிடைச்சா... எப்படி ? அன்றைக்கு நீ பாட்டு பாடினேலே சிரிச்சாள்லே அதுக்குப்பிறகு இவளைப் ஃபாலோ செய்தேன் எங்கிட்டே சொல்லவே இல்லை சஸ்பென்சா இருக்கட்டும் பின்னாலே சொல்வோம்னு நினைச்சேன் எப்ப... குழந்தை பிறந்த பிறகா ? நேற்றாவது நீ சொல்லி இருக்கலாமே... நேற்று சொல்லியிருந்தா ? உங்க ரெண்டு பேருக்கும் ஒரு ஜோடி செருப்பு பரிசு வாங்கி வந்து இருப்பேன் வித்தியாசமாகவும் இருந்திருக்கும் எவனுமே இதுவரை கொடுத்திருக்கமாட்டான் மாப்ளே இதுல சந்தோஷமான விசயம் அவுங்களும் நம்ம ஜாதிதான் அதனாலே பிரச்சனை இல்லாமல் சுலபமா போச்சு எப்படியோ உங்களுக்கு கல்யாணம் நடந்ததுக்கு முதல் காரணம் டி.ராஜேந்தர் அவருக்கும் நன்றி சொல்லுங்க... அடுத்த இரண்டு வருடம்1988 கழித்து நான்கு பேர் சினிமாவுக்குப் போனோம் படத்தின் பெயர் என் தங்கை கல்யாணி.

01. கில்லர்ஜி

02. மாப்பிள்ளை

03. தங்கை

04. குட்டி மாப்ஸ் (Now age 27)

நண்பர்களே இந்தப்பதிவு எதற்கு தெரியுமா ? கடந்த விடுமுறையில் அந்த குட்டி மாப்ஸ் திருமணத்தில் கலந்து கொண்டு வந்தேன்.

குறிப்பு – நண்பர்களே... எனக்கு சிறுவயது முதலே (1 ¾ வயதிலிருந்து) பாட்டு பாடுவதில் விருப்பம் உண்டு பாட்டு கேட்பதிலும் விருப்பம் உண்டு அன்று நான் பாடிய பாடல் இருவர் சேர்வதற்கு காரணமாகி இருந்தது இதைப்போல 93 வயது நண்பர் ஒருவர் இறந்து போவதற்க்கும் காரணமாய் இருந்தது அந்தச்சம்பவம் வேண்டுமா... வேண்டாமா ? பயப்படாமல் சொல்லுங்கள் எழுதுகிறேன்.

அன்புடன் – தேவகோட்டை கில்லர்ஜி.

நண்பர் கவிஞர் ரூபன் நடத்தும் கவிதைப் போட்டியில் கலந்து வெல்வீரே என அன்புடன் அழைக்கின்றேன் - கில்லர்ஜி