கடவுளிடம் கேள்வி கேளுங்கள்

 

அன்று பகலில் ஓர் குட்டித்தூக்கம் கனவு வந்தது, அது கனவென்று விழித்த பிறகே எனக்கு விளங்கியது என்பதையும் இங்கு விளக்குகிறேன். கனவில் நான் கடவுளைக் கண்டேன் ஆம் அவர் கடவுள் என்பதும் பிறகே விளங்கியது, அதாவது நான் விழித்த பிறகு. இருப்பினும் அவரிடம் நான் உரையாடும் பொழுதே இவர்தான் இறைவனோ என்ற எண்ணமும் என்னுள் எழுந்தது.
 
இறைவா நான் ஏன் இங்கு இருக்கிறேன் ?
உனது பூலோக வாழ்வு முடிவுக்கு வந்து விட்டது ஆகவே உம்மை அழைத்து வந்தோம்.
 
நான் வாழவே இல்லையே... பிறகு எப்படி முடிவுக்கு வந்தது என்று சொல்லலாம் ?
நீர் உடலோடு உயிரோடு, உலாவி வந்தாயே... அதுதான் வாழ்வு.
 
உடலோடும், உயிரோடும் நடைபிணமாகத்தானே நடந்தேன் அது எப்படி வாழ்வாகும் ?
ஆம் பலரும் உடலிருந்தும் உலாவ இயலாமல் கிடந்து வாழ்ந்ததை நீர் பார்த்து இருப்பாயே அவ்வகையில் உமக்கு உயர்வான வாழ்வுதான்.
 
நான் பூலோகத்தில் நினைவு தெரிந்த காலம் முதல் சந்தோஷமாக இருந்ததாக தெரியவில்லையே... ?
உனக்கு கொடுத்ததை உணர்ந்து வாழாமல் பிறருக்கு கொடுத்துக் கொண்டே இருந்ததால் உமது வாழ்வு முடிந்து விட்டது தெரியாமலே காலத்தை கடத்தி விட்டாய். ஆகவே சந்தோஷத்தை நீர் உணராமலேயே முடித்து விட்டாய்.
 
எனக்கு துரோகம் செய்தவர்கள் சந்தோஷமாகவே வாழ்கிறார்கள், ஆனால் நான்தான் அவைகளை தொட முடியாமல் போய் விட்டது.
நீ எதற்காக அடுத்தவர்களின் சந்தோஷத்தை பார்க்கிறாய் ?
 
அவர்கள் நல்லது செய்ததை நான் பார்த்ததே இல்லையே ?
அது உனது வேலை இல்லையே...அது நான் பந்தப்படும் நிர்வாகம்.
 
சரி நான் மீண்டும் சந்தோஷமாக வாழமுடியாதா ?
உமது காலம் முடிந்து விட்டதே ?
 
சரி மனிதன் சந்தோஷத்தை உணர்வது எப்படி ?
அது மனம் பந்தப்பட்ட விடயம்.
 
சரி மீண்டுமொரு வாய்ப்பு கொடுக்க கூடாதா ?
தீர்ப்புகள் இங்கு திருத்தப்படுவதில்லை.
 
பூலோகத்தில் நீதியரசர்கள் சன்மானம் கொடுத்தால் கொலை செய்தவனையே நிரபராதி என்று மாற்றி எழுதுகின்றார்களே... ?
இங்கு அதற்கு வாய்ப்பு இல்லை ராஜா.
 
நீர் படைத்த மனித ஜடங்களே மாற்றி எழுதும் பொழுது உம்மால் முடியாதா ?
அவர்களின் அறிவுக்கு எட்டாத விடயங்கள் நிறைய இருக்கிறது.
 
நானும் அறிந்து கொள்கிறேன் அவர்களுக்கு எட்டாத அறிவுதான் என்ன ?
ஒரு ஐந்து அகவை சிறுமியை காமுகன் பலாத்காரம் செய்து கொன்று விடுகிறான் என்று வைத்துக்கொள். அவனுக்கு நீதிபதிகள் கொடுக்கும் தண்டனை என்ன ?
 
அதிகபட்சமாக மரணதண்டனை கொடுப்பார்கள்.
சரி இன்னொரு மனிதன் ஒட்டு மொத்தமாக ஆயிரம் மனிதர்களை கொன்று விடுகிறான் என்று வைத்துக்கொள் அவனது தண்டனை என்ன ?
 
அதுவும் மரணதண்டனையாகத்தான் இருக்க முடியும்.
அது எப்படி ஒரு கொலை செய்தவனுக்கும், மரணதண்டனை, ஆயிரம் மனிதர்களை கொன்றவனுக்கும் மரணதண்டனை ?
 
வேறு வழியில்லையே... அதற்காக ஆயிரம் முறைகள் அவனுக்கு மரணதண்டனை கொடுக்க முடியுமா ?
முடியும் அதற்கு இங்குதான் சாத்தியம்.
 
அவனுக்கு இந்த அளவுக்கு மட்டுமே அறிவைக் கொடுத்தது யார் ?
யாம்தான் கொடுத்தோம்.
 
ஒவ்வொரு மனிதனும் ஆலயங்களுக்கு சென்று நல்ல அறிவைக்கொடு இறைவா என்று உம்மை வணங்கி உம்மிடம் அருள் பெற்று நல்ல மனிதனாக, உலகுக்கு நல்ல செயல்கள் செய்கின்றனரே இதற்கு காரணவாதி யார் நீர்தானே ?
ஆம் யாமேதான் வேறு யாராக இருக்க முடியும் ?
 
அப்படியானால் அவன் நல்ல மனிதனாக வாழ்ந்து முடித்ததற்கு காரணம் அவனல்ல நீர்தான் இல்லையா ?
நிச்சயமாக யாம்தான் இதற்குள் உமது வாரியாரும், பெரியாரும் இருந்தனர்.
 
அப்படியானால், கெட்டவனாக வாழ்ந்து இந்த உலகை நாசமாக்கியவனின் செயலுக்கும் நீர்தானே காரணமாக இருக்க முடியும். காரணம் நீயின்றி அசையாது உலகு என்பது மெய்தானே... ?
? ? ?
 
என்ன பதிலைக் காணோம் ?
இப்பொழுது என்னதான் சொல்ல வருகிறாய் ?
 
உம்மால் ஆக்கவும் முடியும், அழிக்கவும், முடியும், தீர்க்கவும் முடியும், தீர்ப்பை திருத்தவும் முடியும் ஆகவே எமக்கு சற்று காலஅவகாசம் கொடுத்து இவ்வுலக வாழ்வில் சந்தோஷத்தை அனுபவிக்க இயலாமல் போனாலும் பரவாயில்லை. தொட்டுப் பார்க்க, மீண்டுமொரு சந்தர்ப்பம் கொடுப்பாயாக. நான் நிச்சயம் திரும்பி வருகிறேன் வாக்கு மாறமாட்டேன் நான் இந்திய அரசியல்வாதி அல்ல.
(ஆஹா... இவன் தேவகோட்டைக்காரன்ல... தேவையில்லாமல் வாயைக் கொடுத்து மாட்டி விட்டோமே... வந்தவுடன் தண்டனையை கொடுத்து தூக்கிப் போட்டு ராவாமல் தர்க்கம் செய்தது நமது தவறு)
 
மைண்ட் வாய்ஸில் நினைப்பது எனக்கும் கேட்கிறது பதிவர்களுக்கும் கேட்டு இருக்கும். தீர்ப்புகள் திருத்தப்படலாமே...
நல்லது உமது வாழ்வு சிறிது காலம் சொர்க்க பூமியான கைலாசாவில் மகிழ்ச்சியாக வாழ்ந்து வா என்று ஆசீர்வதித்தோம். நித்திஞ்சிதம் நமஹ...
 
ரஞ்சிதமே... ரஞ்சிதமே... உன் உதட்டை... கடிச்சு...
திடீரென அலைபேசியின் ரிங்டோன் சத்தம் கேட்டு விழித்தேன். கனவேதான். இதை பதிவர்களுக்கு சொல்லணுமே... உடன் கணினியை திறந்தேன்.
 

கில்லர்ஜி https://www.youtube.com/watch?v=Q-SES2h92j4 தேவகோட்டை

 
சாம்பசிவம்-
இப்படி தர்க்கம் செய்து மறு வாய்ப்பு கிடைக்கும் என்றால் மேலே போன அரசியல்வாதிகள் எல்லோரும் மறுபடியும் வந்து ஆட்சியை புடிக்கலாமே ?

Share this post with your FRIENDS…