தர்மபுரி, தர்மஅடி தர்மராஜன்

தர்மபுரி சீனிவாச ஐயர், மளிகை கடையின் முதலாளி ரொம்பவும் ஆச்சாரமானவர், அழகாபுரி ஏரியாவில் தெரியாதவர்களே கிடையாது சிறுவர் தொடங்கி பெரியவர் வரை செல்லமாக ''ஐயரே'' என்றே அழைப்பார்கள், கடைக்குள் நுழைந்ததும் வேலையாட்களிடம் கேட்டார்.

ஏண்டா அம்பி அரிசி மூட்டையை வெளியே வைக்கலையா ?

இதோ ஆச்சு டேய் தூக்குடா,

ஆமாடா, கொழந்தே புரிஅடிராஜன் எங்கே ?

அவன் டீ வாங்க ஜவான் டீ ஸ்டால் போயிருக்கான்... ஐயரே.  

அடே அம்பிகளா கடையை தொறந்ததுமே டீ வேண்டுமே உங்களுக்கு, முதல்லே யாபாரத்தை கவனிங்கடா....

கல்லாவில் உட்காரும்முன், பெருமாளை வணங்கி விட்டு உட்கார்ந்து நிமிர்ந்தால் எதிரே.. புரிஅடிராஜன் நின்றான், சட்டை கிழிந்து இருந்தது தலை கலைந்து இருந்தது, கன்னமும் லேசாக உப்பி இருந்தது. 

ஏண்டா அம்பி, டீ எங்கே ஏன் முகமெல்லாம் வீங்கியிருக்கு ?

ஐயரே டீக்கடை மலைமேகம் என்னைப் போட்டு அடிச்சுட்டாரு..

என்ன திரிசமன் பண்ணியோ ஏன் அடிச்சாரு ?

அவருதான், பாய்லருல தண்ணி ஊத்துடான்னு... சொன்னாரு ஊத்துனதுக்கு அடிச்சுட்டாரு...

ஜலம் வார்த்தியா ஜலம் வார்த்ததுக்கா இந்த தண்டனை... சரி, வா விசாரிப்போம்.

இரண்டு கடை தள்ளி ஜவான் டீ ஸ்டால் இருந்தது ஐயர் கேட்டார்

ஏப்பா மலைமேகம் வாள் கொழந்தே என்ன பண்ணான் எதுக்கு கொழந்தையை இப்படி பணிஷ் பண்ணேள் ?

வாங்க ஐயரே... வியாபாரநேரம், அவசரத்துக்கு பாய்லருல தண்ணி ஊத்துடான்னு சொன்னா, மேலே ஊத்தி அடுப்பை அணைச்சுட்டான், அதுவுமில்லாம சீக்கிரமா டீ போடுய்யான்னு மண்டக்கனமா பேசுறான், அதான் ரெண்டு வச்சேன்.

அட, ஞானசூன்யமே பாய்லருக்கு ஜலம் எதுல வார்கணும்னு தெரியாதாடா நோக்கு ? எனக்குன்னு வந்து வாய்ச்சியே ! அபிஷ்டு ! வாடா !  

அவரும் ரெண்டு தட்டி, கூட்டிக் கொண்டு வந்தார், புரிஅடிராஜன் வயசு 24 இவன் எப்பவுமே இப்படித்தான் எதைச் சொன்னாலும் ஏடாகூடமா செய்துட்டு, ஊர்க்காரன்ட்ட அடி வாங்குவான், தினம் ஏதாவது ஒரு பிரச்சனையை கொண்டு வந்து ஐயர் தலையில கட்டிடுவான், ஊரான் அடிச்சது போதாதுன்னு அவரும் போட்டு அடிப்பார், ஆனா பத்தே நிமிஷத்துல மறந்து விடுவான், 13 வயதிலிருந்தே அவரிடம் வேலை செய்கிறான், (அடியும் வாங்குறான்) ஒரு தடவை இப்படித்தான் கடையில் சரக்கு நிறைய இருந்தது, 

கொழந்தே ! புரிஅடிராஜா இந்த, உப்பு மூட்டையை எடுத்துண்டு போய் ஆத்துல போட்டுட்டு, வா ! 

இவனும் மூட்டையை முதுகில் தூக்கிப் போனவன் ஒரு மணி நேரமாகியும் வரவில்லை வீட்டுக்கு கடையிலிருந்து போக10 நிமிடம் போதும், எங்கே போனான்... யோசித்துக்கொண்டு இருக்கும்போதே 3 பேர் அவனை ரத்தக்களரியாக கூட்டி கொண்டு வந்தார்கள்.

என்னடா அம்பி ! ஏண்டா ஏன் இவ்ளோ ரத்தம் கொட்டறது ?         

என்ன... ஆச்சா ? ஐயரே இவன் ஆத்துல குளிச்சுக்கிட்டு இருந்த பொம்பளைங்க மேல, பாலத்துலருந்து மூட்டையை போட்டு கொல்லப் பாத்துட்டான், உங்களுக்காகத்தான் விட்டு வச்சோம் இல்லே தொலைச்சுப் புடுவோம் தொலைச்சு.... வாங்கடா... போவோம். (அவர்கள் போய் விட்டார்கள்)

ஏண்டா சமத்து கட்டி ! என்னடா செஞ்சே உப்பு மூட்டை எங்கேடா ? 

என்ன, ஐயரே நீங்கதானே சொன்னீங்க, ''ஆத்துல போட்டுவா'' ன்னு இப்ப நீங்களே உப்பு மூட்டை எங்கேன்னா நான் எங்கே போவேன் ? பாலத்து மேலே நின்னு போட்டேன் கீழே பொம்பளைங்க குளிக்கிறது எனக்கு எப்படித் தெரியும் நீங்களே சொல்லுங்க ? அதுக்கு இப்படிப் போட்டு அடிக்கிறாங்கே..  

? ? ?

இப்படித்தான், ஏதாவது ஏடாகூடமா செய்துட்டு ஊரான்ட்ட அடி வாங்கிட்டு வருவான், இவணுக்கு எப்படி, புரிஅடிராஜன் னுபேர்  தெரியுமா ? இவன் முழுப்பெயர் தர்மராஜன் எங்கே போனாலும் தர்மஅடி வாங்கி வருவான், சொந்த ஊரும் தர்மபுரி, ஊரையும், அடியையும், பேரையும், இணைச்சா.., 

தர்மபுரி 

தர்மஅடி 

தர்மராஜன் 

இதுல, தர்மத்தை தர்மம் பண்ணிட்டு சுருக்கமா புரிஅடிராஜன்னு, கூப்பிட்டு அடிப்பாங்க.

இந்த பதிவை நான் சிறப்பாக வெளியிட சிறிய அளவில் உதவிய பெரிய மனது படைத்த எமது நண்பர் ‘’தளிர்’’ சுரேஷ் அவர்களுக்கு கில்லர்ஜியின் நன்றி ! நன்றி ! !  நன்றி  ! ! !